Read tetala Danyele 6 Bible Online

Danyele 6 - tetala bible

Danyele 6

¹Dariyo akangenangena dia nkitsha elohe lukama la akumi ahendi lu diulelu diandi tshe, dia mbulela wudja.

²Ndi akakitsha ewandji esatu ladiku diawo. Danyele aki otoi lʼatei awo, dia elohe ako mbalaka la wo diango, ne dia khumʼekanga atukushisha dimotshi.

³Danyele aki la nemo ndeka ewandji la elohe, ne dia nyuma kuleki ololo kaki la ndi. Okone khumʼekanga akakanaka dia mbukitsha la diku dia diulelu tshe.

⁴Ewandji la elohe wakatayangaka Danyele la dikambu dia mbufunda lu akambu wa diulelu. Keli vo kumbutana nduku la dikambu kana munga ka mbufunda, ne dia ndi aki la kolamelu. Vo kumbena la munga kuyanga la kiambukambu.

⁵Keli antu ako wakati vati: Shu hateyi ntana nduku dikambu dia nfunda Danyele, tshikima lu elembe wa Unyashungu andi, kukukisu ditana.

⁶Ku ewandji la elohe ako wakasangana la ntundu ka khumʼekanga; wakawutela vati: Khumʼekanga Dariyo, ulumbaki pundju!

⁷Ewandji tshe wa lu diulelu, ete wa wudja, elohe, andaki la embuledi wa beke, wakasangi lulimi dia khumʼekanga mbidjanga didjangu, la dishikike wulu ati: Untu tshe lʼatei a nshi akumi asatu, layotemola etemolatemola kemotshi kana untu ukina, laha we, we khumʼekanga, ndi kakadjemi lu difuku dia tambwe.

⁸Kakiane we khumʼekanga, ushikike didjangu, ufundi lukumbu laye loko diaha dio nkadimo, uku elembe wʼasi Mediya la wʼasi Peresiya, wahatukadimoka.

⁹Okone khumʼekanga Dariyo akashikike olembe, akafundi lukumbu landi loko.

¹⁰Lamʼakeyi Danyele ati: Khumʼekanga akafundji lukumbu landi lu didjangu, ndi akatshu utsha la luudu landi, lenʼaki adidishi wa luudu landi la mbetama la ladiku hwe, lu leke lʼutsha la Jerusalema. Ndi akakhuseka adui tena satu la lushi la lushi, akalombaka Unyashungu andi, akawukaka lusaka, uku akandatshaka ntundu.

¹¹Ku antu ako wakasangana, wakatani Danyele atemola la alomba Unyashungu andi.

¹²Ku vo wakatshu la ntundu ka khumʼekanga, wakatuwutela lu dikambu dia didjangu vati: Ai, khumʼekanga! We kunfunda lukumbu laye lu didjangu ati: Untu tshe lʼatei a nshi akumi asatu, layotemola etemolatemola kemotshi, kana untu ukina, laha we, we khumʼekanga, ayukadjema lu difuku dia tambwe? Khumʼekanga akakaluya diui ati: Osoku mbedio, uku elembe wʼasi Midiya ndu wʼasi Peresiya, wahatukadimoka.

¹³Vo wakatela khumʼekanga vati: Danyele ako, fumbi kemotshi kʼuma lʼatei a fumbi yʼuma la Juda, heyi diaye, we khumʼekanga, kuyanga dia didjangu diakayafundi lukumbu. Ndi atolombaka tena satu la lushi la lushi.

¹⁴Lamʼakuki khumʼekanga aui aso, ndi akanyangi efula. Ndi akakani lʼutema dia mpandja Danyele. Okone ndi akahimbi wulu dia mbushimbela edja ndu lamʼakadji unya.

¹⁵Ku antu ako wakasangana la ntundu ka khumʼekanga, wakawutela vati: Khumʼekanga li! uho olembe wʼasi Mediya, la asi Peresiya, one ati: Olembe tshe kana didjangu tshe dimbushikike khumʼekanga, hadiutukadimoka pundju.

¹⁶Ku khumʼekanga akati diui dia vo mbela Danyele la mbukadja lu difuku dia tambwe. Khumʼekanga akatela Danyele ati: Unyashungu aye, latuyotemolaka tena tshe, akushimbeli.

¹⁷Wakela dive, wakadife lʼunyo a difuku. Khumʼekanga akadimate lohete landi la pete ya dihangamendi diandi, diaha nduku diui nkadimo lu dikambu dia Danyele.

¹⁸Lʼokongo diku, khumʼekanga akoto lu luudu landi, akakili ma utshu tshe. Ndi kumbetawo nduku dikambu diukuki mbongenyangenya nsukana la ndi. Ndi akalali ungundu.

¹⁹Ku khumʼekanga aketo kʼolomo la pindju, akatshu esadi utsha la difuku dia tambwe.

²⁰Lamʼakandasukana la difuku diaki Danyele, ndi aketi Danyele la diui dia lunyangu ati: Danyele li! we ukambi a Unyashungu a lumu, undi, Unyashungu aye, latuyotemolaka tena tshe, akeyi nkushimbela uma le tambwe?

²¹Ku Danyele akakaluya khumʼekanga diui ati: Khumʼekanga, ulumbaki pundju!

²²Unyashungu ami akatumi ondjelo andi, akadihi enyo wa tambwe. Yo hayuntshedi nduku dikambu, ne dia dimi lakatanemi aha la unungu la ntundu kandi, ndu dimi kuntsha nduku dikambu dia kolo la ntundu kaye.

²³Ku khumʼekanga akangenangena efula, akatela antu dia vo ntundja Danyele uma lu difuku. Ku wakatundja Danyele uma lu difuku, vo kuntana nduku hyunu lu dimba diandi, ne dia ndi akekamaka Unyashungu andi.

²⁴Khumʼekanga akati diui dia vo mbela antu ako wakafundi Danyele, ku wakayuwakadja lu difuku dia tambwe, vo, la wadiewo la anʼawo. Ntundu vo watakumi lʼesi a difuku, tambwe yakawandi, yakatetshatetsha weka awo.

²⁵Khumʼekanga Dariyo akafundela antu tshe, wedja tshe, la antu wʼeteketa tshe wa lu kete tshe mukanda ati: Ki kuleki kayali le nyu!

²⁶Dimi lambudja didjangu nti: Lʼatei a diulelu diami tshe antu wukaki Unyashungu a Danyele woma, wadidimaki la ntundu kandi, Ne dia ndi keli Unyashungu a lumu, latulumbaka pundju, Ndu lukhumʼekanga landi halushilaki pundju.

²⁷Ndi katutshungulaka ndu katushimbelaka. Ndi katutshaka tulimbitelu ta waki La akambu wa mamba lʼulungu ndu la kete. Ndi kakashimbedi Danyele uma lu wulu wa tambwe.

²⁸Danyele akangone lu nshi ya diulelu dia Dariyo, ndu lu nshi ya diulelu dia Kuro, usi Peresiya.