Read tetala Walelu 24 Bible Online

Walelu 24 - tetala bible

Walelu 24

¹Lamʼakenyi Balama ati: Latuyalaka ngenangenaka dia ntshokola Isariyele, ndi kuntsho la ntumbula lu tulimbitelu, uku akandatshokaka tena dikina. Keli ndi akelela utsha lʼusui wa shenga.

²Lamʼakandedia ashu andi, enyi ku asi Isariyele ane wuhangi lu diuhu la diuhu. Ku Nyuma ka Unyashungu kakawahema.

³Ku ndi akatatela mvuta aui wa Unyashungu ati: Diui dia Balama onʼa Beore, Diui dia untu lakatema ashu,

⁴Diui diʼuntu latukaka aui wa Unyashungu, Dia one latenaka enelo ka Kanga-Wulu-Tshe, Dia one latukhusamelaka, keli ndi eli la ashu wakatema ati:

⁵Jakoba li! ndi mvudu yaye yʼapema amena li! Isariyele, ndi pangu yanyu amena li!

⁶Vo wambusimbemala uku ekidi wa bamubamu, uku dikambo dia lʼumamu wʼokedi, Uku etamba weli lʼupumu wakune Latuyalaka, Uku esasi wa lʼumamu wʼashi.

⁷Ashi wayokelaka uma lu mbuka yʼasi Isariyele, Tukanula tawo tayutanema lʼatei wʼashi a waki efula. Khumʼekanga kawo ayuleka Anganga wuki, La diulelu diawo diayuyala wulu.

⁸Unyashungu akatundja uma lʼEdjibitu. Wulu awo uma le ndi weko uku wulu wa ndjati. Vo wayushila wudja weli atunyi awo, Wayowediawedia weka awo, Wayatsheta pitu.

⁹Vo watukhusamaka, watetamaka uku tambwe kʼumi, Ndu uku tambwe ka wadi; eya mbaunyia na?[41] Isariyele li, one lanyotshokola, atshokwami, La one lanyudja mananu, adjami mananu![42]

¹⁰Balaka akuki Balama kele, akasakanya anyu; akawutela ati: Dimi lakaketi dia we mbidjelami atunyi ami mananu. We henyi! we ambatshokola tena satu.

¹¹Okone ulawo kakiane utsha lakaye! Dimi lakati nti: Mete, dimi layukolemia, keli Latuyalaka ambukutunyiya.

¹²Balama akakaluya Balaka diui ati: Undi, dimi kumvutela akendji wakayantumela nti:

¹³Kuyanga Balaka ayumbisha luudu luludi too la fesa la paunyi, dimi haleyi ndekana diui dia Latuyalaka, dia ntsha dikambu diʼololo kana dia kolo lu lulangu lami dime? Aui tshe wayuta Latuyalaka, mbayumuta?

¹⁴Kakiane luyanga nkalula utsha lu wudja asu. Yaka takutedi akambu wayutshela wudja one wudja aye lu nshi yayayi.

¹⁵Ndi akatatela mbutela aui wa Unyashungu ati: Diui dia Balama, onʼa Beore, Diui diʼuntu lakatema ashu,

¹⁶Diui dia one latukaka aui wa Unyashungu, Dia one lateyaka yimba ya KhumʼUlungu, Dia one latenaka enelo ka Kanga-Wulu-Tshe, Dia one latukhusamaka ndu leli la ashu wakatema ati:

¹⁷Dimi latuwaenaka, keli aha kakiane; Latuwaendaka, keli aha lasuki. Yoto yayutumba uma le Jakoba, Danga dia khumʼekanga diayunela uma le Isariyele. Dio diayutshutshuna fumu ya Moaba, Diayolembia ana tshe wa Shete.

¹⁸Edome ayuyala engo ka dimbu, ndu Seire pupu, atunyi awo wayuyala diango dia dimbu Lamʼayolo asi Isariyele la dihunga.

¹⁹Umbuledi ayutumba uma le Jakoba, Ayulanya atshikadi wa lʼesumba!

²⁰Ku Balama akenyi Amaleka; akati aui andi ati: Amaleka aki wudja a ntundu lʼatei a wedja. Keli ekumelu kawo kayuyala paka elanyelu.

²¹Ndi akenyi asi Kena, akati aui andi ati: Edjaselu kanyu keko lu dihuli dia wulu, Ndu kefu kanyu keko ladiku dia dive.

²²Keli wudja wa Kena wayulanyema Edja ndu kaandi ayunyotola Ashura utsha lu fumbi?

²³Ku Balama akati aui andi ati: Ye! Ayeya ntshikala la lumu lamʼayutsha Unyashungu dikambu ne na?

²⁴Keli mashua wayuya uma la Kitime, ku wayolembia asi Ashura, ndu asi Ebere. Ndu ndi ayuya dia ndjulanya.

²⁵Ku Balama akunela, akakalula lakawo. Ndu Balaka akunela utsha lakandi.