Read tetala Walelu 28 Bible Online

Walelu 28 - tetala bible

Walelu 28

¹Latuyalaka akatela Mose ati:

²Udjangeli asi Isariyele, uwateli vati: Kanyuhoki dia nambulami elambu: ulambu ami, ma diʼelambu ami wa nambula lu dja, diowo dia ngenyangenya, lu tena diawo.

³Kuwateli wati: Onʼeli ulambu wa nambula lu dja, wayunyulambulaka le Latuyalaka: esongo wʼekoko a waumi ehendi waha la ekomo, weki eleku otoi, la lushi la lushi, uku ulambu wa nshi tshe.

⁴Kulambulaki osongo wʼokoko omotshi la pindju, la ukina la dikolo.

⁵Kela ndu etenyi otoi ka dikumi ka efa ka shima ka pudipudi, kosohanyemi la iso kʼedika yediko ya etenyi otoi ka nei ka hina.

⁶Oso eh ulambu wa lutshumba wa nshi, wakadjangema lʼUkungu a Sinai, dia ndjala diowo dia ngenyangenya, ulambu wa nambula lu dja le Latuyalaka.

⁷Ulambu awo wa dinono wayuyala etenyi otoi ka nei lu osongo lʼosongo wʼokoko. Kutelaki ulambu wa dinono wa dinono dia wulu lu dihuli diʼekila, la ntundu ka Latuyalaka.

⁸Kulambulaki osongo wʼokoko ukina la dikolo, uku ulambu wa shima wa la pindju, ndu uku ulambu awo wa dinono. Kulambulaki uku ulambu wa nambula lu dja, dia ndjala diowo dia ngenyangenya Latuyalaka.

⁹Lu lushi la mumuya, kulambulaki esongo wʼekoko a waumi ehendi waha la ekomo, weki eleku otoi, tenyi pendi dia dikumi dia shima kosohanyemi la iso, kame la ulambu awo wa dinono.

¹⁰Oso eli ulambu wa lutshumba wa lushi la mumuya tshe, ladiku diʼulambu wa lutshumba wa la lushi la lushi ndu wʼulambu awo wa dinono.[54]

¹¹Lu talelu tanyu ta ngondo, kanyulambulaki esongo wa ngombe a waumi ehendi, okoko wʼumi otoi, esongo wʼekoko a waumi esambeli waha la ekomo, weki eleku otoi, ulambu wa lutshumba le Latuyalaka.

¹²Kulambulaki ndu tenyi satu dia dikumi dia efa ka shima ka pudipudi kosohanyemi la iso, ulambu wa shima, lu ngombe la ngombe kʼumi; tenyi pendi dia shima ka pudipudi kosohanyemi la iso, ulambu wa shima, lu okoko wʼumi;

¹³etenyi ka dikumi ka shima ka pudipudi, kosohanyemi la iso, ulambu wa shima, lu osongo lʼosongo wʼokoko; dia ndjala ulambu wa lutshumba wa diowo dia ngenyangenya, ulambu wa nambula lu dja le Latuyalaka.

¹⁴Kanyulambuli elambu wa dinono etenyi ka hendi ka hina ka wanu lu ngombe la ngombe kʼumi, la etenyi ka satu ka hina ka wanu lu okoko wʼumi, etenyi ka nei ka hina lu osongo lʼosongo wʼokoko. Oso eli ulambu wa lutshumba lu yalelu la yalelu ya ngondo tshe ya lu eleku lʼeleku.

¹⁵Kanyulambulaki Latuyalaka ndu wumbi a mbudi, ulambu wa kolo. Vo kawulambwemi ladiku diʼulambu wa lutshumba wa la lushi la lushi, ndu dia ulambu awo wa dinono.

¹⁶Lushi la dikumi lʼanei la ngondo ka ntundu, layuyalaka lushi lʼelekanelu ka Latuyalaka.[55]

¹⁷Lushi la dikumi lʼatanu la ngondo kako, layuyalaka lushi la wuki. Kanyolekaki ma diaha la edya nshi esambeli.[56]

¹⁸Lusanganya lʼekila layuyala lushi la ntundu; tanyutshaki ulimu a wulu lushi lako.

¹⁹Keli kanyulambulaki esongo wa ngombe a waumi ehendi, okoko wʼumi la esongo wʼekoko a waumi esambeli weki eleku otoi, ulambu wa nambula lu dja, ulambu wa lutshumba le Latuyalaka. Kuwendi diaha vo ndjala la dikomo.

²⁰Kanyulambulaki ndu tenyi satu dia dikumi dia efa ka shima ka pudipudi, kosohanyemi la iso, ulambu wa shima, lu ngombe la ngombe kʼumi, la tenyi pendi dia dikumi lu okoko wʼumi;

²¹etenyi otoi ka dikumi lu osongo lʼosongo wʼekoko esambeli.

²²Kanyulambulaki ndu wumbi a mbudi, ulambu wa kolo, dia nyutungela ekesanelu.

²³Kanyulambulaki elambu ene ladiku diʼulambu wa lutshumba wa pindju, wako weli ulambu wa lutshumba wa la lushi la lushi.

²⁴Kanyulambulaki ulambu wa nambula lu dja, dia ndjala diowo dia ngenyangenya Latuyalaka, la lushi la lushi, yediko ya nshi esambeli. Vo wayulambwema ladiku diʼulambu wa lutshumba wa la lushi la lushi ndu wa ulambu awo wa dinono.

²⁵Kanyuyalaki la lusanganya lʼekila lushi lʼesambeli; tanyutshaki ulimu uku ukambi.

²⁶Lu lushi lʼolonga, lamʼayunyulambula Latuyalaka ulambu anyu wa shima kʼolonga wa lushi lanyu la wuki la bingu,[57] kanyuyalaki la lusanganya lʼekila; tanyutshaki ulimu uku ukambi.

²⁷Keli kanyulambulaki esongo wa ngombe a waumi ehendi, okoko wʼumi, esongo wʼekoko a waumi esambeli weki eleku otoi ulambu wa lutshumba, dia ndjala diowo dia ngenyangenya Latuyalaka;

²⁸ndu ulambu awo wa shima; tenyi satu dia dikumi dia efa dia shima ka pudipudi, kosohanyemi la iso, la osongo lʼosongo a ngombe, la tenyi pendi dia dikumi lʼokoko wʼumi,

²⁹etenyi otoi ka dikumi lu osongo lʼosongo lʼekoko ako esambeli.

³⁰Kame la mbudi kʼumi otoi dia nyutungela ekesanelu.

³¹Kanyulambulaki nye yaha la ekomo, kame la elambu wa dinono ladiku diʼulambu wa lutshumba wa la lushi la lushi, la ulambu wa shima.