Read tetala Danyele 2 Bible Online

Danyele 2 - tetala bible

Danyele 2

¹Lʼeleku ka hendi ka diulelu dia Nebukadineza, Nebukadineza akenyi alo. Lumu landi lakayala wutshu; ndi kumbeya ndala djo.

²Ku khumʼekanga aketi akanga wʼaloho, asaki wʼawulu, ateketshishi wa djimu la asi Kaladiya, dia ndjuwutela la ndjulimbitshiya alo andi. Ku vo wakatemala la ntundu ka khumʼekanga.

³Khumʼekanga akawatela ati: Dimi lakenyi do, ku utema ami ambohenyahenyama dia mbeya kitshimudi ka do diako.

⁴Ku asi Kaladiya wakakaluyakhumʼekanga diui lʼoteketa wʼasi Arama vati: Khumʼekanga li, ulumbi pundju! Utusakweli, shu ekambi aye, do diako, ku shu tayukulimbitshiya kitshimudi kadio.

⁵Khumʼekanga akakaluya asi Kaladiya diui ati: Dimi handjeya do diako. Naka nyu hanyumvutela do diako la kitshimudi kadio, nyu nyayatshatshema betshi betshi, la mvudu yanyu yayulanyema.

⁶Keli naka nyu nyayumvutela do diako la kitshimudi kadio, dimi layunyusha eshasha, weedi la lukumu la wuki. Okone nyumvuteli do diako la kitshimudi kadio.

⁷Vo wakûkaluya diui etena ka hendi vati: Khumʼekanga, utusakweli do, shu ekambi aye, ku shu tayukutela kitshimudi kadio.

⁸Khumʼekanga akakaluya diui ati: Dimi mbeyaka nti: Mete mete, nyu nangaka ntshimbatshimba, ne dia nyu menaka nyati: Dimi handjeya do diako.

⁹Keli naka nyu hanyunsakwela do diako, paka mbuka otoi kambutshikala le nyu, ne dia nyu nangaka ndjalongosola dia mvutelami aui wa kashi la wa lukesu, edja ndu dikambu diambukadimo. Okone nyunsakweledio, ku dimi layeya nti: Nyu mbeyaka nimbitshiyami kitshimudi kadio.

¹⁰Asi Kaladiya wakakaluya khumʼekanga diui vati: Nduku untu leko la kete leya mvutela khumʼekanga dikambu ne. Ndu nduku khumʼekanga ka wuki ndu wulu akambula kanga aloho, usaki wʼawulu, kana usi Kaladiya dikambu dia wuhu one.

¹¹Dikambu diambuyutolomba, we khumʼekanga, dieko wulu efula. Nduku untu lukuki nkuteladio, tshikima ditemolatemola, diahadjashi lʼatei wʼantu.

¹²Uma lu dikambu so mbakumala khumʼekanga kele ka wulu, mbakandadjanga dia ndjaka asi yimba tshe wʼasi Babilona.

¹³Lukumu la didjangu diako lakadiangana dia ndjaka asi yimba. Wakayangi Danyele la anyandi dia mbadiaka.

¹⁴Ku Danyele akakaluya Ariyoke, olombodi wʼalami wa khumʼekanga lakatumbi dia ndjaka asi yimba wa lu Babilona aui wa yimba la wa memakana.

¹⁵Ndi akambula Ariyoke, olombodi wa khumʼekanga, ati: Dikambu kuna dia-mbudjanga khumʼekanga didjangu shashimuya wuhu one? Ku Ariyoke akalimbitshiya Danyele dikambu.

¹⁶Ku Danyele akoto le khumʼekanga, akolombe ati: Khumʼekanga, utukukunga yema, ku dimi layukulimbitshiya do diakayenyi.

¹⁷Ku Danyele akoto lu luudu landi, akatela anyandi Hananiya, Mishaele la Azariya dikambu so.

¹⁸Ndi akalombe dia nomba Unyashungu leli lʼulungu ketshi lu dikambu ne diushami, ne dia Danyele la anyandi watukudiakema kame la asi yimba akina wa lu Babilona.

¹⁹Lʼutshu dikambu diakashami diakenama le Daniele lu enelo. Ku Danyele akatumbula Unyashungu leli lʼulungu.

²⁰Danyele akati ati: Lukumbu la Unyashungu latumbwami pundju, pundju! Ne dia ndi kukanga yimba la wulu.

²¹Ndi katukadimulaka tena la enonyi, Katukitshakitshaka khumi ya dikanga Ndu atubiyaka khumi ya dikanga. Ndi katushaka akanga a yimba yimba, La akanga wa ewu ewu.

²²Ndi katushulaka akambu wa wulu wushami. Ndi kateyaka kene keli lu udjima. La usasi atuyalaka la ndi.

²³We Unyashungu a wapapa, dimi lambukusha lusaka, Lambukandula ne dia we ambumbisha yimba la wulu. Kakiane we ambumbisha kene kakatakolombe, Ne dia we ambutulimbitshiya do diakenyi khumʼekanga.

²⁴Okone Danyele akatshu utsha la Ariyoke, lakasonola khumʼekanga dia ndjaka asi yimba wa lu Babilona, akatoto le ndi. Ndi akawutela ati: Tudiakaki asi yimba wa lu Babilona. Ontole la ntundu ka khumʼekanga, keli ntulimbitshiya kitshimudi ka do diandi.

²⁵Ku Ariyoke akatole Danyele esadi la ntundu ka khumʼekanga. Ndi akatuwutela ati: Dimi lambutana pami kemotshi uma lʼatei wʼasi Juda weli lu lohombo, layukulimbitshiya, we khumʼekanga, kitshimudi ka do diaye.

