Read tetala Walelu 11 Bible Online

Walelu 11 - tetala bible

Walelu 11

¹Wudja wakangunanguna, wata aui wa kolo lu atui wa Latuyalaka. Lamʼakawauki Latuyalaka, kele kandi kakahete. Ku dja ya Latuyalaka yakahete lʼatei awo, yakatshumbi kuma motshi ya pangu.

²Ku wudja wakayulelela Mose. Mose akalombe Latuyalaka, ku dja yakadimala.

³Wakole dihuli so vati: Tabera (kitshimudi ati: Etshumbelu), ne dia dja ya Latuyalaka yakahete lʼatei awo.

⁴Akanga a ludju lʼatei wʼasi Isariyele wakakumbula nyama ya nde. Ku ndu asi Isariyele wakaleli ntu, wambwana vati: Ayutusha unatshi wa shu nde?

⁵Shu mbuhoka nsi yakatalekaka lʼEdjibitu olele, ndu sele, amoke, vole, atungulu, la shongo ya mbudi.

⁶Kakiane alimba asu wambonda, nduku engo kekina kʼololo, tshikima mana nye tshu.

⁷Mana akafani la tongo ya sele, ndu yo yaki wema.

⁸Antu wakadianganaka dia ntayitongona, wakayihelaka lu ehelo kana yito lu tuli. Vo wakayikateka lu puki, wakayitshaka ekama. Ku vo wakayalaka lʼunyo uku ekama wosohanyimi la iso.[13]

⁹Lamʼakalokaka lopopo lʼutshimba a pangu lʼutshu, ku mana yakalokaka kame la lo.[14]

¹⁰Mose akuki antu walela lʼatei a khumbu yawo, untu lʼuntu la suku dia luudu landi la dipema. Kele ka Latuyalaka kakahete wulu, ku Mose akanyangi efula.

¹¹Ku ndi akambula Latuyalaka ati: Ukundi ambuyutshela ukambi aye okone na? Okoko wana wakimi kumpumo lukulu lʼolo lu ashu aye, dia we nkitshiyami wutshu wa wudja one tshe?

¹²Bundi, dimi kakatshu diemi dia wudja one tshe? Dimi kakawauti, mbamvutelaye wati: Utawaembaka lu kyundu, uku atembaka ondedi ona laloma, utsha lu kete yakayalaki washewo?

¹³Uma lendi ayumutana unatshi wa mbisha wudja one tshe? Vo ane walela la ntundu kami vati: Utusha unatshi keli tuli!

¹⁴Dime haleyi memba wutshu wa wudja one, ne dia vo wambuleka wutshu efula le mi.

¹⁵Lambukosengasenga nti: Naka dimi lambuhumo lukulu lʼolo lu ashu aye, undjaki, diaha dimi mena elanyelu kami, lu dihuli dia we ntshelami okone.

¹⁶Latuyalaka akatela Mose ati: Usanganya apami akumi esambeli uma lʼatei a dihangamendi dia Isariyele la ntundu kami. Osonole wane weyaye wati: Dikumanyi la elombodi a wedja mbewo. Kuyi la wo la luudu lʼesanganelu la dipema, kawuyemali kame la ye leko.

¹⁷Ku dimi layuhulo dia ndjusawula la nyu leko. Dimi layosa wuhu wa nyuma weli la ye, layuwashato. Ku vo wayembaka la ye wutshu a wudja one, diaha weme mbemba.

¹⁸Kuteli wudja wati: Nyuyakidia dikambu dia lui, nyayole unatshi; ne dia nyu nyakaleli lu atui wa Latuyalaka nyati: Ayutusha unatshi? ne dia takenaka olo lʼEdjibitu. Okone Latuyalaka ayunyusha unatshi, ku nyu nyayuwole.

¹⁹Nyu hanyole lushi otoi, kana nshi hyendi, kana nshi tshanu, kana nshi dikumi, kuyanga nshi akumi ahendi tshu.

²⁰Nyu nyayole utundu wa ngondo tshe, edja ndu unatshi wambutumba lʼehembe, edja ndu vo wambuyala nyomi le nyu, ne dia nyakatuni Latuyalaka leli lʼatei anyu. Nyakaleli lʼatui andi nyati: Okoko wana wakatatumbi uma lʼEdjibitu?

²¹Ku Mose akati ati: Antu wemi lʼatei awo, weko apami nunu kama shamalu watakendakenda lʼekulu. Ku we akati wati: Dimi layuwasha unatshi wa vo nde utundu wa ngondo.

²²Undi, ekoko la ngombe mbayuyuwadiakela dia nkuka le wo? Kana wayuwasanganyia nsi tshe yʼuma lʼashi a waki?

²³Latuyalaka akakaluya Mose diui ati: Ukundi, lunya la Latuyalaka laya mundumundu uka? Kakiane we ayena kana diui diami le ye diayutshama kana kema.

²⁴Mose akatumbi, akatutela antu aui wa Latuyalaka. Ndi akasanganya apami akumi esambeli uma lʼatei a dihangamendi dia wudja, akawaeme lʼutshimba wa luudu la dipema.

²⁵Ku Latuyalaka akahulo lu dingi, akasawula la ndi; akose wuhu wa nyuma kaki la ndi, akakiahe dihangamendi diako akumi esambeli. Ku lamʼakawalungula nyuma kako, vo wakati akambu wahatayi. Keli lʼokongo diku, vo nkutsha osoku ntu.

²⁶Keli apami ahendi wakatshikala lu pangu, kumbu yawo: Eledade la Medade, ku nyuma kako kakawahema. Vo waki lʼului a waku wakawali, keli vo kuntsho utsha la luudu la dipema. Ku vo wakati akambu wahatayi lu pangu.

²⁷Ku olongo a pami omotshi akalawo, akatutela Mose ati: Eledade la Medade wuta akambu wahatayi lu pangu.

²⁸Jashua, onʼa Nuna, ukimanyidi a Mose, otoi wʼapami andi wakasonwama, akawutela ati: Khumemi Mose, ashimbi!

²⁹Keli Mose akûkaluya diui ati: We ambumbukelawo kandjema? Dimi nkumbulaka dia antu wa Latuyalaka tshe ndjala amvutshi. Dimi nkumbulaka dia Latuyalaka mbasha nyuma kandi.

³⁰Ku Mose la dihangamendi dia Isariyele wakatshu lu pangu.

³¹Ku Latuyalaka akampepia lopepe la wulu. Lopepe lako lakela tuluhu uma lu leke lʼashi a waki, lakayutokosha yediko ya lokendo la lushi otoi lu wedi one ndu ya lokendo la lushi otoi lu wedi ukina, lʼutshimba tshe wa pangu. To takahatana uma lu kete pulu ndu lu lukendi.

³²Antu wakunela yanyi tshe ndu lʼutshu tshe ndu la wedi a pindju tshe, wakatunda tuluhu. One laki kumunda efula, akandi homera dikumi. Vo wakayutane lʼutshimba wa pangu.

³³Emunyi weki lʼunyo, watatomama, ku kele ka Latuyalaka kakahete le wo. Latuyalaka akasuya antu sui dia wulu.

³⁴Ku vo wakole dihuli diako vati: Kiberote-Hatava (kitshimudi ati: Waumbu wʼakanga a ludju), ne dia leko kakawakhunde akanga a ludju.

³⁵Vo wakunela uma la Kiberote-Hatava, wakatshu utsha la Hazerote, ku wakatuhanga la Hazerote.