Read tetala Hosea 9 Bible Online

Hosea 9 - tetala bible

Hosea 9

¹Isariyele, tongenangenaki, Tulekaki ngenangena uku wedja ekina, Ne dia we akatemola dikishi, akaseke Unyashungu aye. We akalangi difutu dia mindu Lu anuli tshe wʼesuswelu kʼepunga.

²Dihuli diʼesuswelu la diʼehinelu kʼelua hadiuwalesha, Ndu ashi wʼelua wayuhumbama.

³Vo hawutshikala lu kete ya Latuyalaka. Efarayima wayukalula lu Edjibitu. Ku vo wayutole mbu ya ude ya mindu lu Asuriya.

⁴Vo hawulambula Latuyalaka elambu wa lutela a wanu. Vo haweyi mbangenyangenya la elambu awo. Elambu awo wayuyala le wo uku ma diʼutanda. Wane tshe wayudile, wayuyalanya, Ne dia ma diawo diayuyala paka dikambu diawo vame. Dio hadioto lu luudu la Latuyalaka.

⁵Kayunyutsha lushi la dambu diʼekila, Ndu lushi la dambu dia Latuyalaka?

⁶Vo wambunela lu dikambu diʼelanyelu. Edjibitu ayalungula, asi Memifisi wayakhunde, Adungu wayukita diango diawo dia fesa diʼushinga wulu, La atende wayutumba lu mvudu yawo yʼepema.

⁷Nshi yʼasui yambukuka,[11] nshi yʼesombweyo yambuya. Isariyele utsha mbeya dikambu so. Umvutshi eko enginya, La one leya akambu wushami eko kanga dadi, Ne dia wuki wa kolo yanyu, la wa luhetshu lanyu.

⁸Umvutshi eli ulami wa Efarayima kame la Unyashungu ami, Keli tulunga ta umambi teko lu mbuka yandi tshe, La luhetshu lu luudu la Unyashungu andi.

⁹Vo wakayalanya efula, uku lu lushi la Ngibeya.[12] Latuyalaka ayuho uhedia awo, Ayasuya ne dia kolo yawo.

¹⁰Dimi lakatani Isariyele Uku sandji oiʼelua wa vinyo lʼusui wa shenga. Dimi lakenyi washenyu Uku elua wa ntundu wʼutamba wa fingu, Keli vo wakatshu utsha le Bala-Peore.[13] Vo wakatuyakidia le ekishi ka sonyi, Ku wakayala wononyi uku engo kakawalangaka.

¹¹Lutumbu la Efarayima layufumbo uku fudu. Eutwelu kʼona, diemi kuyanga etshwelu ka diemi hawuyala ntu.

¹²Kuyanga vo wayudia anʼawo, Dimi layahotolawo, Edja ndu nduku otoi ayutshikala. Mananu kayali le wo lamʼayumaseka.

¹³Dimi lakenyi ana apami wa Efarayima Wambosonwama dia dia ndjakema. Efarayima ayolombola anʼandi utsha le undjaki.

¹⁴Latuyalaka li, uwasha! Kayuyuwasha na? Uwasha atapa watutundjaka waemi, Umia awele lu tulu yawo.

¹⁵Kolo yawo tshe yatenamaka la Ngilingala. Leko kamatatela mbahetsha; Ne dia kolo katshawo, mbayumuwatshanya uma lu luudu lami. Dimi handjuwauka ngandji ntu; Ewandji awo tshe weli akanga wʼuhendudi.

¹⁶Efarayima ambokotama; Ediu awo wambuma; Vo hawuyoto elua. Kuyanga vo wayuta, dimi layudiaka anʼawo wa ngandji.

¹⁷Unyashungu ami ayuwakadja ne dia vo kumbukela. Vo wayuyala tekeko lʼatei a wedja.