Read tetala Danyele 4 Bible Online

Danyele 4 - tetala bible

Danyele 4

¹Dimi, khumʼekanga Nebukadineza, katela antu tshe, wedja tshe, la eteketa tshe wa la kete nti: Ki efula kayali le nyu!

²Aki ololo dimi nyulimbitshiya tulimbitelu la akambu wa mamba wakamenya Khumʼulungu Unyashungu.

³Ndi tulimbitelu tandi waki li! Ndi akambu andi mamba li! Diulelu diandi, dieko diulelu dia pundju, Diayuyalaka lu nonga la nonga.

⁴Dimi, Nebukadineza, lakadjaseka ki lu luudu lami, ndu lakenaka olo lu luudu lami la khumʼekanga.

⁵Dimi lakenyi do diakambutsha woma. Tukanyi takamakanaka lamʼakimi lu tangi, la waenelo wakamenaka, wakampenyahenya.

⁶Okone dimi lakadjanga dia vo mbela asi yimba tshe wa lu Babilona la ntundu kami, dia vo nimbitshiyami kitshimudi ya do diako.

⁷Ku akanga wʼaloho, asaki wʼawulu, asi Kaladiya, la ateketshishi wa djimu wakayi. Dimi lakasakwela do, keli vo kumbeya nimbitshiyami kitshimudi yadio.

⁸Keli lʼokongo diku, Danyele, letawo vati: Beleteshaza, lukumbu la etemolatemola kami, luludi too la nyuma ka ditemolatemola diʼekila, akayi la ntundu kami. Ku dimi lakusakwela do diami nti:

⁹Beleteshaza, olombodi wʼakanga wʼaloho, unimbitshiya waenelo wakamenyi lu do la kitshimudi yawo; ne dia dimi mbeyaka nti: Nyuma ka ditemolatemola diʼekila keko le ye, la nduku dikambu diushami diayukuheka.

¹⁰Lanʼeli waenelo wakamenyi lamʼakametami lu mbetu kami. Lamʼakimi lu menda, menyi ku utamba wʼutali tshwaa one weli la kete.

¹¹Utamba ako wakayala wuki la wulu, sodi kawo kakakumi pulu ndu lʼulungu, ndu wakawenaka lu kuma tshe ya kete.

¹²Akatshi awo waki amena, ndu elua awo waki efula. Vo wakatokaka elua wʼantu tshe nde. Nyama ya la kete yaketamaka lu dedi diawo, la fudu ya lʼulungu yakatshaka kefu lu tahi yawo, ndu engo tshe keli la lumu, kakalekaka mbu ya nde uma loko.

¹³Dimi lakenyi waenelo lamʼakametami lu mbetu. Lakenyi ulami omotshi, untu lʼekila one ayahulo uma lʼulungu.

¹⁴Ndi akahangohango wulu ati: Nyuyukuli utamba, nyokote tahi yawo, nyokondjole akatshi awo, nyuhandjuli elua awo. Nyama ya la kete yamo uma la tshina diawo, ndu fudu ya lʼulungu uma lu tahi yawo.

¹⁵Nyutshiki ehekeli keli la ediu lu kete, nyukikeleki la molola wa luwulu ndu wʼohotela lʼatei wʼadiyu wʼomongela wa lʼusui. Ndi kaloyamaki la lopopo uma lʼulungu, ndu kalekaki adiyu wa lʼusui uku nyama.

¹⁶Utema wʼuntu wayumo uma le ndi, ku utema wa nyama wayuyala le ndi, osoku tena esambeli diayulekana.

¹⁷Elumbwelu kene, keli didjangu dia wane watulamaka; esangweyu kene, keli olembe wʼekilami, dia wasena mbeya vati: KhumʼUlungu kuledi lu diulelu diʼantu. Ndi katushaka one lalangandi disha, ndu katumbiyaka one luleki tshitshe dia ndjala umbuledi adio.

¹⁸Oso eli do diakamenyi, dimi khumʼekanga Nebukadineza. Okone we Beleteshaza, unimbitshiya kitshimudi yadio, ne dia akanga a yimba tshe wa lu diulelu diami, haweyi nimbitshiyamidio. Keli we mbeyaka, ne dia nyuma ka ditemolatemola diʼekila keko la ye.

¹⁹Ku Danyele, letawo vati: Beleteshaza, akamene diui; tukanyi tandi takohenyahenya. Khumʼekanga akawutela ati: Beleteshaza, do ne kana kitshimudi yadio tawukuhenyahenyaki. Beleteshaza akûkaluya diui ati: Khumemi, do ne diayali le wane watukuhetshaka, la kitshimudi yadio le atunyi aye!

²⁰Utamba wakayenyi, wakuli utali ndu wakayala wulu, wakakumi sodi kawo pulu ndu lʼulungu, wakenamaka la kuma tshe ya kete.

