Read tetala Amose 7 Bible Online

Amose 7 - tetala bible

Amose 7

¹7 Khumadiondjo Latuyalaka akamenya dikambu ne. Enda ndi akatungi endjo lʼetena kakatatela diango ntumba, etena kako kaki lʼokongo a dinela dia khumʼekanga.

²Lʼokongo diku lamʼakawashili nde adiyu wa la kete, ku dimi lakati nti: We Khumadiondjo Latuyalaka, udimanyia Jakoba kolo, Mbakosengasengami. Ukundi ayundeya memala? Ndi eko tshitshe!

³Latuyalaka akalembe utema lu dika mbu so; Dio hadiuyala, mbata Latuyalaka.

⁴Khumadiondjo Latuyalaka akamenya enelo kene. Enda, Khumadiondjo Latuyalaka aki lu mbeta antu dia mbalumbuya la dja, ku yo yakatshumbi ohongo a wuki, yaki lu numbialumbia ladiku dia kete.

⁵Ku dimi lakati nti: Khumadiondjo Latuyalaka li, lambukosengasenga nti: Utukukunga! Ukundi ayeya Jakoba memala? Ndi eko tshitshe efula!

⁶Latuyalaka akalembe utema lu dikambu so; Ndu dikambu diako hadiuyala, mbata Latuyalaka.

⁷Ndi akamenya enelo kene. Enda, Khumadiondjo Latuyalaka akemadi lʼumamu wʼeheli kakatshama lʼokodi wa wedikelu. Ndi aki lʼokodi wa wedikelu lu lunya landi.

⁸Latuyalaka akamumbula ati: Amose, kenaye na? Ku dimi lakûkaluya diui nti: Okodi wa wedikelu. Ku Khumadiondjo akati ati: Enda, dimi layukitsha okodi wa wedikelu Lʼatei wa wudja ami Isariyele. Dimi haluwadimanyia ntu pundju.

⁹Alunga wa Isaka wayulanyema, Temwelo dia Isariyele dia; uhandjwama vwa. Dimi layunela dia ndo la khumbu Ka Jeroboama la yombo.

¹⁰Ku Amaziya, olombedi wa la Betele, akatumi diui le Jeroboama, khumʼekanga ka Isariyele, ati: Amose ambukudjela sheki lʼatei a khumbu ka Isariyele, wudja hiwukike aui andi tshe.

¹¹Ne dia Amose akati ati: Jeroboama ayudiakenia la yembo. Mete, Isariyele wayotolama lu fumbi, Etali uma lu kete yawo.

¹²Amaziya akatela Amose ati: We, omenyi wʼakambu wahatayi, utshu, ulawo utsha lu kete ya Juda: utolekaki mi leko, utataka akambu wahatayi leko.

¹³Keli tutaki akambu wahatayi ntu la Betele, ne dia Betele eli etemwelo ka khumʼekanga, ndu luudu la khumʼekanga.

¹⁴Ku Amose akakaluya Amaziya diui ati: Dimi taki umvutshi kuyanga onʼa umvutshi, keli dimi laki ulami wa dungalunga, la umunyi wʼetamba wa khumu.

¹⁵Latuyalaka akambose lamʼakatalamaka ekoko, akamvutela ati: Tshoka, tuteli wudja ami Isariyele akambu wahatayi.

¹⁶Kakiane, ulungi diui dia Latuyalaka. We mvutaka wati: Tutaki akambu wahatayi Lu dikambu dia Isariyele, Ndu tusambishaki nduku diui Lu dikambu dia khumbu ka Isaka.

¹⁷Uma lu dikambu so, mbata Latuyalaka ati: Wadeye ayuyala kanga munanyi lʼusumba. Anʼaye wʼapami la anʼaye wʼamantu Wayudiakema la yombo, La kete yaye yayukahanyema lʼokodi. Weme ayuvo lu kete ya mindu. Mete, Isariyele wayotolama lu fumbi, Etali uma lu kete yawo.