Read tetala Walelu 16 Bible Online

Walelu 16 - tetala bible

Walelu 16

¹Kora[28] onʼa Izehare, onʼa Kohata, onʼa Lewi, ndi la Datana la Abirama, ana wa Eliyaba, la One, onʼa Pelete, ana apami wʼasika Rubena,

²wakose antu. Vo wakunela la ntundu ka Mose, kame la efula kʼasi Isariyele, ewandji kama hyendi la akumi atanu wa lʼului, akanga a lukumu, wakasonwama uma lʼatei wʼului.

³Vo wakamotela Mose la Arona, wakawatela vati: Ambukuka! ne dia ului tshe wʼantu waya ekila. Ndu Latuyalaka eko lʼatei awo. Okoko wana wayabiyanyu ladiku diʼului wa Latuyalaka?

⁴Lamʼakuki Mose dikambu so, ndi akako ekhukhumadi.

⁵Ndi akatela Kora la ului andi tshe ati: Lui la pindju, Latuyalaka ayutulimbitshiya akona leli landi, ndu leli ekila, ndi ayusukanya uya le ndi. Ndi ayusukanya one layundosonola.

⁶Nyutshi dikambu ne. Nyose pusu ya dja, Kora la ului andi tshe.

⁷Lui la pindju, kanyudji dja loko, kanyuteli malashi ladiku diayo la ntunduka Latuyalaka. Ku one layosonwama le Latuyalaka ayuyala ekila. Ambukuka, nyu ana wa Lewi!

⁸Mose akatela Kora ati: Nyu ana wa Lewi, nyulungi!

⁹Undi, dikambu dia tshitshe mbakidio dia Unyashungu wa Isariyele nyatula uma lʼului wa Isariyele, dia nyusukanya le ndi, dia nyu ntsha ulimu lu etemwelo ka dipema ka Latuyalaka, ndu dia nyu memalaka la ntundu ka ului wʼantu dia mbakambelaka ulimu?

¹⁰Ndi akanyusukanya we la ananyo tshe, nyu ana apami wʼasika Lewi, ku nyu nyangaka ndu ulimu wʼolombedi?

¹¹Paka dikambu diako ntu mbambunyomotela Latuyalaka, we la ului aye tshe. Arona eli na, dia nyu mbungunangunela?

¹²Mose akatumi diui dia nteta Datana, la Abirama, ana wa Eliyabe. Keli vo wakati vati: Hatutsho.

¹³Undi, dikambu dia tshitshe mbedio dia we ntutundja uma lu kete yuludi too la awele la usanga, dia ndjutudiaka lʼusui wa shenga, mbahumbaye ndu ndjaete uwandji ladiku diasu?

¹⁴Dikambu dikina, we atatukumia lu kete yuludi too la awele la usanga, we atatusha sangu dia dikambo ndu dia dikambo dia elua. We ayukhundula ashu wʼantu ane? Shu hatutsho.

¹⁵Ku Mose akumala wulu, akatela Latuyalaka ati: Tulungulaki elambu awo. Dimi latahotola nduku punda kemotshi kuyanga ntshela otoi awo omotshi kolo.

¹⁶Mose akatela Kora ati: Lui, we la ului aye tshe kanyemali la ntundu ka Latuyalaka, we lʼului aye la Arona.

¹⁷Nyu tshe untu lʼuntu kose luhusu landi la dja, kadji malashi loko. Kanyuyi la yo la ntundu ka Latuyalaka, untu lʼuntu la luhusu landi. Pusu tshe yayuyala kama hyendi la akumi atanu. Ndu nyu, we la Arona, kanyela untu lʼuntu luhusu landi.

¹⁸Ku vo tshe untu lʼuntu akose luhusu landi, akadji dja loko, akatela malashi ladiku diayo. Ku vo wakemala lʼeotwelo ka luudu lʼesanganelu la dipema, kame la Mose la Arona.

¹⁹Kora akakongela Mose la Arona ului tshe lʼeotwelo ka luudu lʼesanganelu la dipema. Ku lutumbu la Latuyalaka lakenama le ului tshe.

²⁰Latuyalaka akatela Mose la Arona ati:

²¹Nyuyatuli uma lʼatei wʼului one, keli mbatshumbi kakiane.

²²Vo wakako ekhukhumadi; wakati vati: Unyashungu li! Unyashungu a nyuma yʼantu tshe! we ayuka ului tshe kele ne dia kolo kʼuntu otoi uka?

²³Latuyalaka akakaluya Mose diui ati:

²⁴Uteli ului wʼantu wati: Nyumo uma lʼedjaselu ka Kora, ka Datana, la kʼAbirama.

