Read tetala Amose 5 Bible Online

Amose 5 - tetala bible

Amose 5

¹Nyu khumbu ka Isariyele, nyulungi diui ne, Diadami kuku lu dikambu dianyu.

²Usekaseka wʼemuma wa Isariyele amboko, ndi hunela ntu. Ndi ambukalema lu kete yawo, Nduku untu lawetula.

³Khumadiondjo Latuyalaka kata ati: Usumba wakatshu antu kinunu utsha lu ta, Wayutshikala paka antu dikumi tu, Lu khumbu ka Isariyele.

⁴Latuyalaka katela khumbu ka Isariyele ati: Nyunyangi, ku nyu nyayulumba.

⁵Tanyuyangaki Betele, Tanyutshokaki la Ngilingala, Tanyetaki la Bere-Sheba. Mete, Ngilingala ayutsho lu fumbi, La Betele ayutshikala hwe.

⁶Nyuyangi Latuyalaka, ku nyu nyayulumba, Ne dia ndi atukufato uku dja lu luudu la Josefu. Dja yakalutshumbi, ku nduku untu layidima la Betele.

⁷Nyu nyatukadimulaka sambu kʼololo ululu uku kundju; La nyatukadjaka akambu wʼusimbwi la kete.

⁸Nyuyangi one lakatungi “Ana wʼUlui”, “Tshula la Fo la Nyaira” [14] One latukadimulaka dedi dia nyoi pindju, Latukadimulaka yanyi utshu, Latetaka ashi ama lʼashi a wuki, Ndu latatshululaka ladiku dia kete, Latuyalaka keli lukumbu landi.

⁹Ndi katutumelaka akanga a wulu elanyelu shashimuya. Ku elanyelu kako katu tkaka lʼusumba wudingami lukumbu.

¹⁰Vo watutunaka one latuhangwelaka antu la suku, Watukaka one latutaka mete wononyi.

¹¹Okone ne dia nyu nyakakamelakamela usi wula, Nyakose epunga ushasha uma le ndi, Nyu nyakahiki mvudu la ave wa lokolonga, Keli nyu hanyudjase loko Nyu nyakune ekodi wʼololo wa vinyo, Keli nyu hanyono ashi wʼelua awo

¹²Ne dia dimi mbeyaka efula kʼehedia anyu, Ndu wuki wa kolo yanyu Nyu nyatusuyaka untu ololo, Nyatulungulaka mbu yʼutshu, Nyatonyolaka ehumbi la suku.

¹³Diako mbayolembohala, kanga yewu ki lʼetena uku kene, Ne dia to keli etena ka kolo.

¹⁴Nyuyangi ololo, aha kolo, Mbayunyuyala la lulumbi. Ku Latuyalaka, Unyashungu Kanga lulimbilimbi, Ayuyala la nyu uku watanyu.

¹⁵Nyuhetsha kolo, nyulangi ololo, Nyushikike sambu kʼololo la suku, Undu Latuyalaka, Unyashungu Kanga lulimbilimbi, Mbeyaka mbuka atshikadi wa Josefu ketshi.

¹⁶Diako mbata Latuyalaka, Unyashungu Kanga lulimbilimbi, Khumadiondjo ati: Alelu wayuyala lu ahuli tshe. Wayuta lu esese tshe vati: Yee! yee! Vo wayeta ukambi wʼekambo lʼutanda, La Wane watutshimaka djuwa dia ndjulela.

¹⁷Alelu wayuyala lu dikambo tshe dia vinyo, Ne dia dimi layeta lʼatei anyu, Mbata Latuyalaka.

¹⁸Mananu kayali le nyu, Nyu wane watulangaka lushi la Latuyalaka! Okoko wana walangauyu ndjala la lushi la Latuyalaka? La leko udjima, aha usasi.

¹⁹Nyu nyayuyala uku untu latalawo tambwe, Ku ndi ambutuhumana la koi; Kana untu lamboto lu luudu landi, Lambutahe lunya landi lʼeheli, Ku ului ambulumata.

²⁰Lushi la Latuyalaka aha udjima mbelo, kema usasi? Aha udjima a tshududu mbelo, kema ngaingai?

²¹Dimi latuhetshaka, latonyolaka nshi yanyu ya waki. Dimi hatongenangenaka Lu sanganya yanyu ya lukumu.

²²Kuyanga mbanambulanyu Elambu anyu wa lutshumba la elambu anyu wa shima, Dimi haluwetawo; Ndu nyama yanyu yeli la wata, Yanambulanyu elambu wʼeukelu ka lusaka, Dimi haludja ashu leko.[15]

²³Nyuminyia lundju la esambu anyu, Dimi halangi mbuka lundju la sese yanyu.

²⁴Keli sambu kʼololo kakele uku ashi, La akambu wʼusimbwi uku eteko kahumi.

²⁵Undi, nyu khumbu ka Isariyele nyakambela elambu, la elambu wa shima lʼusui wa shenga lʼatei wa deku akumi anei?

²⁶Nyu nyakembe luudu la dipema la khumʼekanga kanyu, la yindju ya difanelu dianyu, yoto ya etemolatemola kanyu, diakanyayatshela.

²⁷Diako mbayumunyotola la wedi wa Damaseke lu fumbi,[16] mbata Latuyalaka, kanga lukumbu lone ati: Unyashungu Kanga lulimbilimbi.