²⁶Khumʼekanga akambula Danyele letawo vati: Beleteshaza ati: We mbeyaka nsakwelami do diakamenyi, la nimbitshiyami kitshimudi kadio?

²⁷Danyele akakaluya khumʼekanga diui ati: Asi yimba, kana akanga wʼaloho, asaki wʼawulu kuyanga ateketshishi wa djimu, haweyi kulimbitshiya, we khumʼekanga, dikambu diushami diakayalombe.

²⁸Keli Unyashungu leli lʼulungu, atushulaka akambu wushami. Ndi akakenya, we khumʼekanga Nebukadineza, akambu wayuyala lu nshi yayayi. One eli do diaye la waenelo wakayenyi lamʼakiye lu mbetu kaye.

²⁹Khumʼekanga li, tukanyi takayi le ye lamʼakiye lu mbetu, teli akambu wayuyala lu nshi yayayi. One latushulaka akambu wushami, akakenya akambu wayuyala.

³⁰Keli dikambu diushami ne diambeyama le mi, aha ne dia yimba yami mbuleki yimba ya wasena tshe, keli dia kitshimudi kadio mbeyama le ye, we khumʼekanga, dia we mbeya tukanyi teli lʼutema aye.

³¹Khumʼekanga li, we akenyi efanelu ka wuki kʼuntu! Efanelu kako kaki wuki, la ngaingai ka wulu. Yo kakemala la ntundu kaye; enelo kato kaki mamba.

³²Ote ato waki wa paunyi ka pudipudi; tulu kato la anya ato waki wa fesa; dikundju diato la pelohelo diato waki diʼohotela.

³³Ekulu ato waki wa luwulu; akaka ato waki etenyi luwulu, etenyi diwumba.

³⁴We akenyi lamʼakako dive aha lʼekimanyelu ka lunya lʼuntu. Dio diakakomola akaka wa luwulu la diwumba wʼefanelu kako, diakawauli betshi betshi.

³⁵Ku luwulu, diwumba, ohotela, fesa, la paunyi wakuli kame, wakayala efushi etu uku fufudi ya lu dihuli diʼesuswelu lu nshi ya dinela. Ku lopepe lakawaembe, edja ndu nduku yema yakatanema ntu. Keli dive diakakomola efanelu kako, diakayala ukungu a wuki, diakaluli kete tshe.

³⁶Osoku mbaki do. Kakiane shu tutsha nkulimbitshiya kitshimudi kadio, we khumʼekanga.

³⁷Khumʼekanga li, we keli khumʼekanga ka khumi ya dikanga! Unyashungu leli lʼulungu akakusha diulelu, wulu, wuki, ndu lutumbu.

³⁸Ndi akakimo antu, nyama ya la kete, la fudu ya lʼulungu lu ahuli tshe wudjashiwo lu anya aye. Ndi akakete umbuledi awo tshe; we keli ote wa paunyi.

³⁹Diulelu dikina diuleki diaye tshitshe, diayunela lʼokongo aye. Lʼokongo diku, diulelu dia satu diayuyala uku ohotela; dio diayulela kete tshe.

⁴⁰Diulelu dia nei diayuyala wulu uku luwulu, ne dia luwulu latulaka ndu latowediawediaka diango tshe. Uku atowediawediaka luwulu, mbayowediawedia diulelu diako diango tshe.

⁴¹Uku akayenyi akaka la pita etenyi diwumba, etenyi luwulu; osoku mbayukahanyema diulelu. Keli dio diayuyala la wulu uku luwulu, ne dia we akenyi luwulu losohanyimi la diwumba.

⁴²Uku aki pita la akaka etenyi luwulu etenyi diwumba, wuhu ako mbayuyala diulelu etenyi wulu etenyi wodu wodu.

⁴³Uku akayenyi luwulu losohanyimi la diwumba, mbayutshukana antu wa lu wedja tshe. Keli wudja la wudja hawumamana, uku aha mamana luwulu la diwumba.

⁴⁴Lu nshi ya khumi ya dikanga yako, Unyashungu leli lʼulungu ayutundja diulelu diahalanaki pundju. Dio hadiuyala lʼokongo a wudja ukina. Dio diayulanya waulelu ako tshe, diayashila ushiki, ku dio diame diayushikikala pundju.

⁴⁵Oso eli kitshimudi ka dive diakayenyi, diako uma lʼulungu aha la ekimanyelu ka lunya la untu, diakawediawedia luwulu, ohotela, diwumba, fesa la paunyi. Unyashungu a wuki ambulimbitshiya khumʼekanga akambu wayuyala lu nshi yayayi. Do diako dieli shikaa, la kitshimudi kadio keko mete.

⁴⁶Ku khumʼekanga Nebukadineza akako ekhukhumadi la kete, akakhusamela Danyele. Ndi akadjanga dia mbulambula ulambu la ulambu wa malashi wʼupumu wololo.

⁴⁷Khumʼekanga akatela Danyele ati: Mete, Unyashungu aye eli Unyashungu weli ladiku dia ditemolatemola, Khumadiondjo ka khumi ya dikanga, umbishudi wʼakambu wushami, ne dia we akeyi mbishula dikambu diushami ne.

⁴⁸Ku khumʼekanga akedia Danyele efula, akawusha eshasha efula, akawete umbuledi wa leke tshe la Babilona. Ndi akawudji uwandji wa ladiku wʼakanga a yimba tshe wa lu Babilona.

⁴⁹Danyele akalombe khumʼekanga dia ndi mbidja Shadaraka, Meshake, la Abede-Nengo elohe lu leke la Babilona. Keli Danyele akadjase lu seke dia khumʼekanga.