Read tetala Walelu 18 Bible Online

Walelu 18 - tetala bible

Walelu 18

¹Okone Latuyalaka akatela Arona ati: We la anʼaye la wa lu luudu la sho mbayembaka wutshu wa kolo yayutshamaka lʼetemwelo. Ndu we la anʼaye weli la ye, mbayembaka wutshu wa kolo yayutshamaka lʼulimu anyu wʼolombedi.

²Kusukanya ndu ananyo, diuhu dia Lewi, diuhu dia sho lasuki la ye, dia vo ndjala kame la ye, la dia nkukimanyia lamʼayunyuyalaka we la anʼaye, la ntundu ka luudu la dipema lʼomenyi.

³Vo wayukukimanyiaka lu tumu tshe ya lu luudu la dipema, keli vo tawusukanaki lasuki la diango diʼulimu diʼekila dieli lu etemwelo kana dieli lʼediakelu, ne dia ndu nyu ndu vo, nyutukuvo.

⁴Vo wayuyalaka kame la ye, wayuyala la okende wa luudu lʼesanganelu la dipema ndu wʼelimu tshe lu luudu la dipema. Untu kʼuntu tasukanaki la nyu.

⁵Keli nyu mbayuyala la okende wa diango dia etemwelo ka dipema, ndu wʼediakelu, mbahuyala kele kami ntu le asi Isariyele.

⁶Enda, dimi lakose ananyo, asi Lewi uma lʼatei wʼasi Isariyele; vo mbeli ushasha wambunyusha Latuyalaka, dia vo ntshaka ulimu wa lu luudu lʼesanganelu la dipema.

⁷Keli we la anʼaye wʼapami weli la ye nyayutshaka ulimu anyu wʼolombedi la engo tshe keli lʼediakelu, ndu keli lʼedia dihondo diʼatanyelu. Elimu eso mbayunyutshaka. Dimi lambunyusha ulimu wʼolombedi hwe ushasha, la untu kʼuntu tshe layusukana, ayudiakema.

⁸Ku Latuyalaka akatela Arona ati: Enda, dimi lambukusha kene tshe katulamemaka uma lʼatei wʼelambu watuwunambulaka, diango tshe diatukidiamaka diʼasi Isariyele. Dimi lambukushadio uku luhina, we la anʼaye wʼapami, uku uhiku wa pundju.

⁹Lʼatei a diango diuleki ekila, diaki kuntshumbama lu dja, diango ne mbayuyala dianyu: ulambu tshe, ulambu awo tshe wa shima, ulambu awo tshe wa kolo ndu ulambu awo tshe wʼunungu, watuwukimoka le mi. Dio diayuyala ekila kuleki le ye ndu le anʼaye wʼapami.

¹⁰Kanyudilekaki lu dihuli diuleki ekila; usika pami tshe kayudilekaka. Dio dieko ekila le nyu.

¹¹Ndu diango ne dieko dianyu; elambu wa ushasha, elambu tshe wa letshetsha wʼasi Isariyele. Dimi lambukushadio we la anʼaye wʼapami la anʼaye wʼamantu weli la ye uku uhiku wa pundju. Untu tshe la lu luudu laye leli pudipudi, mbeyaka dile.

¹²Dimi lambukusha elonga tshe watulambulaka asi Isariyele le Latuyalaka: iso kuleki dimena, ashi wʼelua wuleki amena, la epunga wuleki amena.

¹³Elonga tshe wʼuma lu kete yawo wayuwulambulaka Latuyalaka, wayuyala waye. Untu tshe leko lu luudu laye, leli pudipudi, mbeyaka dile.

¹⁴Engo tshe kayuwukidia[30] lu Isariyele kayuyala kaye.

¹⁵Ana wa nundu tshe wʼantu ndu wa nyama watuwulambulaka Latuyalaka, wayuyala waye. Keli dieli la ye dia ntshungula ana wa nundu wʼantu ndu wa ana wa nundu wa nyama ya mindu.

