Read tetala Walelu 23 Bible Online

Walelu 23 - tetala bible

Walelu 23

¹Balama akatela Balaka ati: Untsheli diakelu esambeli lane, onongoswele waumi wa ngombe esambeli la waumi wʼekoko esambeli.

²Balaka akatshi uku akawutela Balama. Ku Balaka la Balama wakalambula ngombe kʼumi la okoko wʼumi lu ediakelu la ediakelu.

³Balama akatela Balaka ati: Emala lʼumamu wʼulambu aye wa lutshumba, dimi tukutsho yema. Undu, Latuyalaka ayuya dia ndjuhumana la mi. Ku kene tshe kayundomenya, kayumukutela. Okone ndi akambela lu dihuli dia ladiku dia hwe.

⁴Unyashungu akahumana la Balama, ku Balama akawutela ati: Dimi lakalongosodi diakelu esambeli, lakalambudi ngombe kʼumi la okoko wʼumi lu ediakelu lʼediakelu.

⁵Latuyalaka akadji aui lʼunyo wa Balama; akawutela ati: Ukaluli le Balaka, utuwuteli aui aso.

⁶Ndi akakalula le ndi, akutani emadi lʼumamu wʼulambu andi wa lutshumba, ndi la ewandji tshe wa Moaba.

⁷Ndi akatatela mvuta aui ako wʼuma le Unyashungu ati: Balaka akatumi antu dia ntombosa uma la Arama, Khumʼekanga kʼasi Moaba akatombosa uma lʼekungu wa lʼehutwelu, ati: Yaka, yumbidjeli Jakoba mananu! Yaka, yuki Isariyele kele!

⁸Ukundi eyami mbidja wane waki kumbidjama mananu le Unyashungu mananu? Ukundi eyami mbuka Wana waki kumbukama kele le Latuyalaka kele?

⁹Dimi lambena wudja ako uma lʼete wʼekungu ene, lambuwaena uma lu akuna ane. Enda, vo weli wudja wuyadjasedi vame, vo hawalami lʼatei a wedja ekina!

¹⁰Eya mbala tukanula ta Jakoba, kuyanga mbala etenyi otoi ka nei kʼasi Isariyele? Ololo dimi mvo nyoi kʼantu wʼololo, la ekumelu kami ndjala uku kawo!

¹¹Ku Balaka akambula Balama ati: Ngandi oso ambuyuntshela? Dimi lakayi la ye dia we ndjumbidjela atunyi ami mananu, we henyi! We hatshi nduku dikambu, paka mbatshokola tshu.

¹²Ndi akûkaluya diui ati: Dimi hahumbi mvuta aui wakadji Latuyalaka lʼunyo ami uka?

¹³Balaka akawutela ati: Yeti tutshu utsha lu dihuli dikina, ku we ayeya mbaena. We ayena paka wane wuleki suki, keli huwaena vo tshe. Kutumbidjeliwo mananu leko.

¹⁴Ndi aketi la ndi lʼusui wa Zofima, wakambela lʼote wa Pisinga, ku wakatutsha diakelu esambeli. Vo wakalambula ngombe kʼumi la okoko wʼumi lu ediakelu lʼediakelu.

¹⁵Ku Balama akatela Balaka ati: Emala lane lʼumamu wʼulambu aye wa lutshumba, dimi ntukutsho yema la ntuhumana la Unyashungu.

¹⁶Latuyalaka akahumana la ndi, akadji aui lʼunyo andi; akawutela ati: Ukaluli le Balaka, utuwuteli osoku.

¹⁷Ku ndi akakalula le Balaka, akutani emadi lʼumamu wʼulambu andi wa lutshumba, ndi la ewandji wa Moaba. Ku Balaka akawumbula ati: Ngandi wutshi Latuyalaka na?

¹⁸Ku Balama akatatela mvuta aui ako wʼuma le Unyashungu ati: Balaka, uneli, ulungi! Uhuki tui, we, onʼa Zipore!

¹⁹Unyashungu kema untu, dia ndi mvuta kashi, kuyanga onʼa untu dia ndi nkadimula kanyi yandi. Diui diakandatshi, ku ndi haditshi? Kana akambu wakandatshi, ku ndi hashidiya?

²⁰Enda, dimi lakalungula didjangu dia ntshokola. Ndi akatshokola, dimi haleyi nkadimula.

²¹Ndi komena lukulu lʼengeno lu Jakoba, Kuyanga ohenyohenyo lu Isariyele. Latuyalaka, Unyashungu awo, eko kame la wo. Aelu wʼongenongeno wa khumʼekanga weko lʼatei awo.

²²Unyashungu akatundja uma lʼEdjibitu. Ndi eko le wo uku wulu wa ndjati.

²³Mete, ehakelu kʼekanga heyi ntshela Jakoba nduku dikambu, Kuyanga endjelu ka diwulu le Isariyele. Kakiane wayuta dia Jakoba la Isariyele vati: Kakona kakatshi Unyashungu?

²⁴Enda, wudja one! Watunelaka uku tambwe ka wadi. Atetoka uku tambwe kʼumi kahatetamaka edja ndu to kambole nyama kundjito. Ndu kambono dikila dia nyama kako kudiakito.

²⁵Balaka akatela Balama ati: Tuwadjaki mananu nduku yema ndu tatshokolaki nduku yema.

²⁶Balama akûkaluya diui ati: Dimi kunkutela nti: Kene tshe kayuta Latuyalaka, kayumutsha?

²⁷Balaka akawutela ati: Yeti tutshu lu dihuli dikina. Undu Unyashungu ayongenangena dia we ntumbidjela wudja one mananu uma leko.

²⁸Balaka akambela la Balama lʼote wa Peore, kelanedi lʼusui wa shenga.

²⁹Balama akatela Balaka ati: Untsheli diakelu esambeli lane, onongoswele waumi a ngombe esambeli la waumi wʼekoko esambeli.

³⁰Balaka akatshi kene tshe kakati Balama, akalambula ngombe kʼumi la okoko wʼumi lu ediakelu lʼediakelu.