Read tetala Danyele 5 Bible Online

Danyele 5 - tetala bible

Danyele 5

¹Khumʼekanga Beleshaza akakatela dihangamendi diandi kinunu dambu dia wuki. Ku ndi akano wanu la ntundu kawo.

²Lamʼakunganela Beleshaza wanu, ndi akati dia vo mbela akoho wa paunyi la wa fesa wakatoshi Nebukadineza, shi, uma lʼetemwelo ka la Jerusalema, dia ndi la dihangamendi diandi, wadiendi, la esika andi no wanu uma loko.

³Vo wakela akoho wa paunyi, wakawatosa lʼetemwelo uma lu luudu la Unyashungu la Jerusalema. Ku khumʼekanga la dihangamendi diandi, wadiendi la esika andi wakano wanu uma loko.

⁴Vo wakano wanu, wakandula ditemolatemola dia paunyi, dia fesa, diʼehotela, dia mbulu, diʼetamba la diʼave.

⁵Lu etena kako, pita ya lunya lʼuntu yakene, yakafundi ladiku dia pembe ka lʼeheli ka luudu la khumʼekanga, lu welelo wʼekitshelu ka tala. Khumʼekanga akenyi etenyi ka lunya kafu da.

⁶Ku elundji ka khumʼekanga kakakadimo, tukanyi tandi takohenyahenya, pelohelo diandi diakashili wulu, adui andi wakasakana.

⁷Khumʼekanga akahangohango wulu dia vo nteta akanga wʼaloho, asi Kaladiya, la ambeyi wʼakambu wa lʼulungu. Khumʼekanga akatela asi yimba wa lu Babilona ati: Untu tshe layala efundelu kene la nimbitshiyami kitshimudi yato, ayolotshama ahondo wa nemo wa tilili, la molola wa paunyi lu kingu. Ndi ayuyala lu dihuli dia satu lu diulelu.

⁸Akanga a yimba tshe wa khumʼekanga wakayi, keli vo kumbeya mbala efundelu kako, kuyanga nimbitshiya khumʼekanga kitshimudi yato.

⁹Ku khumʼekanga Beleshaza akatamanya mbuka woma. Elundji kandi kakakadimo, ndu dihangamendi diandi wakakanana.

¹⁰Uma lu aui wa khumʼekanga la dihangamendi diandi mbakoto wadi a khumʼekanga lu luudu la dambu. Ku wadi a khumʼekanga akati ati: Khumʼekanga li! ulumoaki pundju! tukanyi taye tatukohenyahenyaki; elundji kaye takadimoki.

¹¹Untu omotshi eko lu diulelu diaye, leli la nyuma ka ditemolatemola diʼekila. Lu nshi ya sho, wakatanaka usasi, ewu la yimba, yedimi la yimba ya ditemolatemola le ndi. Khumʼekanga Nebukadineza, sho, akawudji olombodi wʼakanga wʼaloho, asaki wʼawulu, asi Kaladiya, la ambeyi wʼakambu wa lʼulungu.

¹²Vo wakatani nyuma kuleki ololo, ewu, yimba, wulu wa nimbitshiya alo, wa nshihudia aui wushami la wa nshihudia akambu wʼukandukandu le Danyele, latetaka khumʼekanga ati: Beleteshaza. Okone eti Danyele, ku ndi ayukulimbitshiya kitshimudi ya efundelu kako.

¹³Ku wakela Danyele la ntundu ka khumʼekanga. Khumʼekanga akawumbula ati: We keli Danyele, ako leli fumbi kemotshi lʼatei a fumbi yʼuma la Juda, yakela papa, khumʼekanga, uma la Juda?

¹⁴Dimi lakuki lukumu lu dikambu diaye ati: Nyuma ka ditemolatemola keko le ye, ndu ati: Watutanaka usasi, ewu la yimba yuleki le ye.

¹⁵Vo wakela asi yimba la asaki wʼawulu la ntundu kami, dia vo mbalelami efundelu kene la nimbitshiyami kitshimudi yato. Keli vo kumbeya nimbitshiyamito.

¹⁶Ku dimi lakuki vati: We kateyaka nimbitshiya antu tukitshimudi, la nshihudia akambu wʼukandukandu. Kakiane, naka we ayeya mbala efundelu kene la nimbitshiyami kitshimudi yato, we ayolotshama ahondo wa nemo wa tilili, la molola wa paunyi lu kingu, la we ayuyala untu la satu lu diulelu.

¹⁷Ku Danyele akakaluya khumʼekanga diui ati: Ukimeli eshasha aye, usha antu akina weedi aye. Keli dimi, layukalela we khumʼekanga efundelu kene, ndu layukulimbitshiya kitshimudi yato.

¹⁸Khumʼekanga li, Unyashungu KhumʼUlungu akasha sho Nebukadineza diulelu, nemo, lutumbu, la wuki.

¹⁹Uma lu wuki ako wakandawusha, ku antu tshe, wedja tshe, la antu wʼeteketa tshe wakawukaka woma, wakadidimaka la ntundu kandi. Ndi akadiakaka wane wakandalangi ndjaka, akatshikaka wane wakandalangaka ntshika la lumu. Ndi akambiyaka wane wakandalangaka mumbiya, akakitshakitshaka wane wakandalangaka nkitshakitsha.

²⁰Keli lamʼakandayambiya lʼutema, ndu lamʼakakeketala utema andi lu akambu wa utaku, ndi akanyema uma lu kiti kandi ka diulelu, akahotwama lutumbu landi.

²¹Wakawutshanya uma lʼatei wʼantu. Utema andi akayala uku wa nyama, la ndi akadjase lʼatei a fumbo; wakuleshaka adiyu uku ngombe. Dimba diandi diakaloyamaka la lopopo lʼuma alungu, edja ndu ndi akalimbitela ati: KhumʼUlungu Unyashungu kuledi lu diulelu diʼantu, la ndi atudishaka one lalangandi disha.

²²Keli we onʼandi Beleshaza, kuyanga we akeyi akambu aso tshe, we kundjala la ndjakitshakitsha.

²³Keli we akayambiya dia nsemanela la khumi ka lʼulungu. Vo wakela akoho wʼuma lu luudu landi la ntundu kaye. Ku we la dihangamendi diaye, wadieye la esika aye nyakano wanu uma loko. We akandula ditemolatemola dia fesa, dia paunyi, diʼehotela, dia mbulu, diʼetamba la diʼave diahenyi, diahuki, diaheyi nduku engo. We kuntumbula Unyashungu lukimedi lumu laye, la mbuka yaye tshe lu anyʼandi.

²⁴Uma lu dikambu so, mbakandatumi etenyi ka lunya kakafundji efundelu kene.

²⁵Efundelu kufundami kene: MENE, MENE, TEKELE, PARASINA.

²⁶Lanʼeli kitshimudi yʼefundelu kako: MENE: Unyashungu ambala diulelu diaye, ambudikumiya.

²⁷TEKELE: We ambedikama lu kilo, ambutanema usadi saa.

²⁸PERESE: Diulelu diaye diambukahanyema, ndu diambukimwama le asi Mediya la le asi Peresiya.

²⁹Beleshaza akati diui, ku wakalotsha Danyele dihondo dia nemo dia tilili, wakawudji molola wa paunyi lu kingu, wakadianganya diui dia ndi ndjala lu dihuli dia satu lu diulelu.

³⁰Lʼutshu wa lushi lako, mbakawadiaki Beleshaza, khumʼekanga kʼasi Kaladiya.

³¹Ku Dariyo, usi Mediya, akose diulelu. Laso ndi aki la deku lasuki la akumi asamalu la pendi.