Read tetala Jona 2 Bible Online

Jona 2 - tetala bible

Jona 2

¹Jona akalombe Latuyalaka, Unyashungu andi, lʼutema a lusi.

²Ndi akati ati: Dimi laketi Latuyalaka lu dikambu dia sui diami, Ku ndi akambetawo. Dimi lakaleli lʼUdimu a Pengandu, Ku we akuki diui diami.

³We akambikadja lu ohongo lʼatei wʼashi a waki. Elula kakanyingi lʼutshimba ami, Asukhu aye tshe la afulu aye waketi ladiku diami.

⁴Dimi lakati nti: Dimi lakatshanyema etali uma la ntundu kaye, Keli dimi layenda ntu utsha lʼetemwelo kaye kʼekila.

⁵Ashi wakanyingi edja ndu lu lumu lami. Ohongo waki lʼutshimba ami. Adiyu wa kolo wakakumbi ote ami.

⁶Dimi lakahulo edja ndu lʼatshina wʼekungu, Kete la ekengiti ayo wakankumbi pundju. Keli we Latuyalaka, Unyashungu ami, Akatundja lumu lami uma lu Difuku.

⁷Lamʼakaheko lumu lami la utema ami, Dimi lakakuho, we Latuyalaka. Dombelo diami diakakumi le ye, Pulu ndu lʼetemwelo kaye kʼekila.

⁸Wane watekamaka dikishi diʼanyanya, Watutunaka dihuli diawo dia nkundja ketshi.

⁹Keli dimi layukulambula ulambu La aui wa eukelu ka lusaka. Dimi layufuta kene kakamadji dokoloko. Panda keli uma le ye, we Latuyalaka.

¹⁰Latuyalaka akatela lusi diui, Ku lusi lakatuwo Jona lu kete yʼufumbu.