Read tetala Hosea 5 Bible Online

Hosea 5 - tetala bible

Hosea 5

¹Nvu elombodi, nyulungi dikambu ne! Nyu khumbu ka Isariyele, nyuhukami! Nyu wa lu luudu la khumʼekanga, nyuhuke tui! Elumbwelu kene kambuya le nyu, Ne dia nyu nyaki utamba a ntakanya la Mizipa, la otei wambemi la Tabora.

²Atemboki wambuleka ndjaotshiya lu kolo Uma lu elambu awo wa ndjaka nyama, Keli dimi layahangwela vo tshe.

³Dimi keyaka, we Efarayima; Ndu we Isariyele, hambishama. Ne dia kakiane we, Efarayima, ambotemola dikishi; Ndu we, Isariyele, ambuyasuwula.

⁴Etsha awo mbashimbaka dia vo nkalula le Unyashungu awo, Ne dia saki ka ntemola ditemolatemola keko le wo; La vo hawulimbitela Latuyalaka.

⁵Utaku wa Isariyele wambuyala omenyi lu dikambu diawo. Okone Efarayima ayoko la uhedia awo, Ndu Juda wayoko kame la wo.

⁶Vo wayutsho la ekoko awo la ngombe yawo. La ntuyanga Latuyalaka, keli vo hawuwutana, Ne dia ndi akamo uma lʼatei awo.

⁷Vo wakahendwela Latuyalaka, Ne dia va wakuti ana wa luseka. Ku kakiane, yalelu ya ngondo yayashila, Ndu vo ndu diango diawo ushiki.

⁸Nyudi dimama la Ngibeya la pungi la Rama, Nyudi tukuku ia Rete-Avena, dia mbutsha Bendjamina woma.

⁹Efarayima ayulanyema lu lushi lʼasui. Dimi lambushila mvutela wudja wa Isariyele akambu wa mete.

¹⁰Ewandji wa Juda weko uku waku watosekolaka elelu. Dimi layatshulwela ududu ami uku ashi.

¹¹Efarayima ambusuyama, ambohotshahotshama lʼelumbwelu, Ne dia ndi akangenangena dia ndjela akambu wʼanyanya.

¹²Diako mbamumuyala uku lumbudi le Efarayima, Ndu uku engo kambohonda le khumbu ka Juda.

¹³Lamʼakenyi Efarayima hemo kandi, La Juda puta kandi, Ku Efarayima akatshu utsha la Asuriya; Ndi akatumi akendji le khumʼekanga ka wuki. Keli ndi kema la wulu wa nyokonya, Kuyanga nkonoya puta yanyu.

¹⁴Dimi layuyala uku tambwe le Efarayima, Ndu uku osongo a tambwe le khumbu ka Juda. Dimi dime layuwatshatsha, ku layumo. Dimi layemba engo kakamandji ku nduku layompotolato.

¹⁵Dimi layumo, layukalula lu dihuli diami ntu, Edja ndu lamʼayuwushula kolo yawo, Edja ndu lamʼayuwuyanga elundji kami. Lu nshi yawo yʼasui, vo wayunyanga lʼutema otoi vati: