Read tetala Walelu 10 Bible Online

Walelu 10 - tetala bible

Walelu 10

¹Latuyalaka akatela Mose ati:

²Kutshi amama ahendi, katshi la fesa ka lutshula, dia vo nkukimanyia dia mbetaka antu, ndu dia eunelu kawo.

³Lamʼayuwuwadaka, ului tshe wʼantu kawomotaki la le ye, lʼeotwelo ka luudu lʼesanganelu la dipema.

⁴Keli naka wambuda dimama otoi, ewandji, ete a wauhu wʼasi Isariyele, kawomotaki la le ye.

⁵Lamʼayunyudaka dimama shamanya shamanya, pangu yeli lu leke lʼehutwelu ka unya kayunelaki.

⁶Lamʼayunyudaka dimama shamanya shamanya etena ka hendi, pangu yeli lu leke la diku dia kutshi, kayunelaki. Vo kawudaki amama shamanya shamanya ne dia eunelu kawo.

⁷Kanyudaki amama atutsha, aha shamanya, dia nsanganya antu.

⁸Elombedi, ana apami wʼArona, mbayudaka amama. Edelu kʼamama ayuyala olembe wa pundju le nyu ndu le tukanula tanyu.

⁹Kanyudaki amama shamanya shamanya lamʼatshonyu lu ta lu kete yanyu, dia ntolo la utunyi, latunyusuyaka. Latuyalaka, Unyashungu anyu, ayunyuho, ku nyu nyayushimbamela uma le atunyi anyu.

¹⁰Kanyudaki amama ndu nshi yanyu yʼongenongeno, lu nshi yanyu ya waki, ndu lu talelu tanyu ta ngondo. Lamʼayunyulambulaka elambu anyu wa lutshumba, ndu elambu anyu wa ki, vo wayunyuhwelaka Unyashungu anyu. Dimi keli Latuyalaka, Unyashungu anyu.

¹¹Lu lushi lʼakumi ahendi la ngondo ka hendi, lʼeleku ka hendi, dingi diakamo uma ladiku dia etemwelo ka dipema kʼomenyi.

¹²Asi Isariyele wakatunelaka uma lu pangu la pangu lʼusui wa shenga wa Sinai, ku dingi diakatemala lʼusui wa shenga wa Parana.

¹³Vo wakatatela munela lu etena ka ntundu, uku akadjangela Latuyalaka Mose.

¹⁴Ekuhu ka koi ka pangu kʼasi Juda kakunela ntundu, ku vo wakunela lu elui awo. Nashona, onʼa Aminadaba, aki olombodi awo.

¹⁵Netanele, onʼa Zuara, aki olombodi wa diuhu diʼasi Isakara.

¹⁶Eliyabe, onʼa Helona, aki olombodi wa diuhu diʼasi Zebuluna.

¹⁷Wakahikula etemwelo ka dipema, ku ana apami wʼasika Ngereshona la ana apami wʼasika Merari, wane wakembaka etemwelo ka dipema, wakunela.

¹⁸Ekuhu ka koi ka pangu ka Rubena kakunela ntundu, ku vo wakunela lu elui awo. Elizura, onʼa Shedeure, aki olombodi awo.

¹⁹Shelumiyele, onʼa Zurishadai, aki olombodi wa diuhu diʼasi Simeyona.

²⁰Eliyasafu, onʼa Duele, aki olombodi wa diuhu diʼasi Ngada.

²¹Ku asi Kohota wakunela, watembe diango diʼekila. Ku etemwelo ka dipema kakahikama ntundu vo watakumi.

²²Ekuhu ka koi ka pangu kʼasi Efarayima kakunela, ku vo wakunela lu elui awo. Elishama, onʼa Amihude, aki olombodi awo.

²³Ngamaliyele, onʼa Pedazura, aki olombodi wa diuhu diʼasi Manase.

²⁴Abidana, onʼa Ngidiyoni, aki olombodi wa diuhu diʼasi Bendjamina.

²⁵Ku ekuhu ka koi ka pangu kʼasi Dane kakunela la djihelu, ku vo wakunela lu elui awo, uku ulami wa pangu tshe. Ahiyezere, onʼa Amishadai, aki olombodi awo.

²⁶Pangiyele, onʼa Okarana, aki olombodi wa diuhu diʼasi Ashere.

²⁷Ahira, onʼa Enana, aki olombodi wa diuhu diʼasi Nafetali.

²⁸Osoku mbaki elongelo kʼasi Isariyele, uku elui awo, lamʼakawatunelaka.

²⁹Mose akatela Hobaba, onʼa ukilu andi Ruele, usi Midiyana, ati: Shu teko lu ntatshu lu dihuli diakati Latuyalaka ati: Dimi layunyushadio. Utshu la su, shu tayukutshela ololo, ne dia Latuyalaka akalaki Isariyele akambu wʼololo.

³⁰Ku ndi akûkaluya diui ati: Dimi halutsho; dimi layukalula utsha lu kete yasu, le wane wuto la mi.

³¹Ku Mose akosengasenga ati: Tututshikaki. We keya ahuli wukukisu ntahangaka lʼusui wa shenga, we ayuyala lolombo lasu, kutatolombolaka.

³²Naka we ayutsho la su, shu tayutakutshelaka ololo, wuhu tshe wayutatutshelaka Latuyalaka.

³³Ku vo wakunela uma lu ukungu wa Latuyalaka, wakakendakenda nshi shatu; oshete wa sheki wa Latuyalaka wakatshu la ntundu kawo lokendo la nshi shatu, dia ntayangela dihuli dia vo mumuya.

³⁴Ku dingi dia Latuyalaka diakatshikalaka ladiku diawo la yanyi, lamʼakawatunelaka uma lu pangu.

³⁵Lamʼakunelaka oshete wa sheki, Mose akataka ati: Latuyalaka li, uneli! Atunyi aye wadiangani; wane watukuhetshaka, walawo la ntundu kaye![12]

³⁶Ku lamʼakemala oshete, Mose akataka ati: Latuyalaka li, ukaluli le nunu dikumi dia nunu diʼasi Isariyele.