Read tetala Walelu 27 Bible Online

Walelu 27 - tetala bible

Walelu 27

¹Ku ana amantu wa Zelofehade, onʼa Hefere, onʼa Ngiliyade, onʼa Makira, onʼa Manase, wakasukana. Vo waki uma lu khumbu ya Manase, onʼa Josefu. Kumbu ya anʼandi wʼamantu nye: Mala, Noa, Hongela, Milika, la Tiriza.

²Vo wakayemala la ntundu ka Mose, la ntundu kʼolombedi Eleazara ndu la ntundu kʼewandji tshe wʼului wʼantu, lʼeotwelo ka luudu lʼesanganelu la dipema, wakati vati:

³Shesu akatavwi lʼusui wa shenga. Ndi taki lʼului wa Kora, a waku wakatombokwela Latuyalaka. Keli ndi akavu lu kolo kandi. Ndi kumbuta ana apami.

⁴Ukundi ukuki lukumbu la shesu nshisho uma lʼatei a khumbu kandi, ne dia ndi kumbuta ona pami? Utusha kete ya sangu lʼatei wʼanangu shesu.

⁵Mose akatundja dikambu diako la ntundu ka Latuyalaka.

⁶Latuyalaka akatela Mose ati:

⁷Ana amantu wa Zelofehade wambuyinga. Kuwasha kete yʼukito lʼului wʼanangu shewo. Kawose kete yʼukito yaki shewo.[48]

⁸Uteli asi Isariyele wati: Naka pami kemotshi, laki kumbuta ona pami, ambuvo, onʼandi la umuntu ayukita kete yandi yʼukito.

⁹Naka ndi kumbuta kuyanga ona umuntu, kanyusha anangu kete yandi yʼukito.

¹⁰Naka ndi aha la anangu, kanyusha anangu shi kete yandi yʼukito.

¹¹Naka shi kema la anangu, kanyusha one luleki mbuto la ndi shikaa lu khumbu kandi kete yandi yʼukito, ku untu ako ayuyikita. Dikambu so diayuyala olembe la didjangu le asi Isariyele, uku akadjangela Latuyalaka Mose.

¹²Latuyalaka akatela Mose ati: Umbeli utsha lʼukungu wa Abarima, utendi kete yakamasha asi Isariyele.

¹³Lamʼayuyushila ndjenda, we ayutsho le washo, uku akatshu onanyo Arona,

¹⁴ne dia nyu nyakahendula diui diami lʼusui wa shenga wa Zina lamʼakinyu konemiami la ntundu kʼului wʼantu, dia mbetemi ekila lu ashi la ntundu kʼashuawo. (Oso aki ashi wa Meriba, wa la Kadeshe, lʼusui wa shenga wa Zina.)[49]

¹⁵Ku Mose akatela Latuyalaka ati:

¹⁶We Latuyalaka, Unyashungu wa nyumu yʼantu tshe, osonole untu layolombola ului wʼantu,

¹⁷untu layutumbaka la ntundu kawo, ndu layotoka la ntundu kawo, one layatundjaka ndu layaotshiyaka, dia ului wʼantu wa Latuyalaka tawuyalaki uku ekoko waha la ulami.[50]

¹⁸Latuyalaka akatela Mose ati: Ose Jashua,[51] onʼa Nuna, untu lahemi nyuma, kuwahe lunya.

¹⁹Kuweme la ntundu kʼolombedi Eleazara la kʼului tshe wʼantu, kuwusha okende lu asbu awo.

²⁰Kuwusha etenyi ka luwandji laye, dia ului tshe wʼasi Isariyele mbukitanyia.

²¹Ndi kemali la ntundu kʼolombedi Eleazara, layuwendjiyaka nyembo, yetawo Usasi,[52] la ntundu ka Latuyalaka. Okone Jashua la asi Isariyele tshe, ului tshe, wayutumbaka ndu wayotoka lu diui dia Eleazara.

²²Mose akatshi uku akawutela Latuyalaka. Ndi akose Jashua, akaweme la ntundu kʼolombedi Eleazara ndu kʼului tshe wʼantu.

²³Ku Eleazara akawahe anya, akawusha okende,[53] uku akatela Latuyalaka Mose.