Read tetala Walelu 2 Bible Online

Walelu 2 - tetala bible

Walelu 2

¹Latuyalaka akatela Mose la Arona ati:

²Dieli lʼasi Isariyele dia mpanga untu lʼuntu lasuki la ekuhu kawo ka koi, ndu lasuki la tulimbitelu ta mvudu ya washewo. Kawuhangaki lʼutshimba tshe, welanedi la luudu lʼesanganelu la dipema.

³Diuhu dia Juda lʼelui awo, kame la ekuhu kawo ka koi, kawutahangaka lu leke lʼehutwelu ka unya. Nashona, onʼa Aminadaba, kayali uwandji a wudja awo.

⁴Wane wakalema lʼului andi, waki antu nunu akumi esambeli la nei la kama shamalu.

⁵Diuhu dia Isakara kawutahangaka lasuki la wo. Netanele, onʼa Zuara, kayali uwandji a wudja awo.

⁶Wane wakalema lʼului andi, waki antu nunu akumi atanu la nei, la kama nyei.

⁷Diuhu dia Zebuluna, wayutahangaka lu wedi ako. Eliyabe, onʼa Helona, kayali uwandji a wudja awo.

⁸Wane tshe wakalema lu wudja awo, waki antu nunu akumi atanu la esambeli la kama nyei.

⁹Wane tshe wakalema lu pangu ka Juda, waki antu nunu lukama la akumi enanei la samalu la kama nyei, uku elui awo. Vo mbayutatshokaka la ntundu.

¹⁰Diuhu dia Rubena kawutahangaka lu elui awo, kame la ekuhu kawo ka koi, lu leke la diku dia kushi. Elizure, onʼa Shedeure, kayali uwandji a wudja awo.

¹¹Wane wakalema lʼului andi, waki antu nunu akumi anei la samalu la kama tshanu.

¹²Diuhu dia Simeyona kawutahangaka lasuki la wo, Shelumiyele, onʼa Zurishadai, kayali uwandji a wudja awo.

¹³Wane wakalema lʼului andi, waki antu nunu akumi atanu la divwa la kama shatu.

¹⁴Ndu diuhu dia Ngada, kawutahangaka lu wedi ako. Eliyasafu, onʼa Duele, kayali uwandji a wudja awo.

¹⁵Wane tshe wakalema lu wudja awo, waki antu nunu akumi anei la tanu kama shamalu la akumi atanu.

¹⁶Wane tshe wakalema lu pangu ka Rubena, waki antu nunu lukama akumi atanu la otoi, kama nyei la akumi atanu, uku elui awo. Vo mbayutatshokaka lu dihuli dia hendi.

¹⁷Ku luudu lʼesanganelu la dipema layutunelaka, kame la pangu kʼasi Lewi, kʼatei atei wa pangu kina. Vo tshe wayutatshokaka uku ayuwutahangaka, untu lʼuntu lu dihuli diandi, lasuki la ekuhu kawo ka koi.

¹⁸Diuhu dia Efarayima la elui awo, kame la ekuhu kawo ka koi, kawutahangaka lu leke lʼedjelu ka unya, Elishama, onʼa Amihude, kayali uwandji a wudja awo.

¹⁹Wane tshe wakalema lʼului andi, waki antu nunu akumi anei la kama tshanu.

²⁰Ndu diuhu dia Manase kawutahangaka lu wedi ako, lasuki la wo. Ngamaliyele, onʼa Pedazura, kayali uwandji a wudja awo.

²¹Wane tshe wakalema lʼului andi, waki antu nunu akumi asatu la pendi la kama hyendi.

²²Ndu diuhu dia Bendjamina, kawutahangaka lu wedi ako. Abidana, onʼa Ngidiyoni, kayali uwandji a wudja awo.

²³Wane wakalema lʼului andi, waki antu nunu akumi asatu la tanu la kama nyei.

²⁴Wane tshe wakalema lu pangu ka Efarayima, waki nunu lukama la enanei la lukama, uku elui awo. Vo mbayutatshokaka lu dihuli dia satu.

²⁵Diuhu dia Dane kawutahangaka lu elui awo, kame la ekuhu kawo ka koi, lu leke la ngelʼa kushi. Ahiyezere, onʼa Amishadai, kayali uwandji a wudja awo.

²⁶Wane tshe wakalema lʼului andi, waki antu nunu akumi asamalu la pendi la kama esambeli.

²⁷Diuhu dia Ashere kawutahangaka lu wedi ako, lasuki la wo. Pangiyele, onʼa Okarana, kayali uwandji a wudja awo.

²⁸Wane tshe wakalema lʼului andi, waki antu nunu akumi anei la otoi la kama tshanu.

²⁹Ndu diuhu dia Nafetali, kawutahangaka lu wedi ako. Ahira, onʼa Enana, kayali uwandji a wudja awo.

³⁰Wane wakalema lʼului andi, waki antu nunu akumi atanu la satu la kama nyei.

³¹Wane tshe wakalema lu pangu ka Dane, waki antu nunu lukama akumi atanu la esambeli la kama shamalu. Vo mbayutatshokaka lʼokongo kame la dikuhu diawo dia koi.

³²Waso weli asi Isariyele wakalema lu khumbu ya washewo. Antu tshe wakalema lu pangu lu elui awo, waki nunu kama shamalu la satu kama tshanu la akumi atanu.

³³Keli asi Lewi kumbalema lʼatei wʼasi Isariyele, uku akadjangela Latuyalaka Mose.

³⁴Asi Isariyele wakatatshaka akambu tshe. Uku akadjangela Latuyalaka Mose, mbakawatahangaka lasuki la dikuhu diawo dia koi, ndu mbakawatakendakendaka, untu lʼuntu lu khumbu kandi, uku luudu la washi.