Read tetala Walelu 13 Bible Online

Walelu 13 - tetala bible

Walelu 13

¹Latuyalaka akatela Mose ati:

²Kosonole untu uma lu diuhu la diuhu dia washewo, one tshe leli uwandji lʼatei awo. Katumi dia vo ntukemba kete ya Kanana, yambumusha asi Isariyele.

³Mose akatumi uma lʼusui wa shenga wa Parana, uku diui dia Latuyalaka. Vo tshe waki ete a wudja wa Isariyele.

⁴Kumbu yawo nye: Shamua, onʼa Zakura, uma lu diuhu dia Rubena;

⁵Shafata, onʼa Hori, uma lu diuhu dia Simeyona;

⁶Kaleba, onʼa Jefune, uma lu diuhu dia Juda;

⁷lugala, onʼa Josefu, uma lu diuhu dia Isakara;

⁸Hoshea, onʼa Nuna, uma lu diuhu dia Efarayima;

⁹Palati, onʼa Rafu, uma lu diuhu dia Bendjamina;

¹⁰Ngadiyele, onʼa Sodi, uma lu diuhu dia Zebuluna;

¹¹Ngadi, onʼa Susi (leli uma lu diuhu dia Manase), uma lu diuhu dia Josefu;

¹²Amiyele, onʼa Ngemali, uma lu diuhu dia Dane;

¹³Seture, onʼa Mikaele, uma lu diuhu dia Ashere;

¹⁴Nabi, onʼa Vofisi, uma lu diuhu dia Nafetali;

¹⁵Nguele, onʼa Maki, uma lu diuhu dia Ngada.

¹⁶Oso eli kumbu yʼapami wakatumi Mose la ntukemba kete. Mose akole Hoshea, onʼa Nuna, ati: Jashua.

¹⁷Mose akatumi dia ntotopa kete ya Kanana. Ndi akawatela ati: Kanyumbeli leku utsha la Nengebe, kanyutumbeli lu leke lʼakuna.

¹⁸Kanyutendi kete wuhu weyo, ndu antu wudjashi loko kana vo la wulu kana kema, kana weko tshitshe kana efula.

¹⁹Kanyutendi kete yudjashiwo kana yeko ololo kana kolo, la esumba wudjashiwo weko pangu, kana wakahikama lʼave.

²⁰Kanyutendi kete kana yo yeko eteto kana shenga, kana ekunda weko kana kema. Kanyuyali la dihunga, kanyela elua uma lu kete yako. Etena kako, aki etatelu ka diela diʼelua.

²¹Ku vo wakunela, wakatukemba kete lʼusui wa shenga wa Zine, pulu ndu la Rehobe, keli lasuki la Hamata.

²²Vo wakambela utsha la Nengebe, wakatukuma la Heberona. Ahimana, Sheshai, Talamai, tukanula tʼAnaka, waki leko. (Heberona akahikama deku esambeli la ntundu ka Zoana lu Edjibitu.)

²³Vo wakakumi pulu lʼUkidi a Eshikole, ku wakahimbula sandji diʼelua. Antu ahendi wakadiembe lʼusimbi, vo wakela ndu dikomi diʼetamba ndu elua wa fingu.

²⁴Dihuli diako diakolame ati: Ukidi a Eshikole (kitshimudi ati: Sandji), ne dia sandji diʼelua diakahimbula asi Isariyele leko.

²⁵Lʼokongo wa nshi akumi anei, vo wakakalula uma la ntukemba kete yako.

²⁶Ku vo wakayi la Kadeshe, lʼusui wa shenga wa Parana, le Mose la Arona la ului tshe wʼasi Isariyele. Vo wakasanyia akambu wa leko, wakawaenya sandji diʼelua diʼuma lu kete yako.

²⁷Vo wakasanyia Mose vati: Shu takatshu lu kete yakayatutumi. Mete, kete yako yambulula too la awele la usanga. Sandji diʼelua diʼuma leko ne.

²⁸Keli antu wudjashi lu kete yako weko akanga a wulu. Esumba awo weko waki, kumbu yʼave tshu. Dikambu dikina, shu takatena tukanula ta Anaka leko.

²⁹Asi Amaleka mbuladi la Nengebe. Asi Hiti, asi Jebuse, lʼasi Amora mbuladi lu leke la lu akuna. Ku asi Kanana mbuladi lʼumamu wʼashi a waki ndu lʼemamu wa Jorodana.

³⁰Keli Kaleba akalembohaya antu la ntundu ka Mose; akawatela ati: Tuneli kakiane, tutohotole kete, ne dia shu mbeyaka ndjilembia.

³¹Keli antu wakatshu la ndi, wakati vati: Kema, shu hateyi ntsho la ntolo la wudja ako, ne dia vo ntuleka wulu.

³²Vo wakela asi Isariyele lukumu la kolo la kete yakawatukemba. Vo wakawatela vati: Kete yakatatukemba, yatushilaka antu watudjaseka loko. Antu tshe wakatatena leko, waki paka alundoki atu.

³³Antu tshe wakatatena, waki akunguti atu[17] (ana wa Anaka, wakayi uma lu wudja wʼakunguti). Shu takenama lu ashu asu ndu lu ashu awo uku tukatakata.