²⁵Mose akunela, akatshu le Datana, le Abirama. Ku dihangamendi dia Isariyele wakuyeli.

²⁶Ndi akasengasenga ului wʼantu ati: Nyuneli uma la mvudu yʼapema yʼantu wa kolo ane. Tanyunandaki diango diawo, nyutukulanyema kame la wo lu kolo yawo tshe.

²⁷Okone vo wakamo uma lasuki la edjaselu ka Kora, ka Datana, la kʼAbirama. Ku Datana la Abirama wakatumbi, wakemala kame la wadiewo la anʼawo la ekana awo lʼasuku wa mvudu yawo yʼapema.

²⁸Mose akati ati: Lu dikambu ne, mbayunyulimbitela nyati: Latuyalaka kakantumi dia ndjutsha elimu ene tshe, aha la wulu ami mbatumetshaka.

²⁹Naka nyoi ayuya le wo uku atutuyakaka le antu tshe, keti Latuyalaka kuntumami.

³⁰Keli naka Latuyalaka ayutsha dikambu diʼuyuyu, dia kete mbate la mbamena, kame la diango diawo tshe, dia vo ntsho esenyu utsha lʼudimu a pengandu, ndu nyu nyayulimbitela nyati: Antu ane wakonyola Latuyalaka.

³¹Kamʼakandashidiya mvuta aui aso, kete yakate palala la tshina diawo;

³²kete yakase unyo, yakamene kai, ndu vo ndu mvudu yawo kame lʼantu tshe wa Kora la diango diawo tshe.

³³Okone vo la diango diawo tshe wakatshu esenyu lʼudimu a pengandu. Kete yakakhukhume, ku vo wakashisho uma lʼatei wʼului wʼantu.

³⁴Ku asi Isariyele tshe waki lʼutshimba awo, wakalawo lamʼakawuki alelu awo, wata vati: Kete atukutomena, ndu shu!

³⁵Ku dja yakatumbi uma le Latuyalaka, yakatshumbi antu kama hyendi la akumi atanu lamʼakawalambulaka ulambu wa malashi.

³⁶Latuyalaka akatela Mose ati:

³⁷Uteli Eleazara, onʼa olombedi Arona, anya pusu yʼutuku uma lu dja. Ku we utudianganya dja vwa-vwa, ne dia yo yeko ekila.

³⁸La pusu yʼetuku yʼantu wa kolo aku wakashisha nyumu yawo, mbayuyutsha ufudi wʼediakelu. Ne dia vo wakayilambula la ntundu ka Latuyalaka, diako mbeyo ekila. Ku yo yayuyala euhwelu le asi Isariyele.

³⁹Olombedi Eleazara akose pusu yʼutuku yʼohotela yakalambula wane wakatshumbama. Ku ndi akayitshuli ufudi wʼediakelu.

⁴⁰Oso eli euhwelu le asi Isariyele, diaha untu kʼuntu, laha kanula ya Arona nsukana dia nambula Latuyalaka ulambu wa malashi, atukuyala uku Kora la ului andi, — uku akatela Latuyalaka Eleazara lʼunyo a Mose.

⁴¹Keli la wedi a pindju, ului tshe wʼasi Isariyele wakangunangunela Mose la Arona vati: Nyu mbakadiaki antu wa Latuyalaka.

⁴²Lamʼakamotela ului wʼantu Mose la Arona, vo wakendi utsha lu luudu lʼesanganelu la dipema, enyiwo ku dingi diambulukumba, ku lutumbu la Latuyalaka lambene.

⁴³Mose la Arona wakayi lu welelo wa luudu lʼesanganelu la dipema.

⁴⁴Ku Latuyalaka akatela Mose ati:

⁴⁵Nyumo uma lʼatei wʼului one keli mbatshumbi kakiane. Ku vo wakako ekhukhumadi.

⁴⁶Mose akatela Arona ati: Ose luhusu laye lʼutuku, udji dja yʼuma lʼediakelu loko, uteli malashi loko. Ulotole esadi utsha lʼului wʼantu dia mbatungela ekesanelu, ne dia kele ka Latuyalaka kambutumba, sui diambutatela.

⁴⁷Ku Arona akose luhusu uku akati Mose, akalawo lʼatei wʼului wʼantu. Enyi ku sui diambutatela lʼatei wʼantu. Ndi akalambula malashi, akatungela antu ekesanelu.

⁴⁸Ndi akahakema lʼasa wane wambuvo la wasena, ku sui diakashili.

⁴⁹Antu nunu dikumi la nei la kama esambeli wakavu la sui diako, ladiku dia waku wakavu dikambu dia Kora.

⁵⁰Arona akakalula le Mose lʼeotwelo ka luudu lʼesanganelu la dipema lamʼakashili sui.