Read tetala Danyele 3 Bible Online

Danyele 3 - tetala bible

Danyele 3

¹Khumʼekanga Nebukadineza akatshi kimeta ka paunyi kaki kubita akumi asamalu lu wemema, la kubita akumi asamalu lu wuki. Ndi akakieme lʼusui wa Dura, lu leke la Babilona.

²Ku khumʼekanga Nebukadineza akatumi akendji dia nteta elohe, ete a wudja, embuledi, embadi, alami a waumbelu, andaki, esambudi, ndu akanga wʼelimu tshe wa beke dia vo ndja lu ekidielu ka kimeta kakeme khumʼekanga Nebukadineza.

³Ku elohe, ete a wudja, embuledi, embadi, alami a waumbelu, andaki, esambudi la akanga wʼelimu tshe wa beke wakasangana lu ekidielu ka kimeta kakeme khumʼekanga Nebukadineza. Ku vo wakemala la ntundu ka kimeta kakeme Nebukadineza.

⁴Ku oteketshi akahangohango ati: Nyu antu, wedja, antu wateketa tshe, nyulungi didjangu ne!

⁵Etena kayunyuka lundju la dimama, pungi, losese, longombi, dikembi, luseki, la wehu tshe wa Eimbu, kanyukhuse adui dia ntemola kimeta ka paunyi kakeme khumʼekanga Nebukadineza.

⁶Untu tshe lahukhuse adui dia ntemola kimeta ayukadjema etena kako lu khuka ka dja.

⁷Okone lu etena kako lamʼakakuki antu tshe, wedja la antu wa eteketa tshe, lundju la dimama, pungi, losese, longombi, dikembi, la wehu tshe wa kimbu, vo wakakhuse adui, wakatemola kimeta ka paunyi kakeme khumʼekanga Nebukadineza.

⁸Okone lu etena keso asi Kaladiya amotshi wakasukana, wakafundi asi Juda.

⁹Vo wakatela khumʼekanga Nebukadineza vati: Khumʼekanga li, ulumbi pundju!

¹⁰Khumʼekanga, we akadjanga dia antu tshe wayuka lundju la dimama, pungi, longombi, dikembi, luseki, la wehu tshe wa kimbu nkhuse adui dia ntemola kimeta ka paunyi;

¹¹la mbikadja untu tshe, lahukhuse adui dia ntemola kimeta, lʼatei a khuka ka dja.

¹²Keli asi Juda amotshi, Shadaraka, Meshake, la Abede-Nengo wakayakitsha elohe wa lu leke la Babilona, haweyi diaye nduku yema, we khumʼekanga. Vo hawukhusela ditemolatemola diaye adui, kuyanga ntemola Kimeta ka paunyi kene kakayeme.

¹³Ku Nebukadineza akadanganela la kele, akatumi antu dia nteta Shadaraka, Meshake, la Abede-Nengo. Vo wakela antu aso la ntundu ka khumʼekanga.

¹⁴Nebukadineza akambula Shadaraka, Meshake la Abede-Nengo ati: Undi, diui so diahanyakhusela ditemolatemola diami adui kana ntemola kimeta ka paunyi kene kakameme, mete kedio?

¹⁵Kakiane nyuyalongosole, lu etena kayunyuka lundju la dimama, pungi, losese, longombi, dikembi, luseki la wehu tshe wa kimbu kanyukhuse adui, kanyotemole kimeta Kakamatshi, keli naka nyu hanyukitemola, wayunyukandja etena kako lu khuka ka dja. Etemolatemola kakona kayeya nyuhandja uma lʼanya ami?

¹⁶Ku Shadaraka, Meshake, la Abede-Nengo wakakaluya khumʼekanga diui vati: Nebukadineza li! Shu kema la uhumba wa nkukaluya diui lu dikambu ne.

¹⁷Ulungi, Unyashungu asu, latutotemolaka eko la wulu wa ntushimbela uma lu khuka ka dja; ndu ndi ayutushimbela uma lu anya aye, we khumʼekanga.

¹⁸Kuyanga aha osoku we khumʼekanga, eye wati: Shu hatukhusela ditemolatemola diaye adui, kana ntemola kimeta ka paunyi kene kakayeme.

¹⁹Ku Nebukadineza akadanganela la kele; elundji kandi kakakadimo le Shadaraka, Meshake, la Abede-Nengo. Ndi akadjanga dia antu mpetsha khuka ka dja tena esambeli, uleki yediko yatuwo-hetshaka.

²⁰Ndi akatela apami wa wulu amotshi uma lʼatei wʼului andi wʼalimbi, dia vo nkeleka Shadaraka, Meshake la Abede-Nengo, la dia vo mbakadja lu khuka ka dja.

²¹Ku wakakeleka kame la ehaku awo, sumishi yawo, akoti awo la eloto awo ekina, wakawakadja lʼatei a khuka ka dja.

²²Uma lu didjangu dia khumʼekanga, mbakawahetsha khuka ka dja wulu efula. Lumbi la dja lakadiaki apami ako wakembe Shadaraka, Meshake la Abede-Nengo.

²³Ku apami aso asatu, Shadaraka, Meshake, la Abede-Nengo, wakako wukelekami lʼatei a khuka ka dja.

²⁴Ku khumʼekanga Nebukadineza akakashiino, akunela esadi. Ndi akambula andaki andi ati: Undi, shu hatudjisha antu asatu wukelekami lʼatei wa dja? Ku vo wakukiluya diui vati: Ngaso khumʼekanga!

²⁵Ndi akawatela an Keli, dimi lambena antu anei wahakelekami, wakendakenda lʼatei wa dja, ku hawulungudi nduku yema. La elundji kʼuntu la nei nfanaka la elundji ka onʼa etemolatemola kemotshi.

²⁶Ku Nebukadineza akasukana lʼunyo wa khuka ka dja, akati ati: Shadaraka, Meshake, la Abede-Nengo, ekambi wa Unyashungu KhumʼUlungu, nyutumbi, nyuyi lane! Ku Shadaraka, Meshake la Abede-Nengo wakatumbi uma lʼatei wa dja.

²⁷Elohe, ete wa wudja, embuledi, la andaki wa khumʼekanga wakasangana kame, wakenyi antu ako, vati: Dja hayutshedi alimba wʼantu ane nduku dikambu, kuyanga nunguya avu awo. Ehaku awo kunungula, kuyanga enyi ka dja kunkuma le wo.

²⁸Nebukadineza akati ati: Unyashungu a Shadaraka, Meshake la Abede-Nengo, lakatumi ondjelo andi dia ndjushimbela ekambi andi watuwekamaka, ndu wakahedia diui dia khumʼekanga, ndu wakakimo alimba awo lu dihuli dia vo nkhuse adui la ntemola etemolatemola kaha Unyashungu awo, atumbwami!

²⁹Okone dimi lambudjanga nti: Lʼatei wʼantu, a wudja, kana wʼeteketa tshe, untu tshe layoteketa aui wa kolo lu dikambu dia Unyashungu a Shadaraka, Meshake la Abede-Nengo, ayatshatshema betshi betshi, la luudu landi layulanyema; ne dia nduku etemolatemola keko, keya nshimbela antu wuhu one.

³⁰Ku khumʼekanga akedia Shadaraka, Meshake la Abede-Nengo lu leke la kete la Babilona.