Read tetala Hosea 8 Bible Online

Hosea 8 - tetala bible

Hosea 8

¹Umami dimama lu elomo aye, Ne dia eki kambuya ladiku dia luudu la Latuyalaka, Ne dia antu wakadiaki sheki yami, Ndu wakahedia elembe ami.

²Vo wayundelela vati: Unyashungu asu, shu, asi Isariyele, nkeyaka.

³Isariyele akatuni kene keli ololo; utunyi ayuyelana la wo.

⁴Vo wakayadjela khumi ya dikanga, keli aha uma lu diui diami Wakayasonwela ewandji, keli aha uma lu lulangu lami. Vo wakayatshela dikishi la fesa yawo la paunyi yawo, Diako mbayuwushila ushiki.

⁵Dimi Latuyalaka lakatuni efanelu kanyu ka ngombe, nyu asi Samariya. Kele kami kakafulanela le nyu. Edja ndu etena kakona kayunyediama lu Isariyele?

⁶Utshudi kakatshi efanelu ka ngombe; to kema Unyashungu. Diako mbayatshatshema efanelu ka ngombe ka Samariya betshi betshi.

⁷Vo wakune lopepe, wayuna punganendji. Epunga hawuyala la washa, One wayombola, hawudja ashi. Utuwudja ashi, tshiki angendangenda mbutole.

⁸Isariyele ambulanyema; Kakiane vo wambuyala uku puki kʼanyanya lʼatei a wedja,

⁹Ne dia vo wakatshu utsha la Asuriya, Uku atetolaka mangana amakina. Efarayima akakimo eshasha dia nkundja engenyi.

¹⁰Kuyanga vo watukimoka eshasha le wedja, Kakiane, dimi lutsha mbasanganya. Ku vo wayutukuyala la lunyangu, Ne dia wutshu wa khumʼekanga kʼewandji.

¹¹Efarayima akafudia diakelu dia ntsha kolo; Diakelu diako diatasukuyaka dia ntsha kolo.

¹²Utumafundela akambu nunu dikumi wʼelembe ami, Vo wayutuyala uku engo kʼanyanya le wo.

¹³Vo watudiakaka nyama yatuwunambulaka, Watolekaka emunyi ayo, Keli dimi, Latuyalaka, hatuyetawoka. Kakiane dimi Latuyalaka, lamtuho dia kolo kawo. Dimi layasuya ne dia kolo yawo. Vo wayukalula lʼEdjibitu,

¹⁴Ne dia Isariyele wakuhela Utungi awo, Wakayahikela temwelo Juda akafudia esumba wudingami kumbu ya wulu, Keli dimi layutuma dja lʼusumba awo. Yo yayutshumba mvudu ya khumi ya dikanga yeli loko.