Read tetala Amose 3 Bible Online

Amose 3 - tetala bible

Amose 3

¹Nyu asi Isariyele, nyulungi diui ne, Mbakati Latuyalaka lu dikambu dianyu, Lu dikambu dia khumbu tshe kakandatundja Uma lʼEdjibitu ati:

²Dimi lakanyosonola paka nyu nyame Lʼatei a khumbu tshe ya la kete Diako mbayumunyusuya ne dia kolo yanyu tshe.

³Antu ahendi mbeyaka nkendakenda kame, Aha vo ntukanyi uka?

⁴Undi, tambwe mbeyaka ndjikita lʼukunda Lamʼahato la nyama kakatandji? Osongo a tambwe mbeyaka ndela lu wuku ato Lamʼahawandji nduku engo uka?

⁵Fudu mbeyaka ntala la kete lamʼaha djunga? Otei mbeyaka nyukuto la kete Lamʼahandami nduku engo loko?

⁶Vo mbeyaka mvuda dimama lʼatei wʼusumba, Ku antu hawuki woma? Elanyelu mbeyaka ndjala lʼusumba, Naka Latuyalaka hakitumi?

⁷Mete, Khumadiondjo Latuyalaka hatutshaka nduku dikambu, Tshikima ndi ambutashudi dikambu diandi Dia lu usheshe le ekambi andi amvutshi.

⁸Naka tambwe kambudikita, Akona ahuki woma? Khumadiondjo Latuyalaka amboteketa, Akona aheyi mvuta akambu wahatayi?

⁹Nyudianganya lukumu lu mvudu ya khumʼekanga ya la Asuriya, Ndu lu mvudu ya khumʼekanga ya lu kete ya Edjibitu, Nyuti nyati: Nyusangani ladiku diʼekungu wa Samariya; Nyendi ufutanu a wulu weli lʼatei awo, La akambu wa ngala weli loko.

¹⁰Vo haweyi ntsha akambu wʼusimbwi, Mbata Latuyalaka. Vo watuyaumbelaka diango diʼuma lu akambu wa ngala La uvi lu mvudu yawo.

¹¹Diako mbata Khumadiondjo Latuyalaka ati: Utunyi omotshi ayudinga kete yanyu, Ayulanya wulu anyu, Ayuhandjula mvudu yanyu ya khumʼekanga.

¹²Latuyalaka kata ati: Uku atuhatulaka ulami wʼekoko dimba pendi, kana etshi ka tui uma lʼunyo a tambwe, osoku mbayuwuhatula asi Isariyele wudjashi la Samariya, kame la tshuku dia mbetu ndu etenyi ka tangi.

¹³Nyulungi, nyuyali emenyi wa dikambu ne, Mbata Latuyalaka Kanga lulimbilimbi.

¹⁴Lushi layumusuya Isariyele ne dia ehedia awo. Dimi layulanya diakelu dia la Betele.[12] Seki ya lʼediakelu yayuhimbwama, yayoko lu kete.

¹⁵Dimi layuhandjula mvudu yawo ya Lu nshi ya tshitshi, ndu ya lu nshi ya yanyi. Mvudu yʼewanga yayulanyema, Mvudu ya waki hayenama ntu, mbata Latuyalaka.