Read tetala Joele 1 Bible Online

Joele 1 - tetala bible

Joele 1

¹Diui dia Latuyalaka diakayi le Joele, Onʼa Petuele, ati:

²Nyu esumbi, nyulungi dikambu ne, Nyu antu wudjashi lu kete, nyuhuke atui! Undi, dikambu dia wuhu one diakatshama lu nshi yanyu kana lu nshi ya washenyu uka?

³Nyusanyia anʼanyu dikambu ne, la vo kawudisanyia lolonga lukina.

⁴Kene kakatshiki ondjo wʼanganga, Ondjo wa tufumu wakali. Kene kakatshiki ondjo wa tufumu, Waomoi a dikita wakali; La kene kakatshiki waomoi a dikita, eto wakali.

⁵Nyu ambidjoki, nyemo, nyuleli; Nyu anoshi a wanu, nyudi tukuku lu dikambu diʼashi wʼelua, Ne dia vo wambunyama uma lʼenyo anyu.

⁶Wudja omotshi wakayi dia ndjolosha kete yami, Wudja ako weko ndu la antu efula waheyama mbala. Anya awo weli uku wa tambwe kʼumi[1] Songo ya wanyu awo, yeli uku ya tambwe ka wadi.

⁷Vo wakalanya ekodi ami wa vinyo, Wakatshatsha etamba ami wa fingu. Vo wakaweuwula, wakawekadja; Tahi yawo yakayala wema.

⁸Nyuleli uku usekaseka wʼemuma wolotshi dikutu Dia ndela osonami andi wa nshi yandi yʼusekaseka.

⁹Elambu wa shima la elambu wa lutela wambunyema Uma lu luudu la Latuyalaka. Elombedi, ekambi wa Latuyalaka, waya lʼutanda.

¹⁰Dikambo diambulanyema, kete yaya lʼutanda, Ne dia epunga wambulanyema, ashi wʼelua wambuma, iso kambushila.

¹¹Nyu ekambi wa dikambo, nyuleli; Nyu alami wa vinyo, nyate asulu Lu dikambu dia epunga wa menge la wa yelela, Ne dia dinela kema.

¹²Ekodi wa vinyo wambolengela, La etamba wa fingu wambuma. Etamba wa dikomi, atuku, ahamvu, Etamba tshe wa lu dikambo, wambuma; Ndu ongenongeno wambushila lʼetema wʼantu.

¹³Nyu elombedi, nyolote akutu, nyuleli; Nyu ekambi wa lʼediakelu, nyudi tukuku. Nyu ekambi wa Unyashungu ami, nyuyi, Nyuhutuya unya lʼakutu lu kindi, Ne dia elambu wa shima la wa lutela hawenama ntu Lu luudu la Unyashungu anyu.

¹⁴Nyuyakidia lʼekilelu ka mbu ya nde, Nyudianganya lukumu dia lusanganya lʼekila. Nyusanganya dihangamendi la antu tshe wa lu wudja Lu luudu la Latuyalaka, Unyashungu anyu, Nyuleli le Latuyalaka.

¹⁵Hai! ndi lushi li! Ne dia lushi la Latuyalaka laya suki, Lo lambuya uku elanyelu kʼuma le Kanga-Wulu-Tshe.[2]

¹⁶Mbu ya nde kuminyema uma lu ashu asu, Ongenongeno, la ongenongeno wa wuki Uma lu luudu la Unyashungu asu uka?

¹⁷Wehu wambuma lu kete, apenge wambuyala hwe, La waumbelu wambuhandjo, ne dia epunga kemako.

¹⁸Ndi ndjawi ya nyama li! Nyimba ya ngombe yambukanana, Ne dia adiyu wa nde kema; Nyimba yʼekoko yambena pa.

¹⁹Latuyalaka li, we kalelelami! Ne dia dja yambutshumba adiyu wa lʼusui, La lumbi la dja lambulunguya etamba tshe wa lu dikambo.

²⁰Nyama ya lʼusui yambukawanela, ne dia tokoko tambuma; Dja yambutshumba adiyu wa nde wa lʼusui wa shenga.