Read tetala Danyele 7 Bible Online

Danyele 7 - tetala bible

Danyele 7

¹Lʼeleku ka ntundu ka diulelu dia Beleshaza, khumʼekanga ka Babilona, Danyele akenyi do la waenelo lamʼakindi lu mbetu kandi. Ku ndi akafundi do diako, akati akambu wa waki waki loko.

²Danyele akati ati: Lamʼakamendaka lu enelo lʼutshu, lakenyi pepe nyei yʼuma lʼulungu yapepa ladiku dia ashi a waki, Mediteraneya.

³Nyama nyei ya waki yutshikitanyi yakayatumbaka uma lu ashi.[3]

⁴Kene ka ntundu kakafanyi la tambwe. To kaki la ahafu wa pungu. Ku lamʼakamakiendaka, wakahatula ahafu ato, wakakiunyiya uma la kete, wakakiemadia lu ekulu ebendi uku untu, wakakisha utema wʼuntu.

⁵Menyi ku nyama ka hendi kufanyi la laundu kene. To kakasungukala lu luhandju lomotshi. To kaki la weka esatu wa luhandju lʼunyo lʼasa wanyu. Wakakitela vati: Unela, uli emunyi efula.

⁶Lʼokongo diku, lamʼakamendaka, menyi ku nyama kekina kufanyi la koi kene. To kaki la ahafu anei uku fudu lʼokongo ato. Nyama kako kaki la ete enei; wakakisha luwandji.[4]

⁷Lamʼakimi lu menda lu waenelo lʼutshu, menyi ku nyama ka nei ka mamba, ka woma ndu kaki la wulu waheyama kene. To kaki la wanyu wa mbulu. To kakali, kakawediawedia, ndu kakahotshahotsha atshikadi lʼekulu. To kakatshikitanyi la nyama ya ntundu tshe, ndu kaki la seki dikumi.[5]

⁸Lamʼakamashishimaka seki yako, menyi ku luseki lukina la tshitshe lone layatumbi lʼatei ayo. Ku seki shatu yʼuma lʼatei a seki ya ntundu yakungo umaka atshina ayo. Menyi ku luseki lako la ashu uku ashu wʼuntu, ndu la unyo wakataka akambu wa utaku lone.[6]

⁹Lamʼakimi lu menda, Wakakitshaka kiti ya waulelu,[7] Ku tangu andja akadjase. Eloto andi waki wema uku pembe, La divu dia lʼote andi uku diosa diʼekoko dia pudipudi.[8] Kiti kandi ka diulelu kaki nyumbi ya dja, La etshimbi ato uku dja yadikita.

¹⁰Okedi wa dja wakafukofukoka, Wakakelaka la ntandu kandi; Nunu nunu wakukambelaka ulimu, La nunu akumi akumi wakemalaka la ntundu kandi.[9] Embadi wakadjase lu elumbwelu, wakafula abuku.[10]

¹¹Etena kako dimi laki lu menda, ne dia aui wa kashi wakataka luseki lako. Lamʼakamendaka nyaraa kako, to kakadiakema. Dimba diato diakalanyema, ndu diakakimwama dia ntshumbama lu dja.

¹²Wakahotola nyama kina waulelu ayo, keli wakayitshiki la lumu edja ndu etena kemotshi.

¹³Lamʼakamendaka lu waenelo lʼutshu, Menyi ku one lufanyi la onʼa untu Ayayi lu wangi wa lʼulungu.[11] Ndi akayi uya le Tangu Andja, Ku wakayuweme la ntundu kandi.

¹⁴Wakawusha luwandji, lutumbu, La diulelu dia antu tshe, wedja, La antu wʼeteketa tshe ndjala lʼokongo andi.[12] Luwandji landi, leli luwandji la pundju, lahashilaki. La diulelu diandi, hadiulanyemaki pundju.

¹⁵Dimi Danyele laki la lunyangu la wulu lʼutema, la waenelo wa lu tukanyi tami wakambati asulu.

¹⁶Dimi lakasukana le otoi omotshi a wane waki leko, ku lakolombe dia ndi nimbitshiyami akambu ane tshe;

¹⁷akanimbitshiya kitshimudi yawo ati: Nyama ya waki nyei ku, yeli khumi ya dikanga nyei yayunela la kete.

¹⁸Keli ekilami wa KhumʼUlungu wayulungula diulelu, wayuyala akanga adio pundju, pundju.[13]

¹⁹Lʼokongo diku, dimi lakalangi nimbitela akambu wa nyama ka nei kakatshikitanyi la kina tshe, kaki woma wa mamba, kaki la wanyu wa mbulu, la kala yʼehotela; kakalekaka, kakatetshatetshaka, ndu kakahotshahotshaka atshikadi lʼekulu.

²⁰Dimi lakalangi nimbitela akambu wa seki dikumi yaki lʼote ato; ndu wa luseki lukina lakatumbi, lakako seki shatu lʼatei ayo la ntundu kalo, luseki laki la ashu la unyo wakateketaka akambu wa mamba, ndu lakafani uku lo mbakaleki kina wuki.

²¹Dimi lakenyi luseki lako laiosha ekilami, ku lo lakalembia.[14]

²²Edja ndu lamʼakayi Tangu Andja dia ndjusambula akambu wʼekilami wa KhumʼUlungu,[15] edja ndu lamʼakayala ekilami akanga a diulelu.

²³Ku ndi akamvutela ati: Nyama ka nei keli diulelu dia nei, Diayuyala lu kete, diutshikitanyi la waulelu akina tshe. Dio diayumana kete tshe, Diayuyihotshahotsha ndu diayudiudia.

²⁴Seki dikumi, yeli khumi ya dikanga dikumi, Yayunela lu diulelu ne.[16] Ku khumʼekanga kekina kayunela lʼokongo awo, Ndi ayutshikitana la ya ntundu, Ayulembia khumi ya dikanga shatu.

²⁵Ndi ayoteketa aui wa nsemanela la KhumʼUlungu, Ayuhekuya ekilami wa KhumʼUlungu. Ndi ayulungamela nkadimula tena la elembe. Ku ekilami wayukimwama lʼanya andi etena kemotshi, Tena pendi, etenyi ka hendi kʼetena.[17]

²⁶Keli elumbwelu kayuya, Wayuhotola luwandji landi. Lo layulanyema, layushila pundju.

²⁷Ku diulelu, luwandji, La wuki a waulelu weli lʼesi ulungu tshe, Wayukimwama le wudja wʼekilami wa KhumʼUlungu.[18] Diulelu diawo, dieli diulelu dia pundju,[19] La ambuledi tshe wayuyala lʼokongo awo, Ndu wayakitanyiaka.

²⁸Ekumelu kʼakambu tshe keso. Dimi, Danyele, lakahenyahenyama wulu lu tukanyi. Elundji kami kakakadimo, keli dimi lakalami akambu ane lʼutema.