Read tetala Walelu 21 Bible Online

Walelu 21 - tetala bible

Walelu 21

¹Khumʼekanga ka Arada, usi Kanana, lakadjashi lu leke la diku dia kushi, akuki lukumu ati: Asi Isariyele weko lu ndjayi[36] lu mbuka ka Atarima. Ndi akatolo la Isariyele, akandi amotshi awo fumbi.

²Asi Isariyele wakatshiki daka le Latuyalaka vati: Naka we ayutusha wudja one, shu tayulanya esumba awo tshe.

³Latuyalaka akuki diui diʼasi Isariyele, akawasha asi Kanana. Ku vo wakalanya tshe, ndu vo ndu esumba awo. Wakole dihuli diako vati: Horoma (kitshimudi ati: Elanyelu).

⁴Vo wakunela uma lʼUkungu a Hora, waketi lu mbuka kʼutsha lʼUduwa a Tilili, dia ntshimbela kete ya Edome.[37] Antu waki la uhasuhasu lu mbuka.

⁵Ku vo wakangunangunela Unyashungu la Mose vati: Okoko wana wakanyatutundja uma lʼEdjibitu dia shu ndjuvo lʼusui wa shenga? Ma kema ndu ashi kema, akundju asu wambutuna ma dia shoko ne.

⁶Ku Latuyalaka akatumela antu elui wa lolengo, wakalumata antu, ku asi Isariyele efula wakavu.[38]

⁷Antu wakayutela Mose vati: Shu takatshi kolo, ne dia takanyungunangunela, we la Latuyalaka. Utolombele Latuyalaka dia ndi ntunyiya elui ene. Ku Mose akalombela Unyashungu.

⁸Latuyalaka akatela Mose ati: Utshi ului wa lolengo, uhane lu losondo. Ku lamʼayuwenda untu tshe lakalumatemi ului, ndi ayuka.

⁹Mose akatshi ului a udjulu, akuhane lu losondo.[39] Ku lamʼakawendi untu lakalumatama ului, ndi akaki.

¹⁰Asi Isariyele wakunela, wakatuhanga la Obota.

¹¹Vo wakunela uma la Obota, wakatuhanga la Iye-Abarima, lʼusui wa shenga wʼelanedi la Moaba, utsha lʼehutwelu ka unya.

¹²Vo wakunela uma leko, wakatuhanga lʼUkidi a Zerede.

¹³Vo wakunela uma leko, wakatuhanga lu wedi wa Aranona, latokelaka lʼusui wa shenga uma lʼulelu wʼasi Amora; ne dia Aranona keli ulelu wa lʼasa asi Moaba la asi Amora

¹⁴Diako mbakawafundi lu buku diʼAta wa Latuyalaka vati: Waheba ka la Sufa, Ndu ekidi wa Aranona,

¹⁵Wusimbemadi utsha la tshina dia Ara, Weko pulu ndu lʼulelu wa Moaba.

¹⁶Ku uma leko, vo wakatshu la Bere (kitshimudi ati: Eteko). Lu Bere kako kakatela Latuyalaka Mose ati: Usanganya antu keli mbasha ashi.

¹⁷Ku asi Isariyele wakimbi usambu one vati: Eteko li, utundja ashi! — Nyukiembeli usambu! —

¹⁸Eteko kakatshimi ewandji, Kakatshimi antu a waki wa wudja, La danga dia khumʼekanga la ekalimba awo! Ku vo wakatshu uma lʼusui wa shenga utsha la Matana!

¹⁹Wakunela uma la Matana, utsha la Nahaliyele, la uma la Nahaliyele utsha la Bamota.

²⁰Wakunela uma la Bamota, waketi lʼukidi weli lu leke la Moaba, wakambela lʼote wʼukungu wa Pisinga welanedi lʼusui wa shenga.

²¹Ku asi Isariyele wakatumela Sihona, khumʼekanga kʼasi Amora, akendji vati:

²²Etawo shu ntenanya kete yaye. Shu hatetola lu dikambo, kuyanga lu dikambo diʼelua. Shu hatono ashi uma lu teko. Shu tayeta paka mbeta tshu lʼOsese a Khumʼekanga, edja ndu lamʼayutulekana diulelu diaye.

²³Keli Sihona kumbetawo asi Isariyele mbeta lu kete yandi. Ndi akasanganya antu andi tshe, wakatshu lʼusui wa shenga dia ntolo lʼasi Isariyele. Vo wakakumi la Jahaza, wakatolo lʼasi Isariyele leko.

²⁴Asi Isariyele wakadiaki Sihona, la yombo, wakose kete yandi, uma la Aranona pulu ndu la Jaboka, pulu ndu lʼulelu wʼasi Amona, ne dia Jazera keli lʼulelu wʼasi Amona.

²⁵Asi Isariyele wakose esumba ene tshe, ku vo wakadjase lʼesumba tshe wʼasi Amora, lu Heshibona la ngelu yato tshe.

²⁶Heshibona aki usumba wa Sihona, khumʼekanga kʼasi Amora, lakalo la khumʼekanga ka ntundu kʼasi Moaba, akohotola kete yandi pulu ndu la Aranona.

²⁷Diako mbatimbaka eyaka vati: Nyuyi la Heshibona! to kahikami ntu. Usumba wa Sihona washikikali!

²⁸Dja yakatumbi uma la Heshibona, lumbi la dja uma lʼusumba wa Sihona. Lo lakatshumbi Ara ka la Moaba, ndu khumi ya lʼahuli wa ladiku, lʼumamu wa Aranona.

²⁹Moaba li, mananu kayali le ye! Wudja wa Kemoshe li, diaye ku elo! Ndi akete anʼandi wʼapami andawi, ndu akakimo anʼandi wʼamantu lu fumbi le Sihona, khumʼekanga kʼasi Amore.

³⁰Okone tukanula tawo takalanyema uma la Heshibona, pulu ndu la Dibona. Shu takalanya, edja ndu dja yakalalo pulu ndu la Medeba.

³¹Okone asi Isariyele wakadjase lu kete yʼasi Amora.

³²Mose akatumi atopi la ntotopa Jazera. Vo wakatosa ngelu ya lʼokongo ayo; wakayihotola asi Amora waki leko.

³³Vo wakakadimo, wakatshu lu mbuka kʼutsha la Bashana. Ku Onga, khumʼekanga ka Bashana, akayi la antu andi tshe dia ndjolo la wo la Ederei.

³⁴Keli Latuyalaka akatela Mose ati: Tuwukaki woma, ne dia dimi lambukimo, ndi la antu andi tshe la kete yandi, lʼanya aye. Kutsheli uku akayatshela Sihona, khumʼekanga kʼasi Amora, lakadjashi la Heshibona.

³⁵Vo wakadiaki, ndi la anʼandi wʼapami la antu andi tshe, wakashili ushiki. Ku vo wakose kete yawo.