²¹Vo waki la akatshi wʼamena ndu elua efula, la mbu ya nde yakakuki le tshe. Nyama ya la kete yaketamaka la tshina diawo, la fudu ya lʼulungu yakatshaka kefu yawo lu tahi yawo —

²²oso eli we, we khumekanga! We kakahami, kakayala wulu. Ku wuki aye wakafulanela, wakambela pulu ndu lʼulungu; la diulelu diaye diakakumi pulu ndu la kuma ya kete.

²³Khumʼekanga, we akenyi ulami omotshi, untu lʼekila, ayahulo uma lʼulungu, lakati ati: Nyunyukuli utamba one, nyulanya. Keli nyutshiki ehekeli kawo keli la ediu lu kete! Nyukikeleki la molola wa luwulu ndu wʼohotela lʼatei wʼadiyu womongela wa lʼusui. Ndi kaloyamaki la lopopo lʼuma lʼulungu. Ndi alekaki adiyu wa lʼusui uku nyama, edja ndu tena esambeli diambulekana.

²⁴Khumʼekanga li, oso eli kitshimudi ya do! Do diako dieko didjangu dia KhumʼUlungu, diambundudjanga dikambu diaye, we khumemi khumʼekanga.

²⁵Wayukutshanya uma lʼatei wʼantu, ku we ayudjase kame la nyama ya lʼusui: wayukuleshaka adiyu uku ngombe. We ayoloyama la lopopo lʼuma lʼulungu, ku tena esambeli diayukulekana, edja ndu we ambulimbitela wati: KhumʼUlungu kuledi lu diulelu diʼantu, la ndi atudishaka one lalangandi.

²⁶Lanʼeli kitshimudi ya didjangu, dia ntshika ehekeli kʼutamba keli la ediu kene. Diulelu diaye diayushilikala le ye lamʼayuyulimbitela wati: Ulungu kuledi!

²⁷Uma lu dikambu so, khumʼekanga etawo aui ami ane. Ukimo ntsha kolo, utshaki ololo; ukimo ehedia aye, ukaki amenyi fono ketshi. Undu we ayokolamela mpumoka lukulu lʼolo.

²⁸Akambu aso tshe wakashidiyama le khumʼekanga Nebukadineza.

²⁹Lʼokongo a ngondo dikumi la hyendi, khumʼekanga aketetaka lu luudu landi la khumʼekanga la Babilona.

³⁰Ndi akatundja diui, akati ati: Aha Babilona ka wuki kene, kakamahiki dia dihuli dia khumʼekanga mbidjase, uma lu wulu wa khudu kami, ndu ne dia lutumbu la wuki ami?

³¹Kamʼakateketaka khumʼekanga, diui diakayi uma lʼulungu ati: We khumʼekanga Nebukadineza, lambukutela nti: Diulelu diambumo uma le ye.

³²Wayukutshanya uma lʼatei wʼantu, ku we ayudjase kame la nyama ya lʼusui; wayukuleshaka adiyu uku ngombe, osoku tena esambeli diayukulekana, edja ndu we ambulimbitela wati: KhumʼUlungu kuledi lu diulelu diʼantu, la ndi atudishaka one lalangandi disha.

³³Ku etena kako, diui diako diakashidiyama le Nebukadineza. Wakawutshanya uma lʼatei wʼantu. Ndi akalekaka adiyu uku ngombe; dimba diandi diakaloyamaka la lopopo lʼuma lʼulungu, edja ndu divu diandi diakadwanela uku sala ya pungu, la kala yandi uku ya fudu.

³⁴Lamʼaketi etena kako dimi, Nebukadineza, lakedia ashu utsha lʼulungu, ku lakayala la yimba ntu. Dimi lakatumbula KhumʼUlungu, lakandula ndu lakalemia one latulumbaka pundju. Ne dia diulelu diandi, dieli dia pundju, Diayuyalaka lu nonga la nonga.

³⁵Antu wa la kete tshe Weko paka anyanya lu ashu andi. Ndi atutshaka uku alangandi lʼatei wʼului wa lʼulungu Ndu lʼatei wʼantu va la kete. Ku nduku leya nshimba lunya landi, Kana mbumbula ati: Katshaye na?

³⁶Lu etena kako, yimba yakakalula, ndu lutumbu la diulelu diami, wuki ami, la nemo diami diakakalula le mi. Andaki ami la dihangamendi diami wakayakaka le mi. Dimi lakashikikala lu diulelu diami ntu, la wuki ami wakatekoyaka mpama.

³⁷Kakiane dimi, Nebukadineza, lambandula, lambutumbula ndu lambolemia khumʼekanga ka lʼulungu, ne dia elimu andi tshe weko ololo, la mbuka yandi yeko esimboki. Ndi mbeyaka nkitshakitsha waku watokendakendaka la utaku.