¹⁶Kushikike etshungwelu kawo (wane wambuto ngondo otoi mbayuyutshungula) lʼushinga wa toshekele ta fesa tutanu, lu yediko ya shekele ya lu etemwelo, yeli la ngera akumi ahendi.

¹⁷Keli tutshungulaki ona ngombe lʼenundu, onʼokoko lʼenundu, kana ona mbudi lʼenundu; vo weko ekila. Komongaki dikila diawo lʼediakelu, kutshumbaki wata awo uku ulambu wa lutshumba, lu dja, dia ndjala diowo dia ngenyangenya Latuyalaka.

¹⁸Emunyi awo kawuyalaki waye, uku tulu ka letshetsha la elemba ka lukulu la lupami.

¹⁹Dimi lambukusha, we la anʼaye wʼapami la anʼaye wʼamantu weli kame la ye, elambu tshe wa lediedia wa diango diʼekila diatunambulaka asi Isariyele, uku uhiku anyu wa pundju. Oso eli daka dia leho dia pundju le ye la le tukanula taye, la ntundu ka Latuyalaka.

²⁰Latuyalaka akatela Arona ati: We huyala la sangu dia kete yawo kuyanga ndjala lʼuhiku wa diango diawo. Dimi keli uhiku aye la sangu diaye lʼatei wʼasi Isariyele.

²¹Dimi lambusha asi Lewi tenyi dia dikumi tshe[31] sangu lu Isariyele, wedi lʼulimu awo watuwutshaka, ulimu awo lu luudu lʼesanganelu la dipema.

²²Umaka kakiane asi Isariyele tawusukanaki la luudu lʼesanganelu la dipema, watukemba wutshu wa kolo, ndu watukuvo.

²³Keli asi Lewi mbayutshaka ulimu wa luudu lʼesanganelu la dipema, ndu mbayembaka wutshu wa kolo yʼasi Isariyele. Oso eli olembe wa pundju wayuyalaka lu nonga yanyu. Vo hawuyala la sangu lʼatei wʼasi Isariyele.

²⁴Dimi Latuyalaka lambusha asi Lewi tenyi dia dikumi diatunambulaka asi Isariyele uku ulambu sangu diawo. Diako mbakamawatela nti: Nyu hanyuyala la sangu lʼatei wʼasi Isariyele.

²⁵Latuyalaka akatela Mose ati:

²⁶Kuteli ndu asi Lewi wati: Lamʼayunyulungulaka tenyi dia dikumi diamumunyusha uku sangu dianyu ume le wo, kanyukimoki etenyi ka dikumi uma lu tenyi dia dikumi diako uku ulambu anyu le Latuyalaka, etenyi ka dikumi ka etenyi ka dikumi.

²⁷Ulambu anyu ayalema le nyu uku ulambu wa tongo yaki uma lʼesuswelu, ndu uku ulambu wʼashi wʼelua wʼuma lu yundja.

²⁸Osoku mbayunyulambula Latuyalaka ulambu ndu nyu uma lʼatei wa tenyi dia dikumi tshe diayunyulungula uma le asi Isariyele. Kanyuyushaki olombedi Arona ulambu wayunyulambulaka Latuyalaka.

²⁹Uma lʼatei wa eshasha tshe wayunyulungulaka, kanyulambulaki elambu wakuka le Latuyalaka. Ku uma lʼatei wa diango diuleki ololo, kanyukimoki etenyi kambukidiama uma lʼatei adio.

³⁰Kuwateli wati: Lamʼayunyediedia kene kuleki dimena, to kayalema le asi Lewi uku ulambu wʼuma lʼesuswelu, ndu wʼashi wʼelua wʼuma lu mvudu yanyu,

³¹ne dia oso eli difutu diʼulimu watunyutshaka lu luudu lʼesanganelu la dipema.

³²Nyu hanyuyala la wutshu wa kolo lu dikambu ne, lamʼayunyulambulaka etenyi kuleki ololo uma loko. Tanyusuwulaki elambu wʼekila wʼasi Isariyele, nyutukuvo.