Read tetala Walelu 32 Bible Online

Walelu 32 - tetala bible

Walelu 32

¹Asika Rubena la asika Ngada waki la dungalunga efula. Vo wakendi kete ya lazera la kete ya Ngiliyade, ku wakenyi vati: Dihuli diako, diaki dihuli dia dungalunga.

²Ku asika Ngada la asika Rubena wakayi, wakayutela Mose, olombedi Eleazara la ewandji wʼului wʼantu, vati:

³Atarota, Dibona, Jazera, Nimira, Heshibona, Eleale, Sebame, Nebo la Beona,

⁴kete yakakomola Latuyalaka la ntundu kʼasi Isariyele, yeli kete ya dungalunga; ku ekambi aye weko la dungalunga.

⁵Ku vo wakawutela vati: Naka shu tambuhumo lukulu lʼolo lu ashu aye, etawo kete nye nkimwama le ekambi aye, dia yo ndjala yawo. Tututehuyaki Jorodana.

⁶Keli Mose akambula asika Ngada la asika Rubena ati: Anengenyu wayutsho lu ta, ku nyu nyayutshikala lindu?

⁷Okoko wana wayanganyu mpekuya etema wʼasi Isariyele, diaha vo nteho utsha lu kete yakawasha Latuyalaka?

⁸Osoku mbakatshi washenyu lamʼakamatumi uma la Kadeshe-Baranea dia ntenda kete.

⁹Ne dia lamʼakawatshu utsha lʼUkidi a Eshikole, wakatenda kete, ku vo wakayuhekuya etema wʼasi Isariyele, diaha vo ntsho lu kete yakawasha Latuyalaka.[62]

¹⁰Lushi lako, mbakumala Latuyalaka, mbakandatshibi ati:

¹¹Mete, nduku pami kakatumbi uma lʼEdjibitu, keli la deku akumi ahendi, pulu ladiku, kayena kete yakamatshibi dia mbisha Abarahama, Isaka, la Jakoba, ne dia vo kundjelami lʼutema tshe.

¹²Tshikima Kaleba, onʼa Jefune, usi Kenisi, la Jashua, onʼa Nuna, waku wakayelaka Latuyalaka lʼutema tshe.

¹³Ku Latuyalaka akuki asi Isariyele kele, akawaekekuya lʼusui wa shenga deku akumi anei, edja ndu wa lu lolonga luku tshe wakatshi kolo lu ashu wa Latuyalaka wakashili.[63]

¹⁴Nyendi, nyu nyamboto lu lukulu laki washenyu, nyu ului wʼantu wa kolo, dia nfudia kele ka Latuyalaka le Isariyele!

¹⁵Naka nyu nyayetola uma le ndi, ndi ayutshika asi Isariyele lʼusui ntu, ku nyu nyayuyudiaka antu ane tshe.

¹⁶Ku vo wakasukana le Mose, wakawutela vati: Shu tayutahiki ekutu wʼekoko asu lindu, ndu esumba wa anʼasu mbidjase.

¹⁷Keli shu shame tayukimela dihumo, tayuyalongosola dia ntsho la ntundu kʼasi Isariyele, edja ndu lamʼayutakumia lu ahuli awo. Ku anʼasu wayudjase lu esumba wudingami kumbu ya wulu, ne dia akanga a kete.

¹⁸Shu hatukalula lu mvudu yasu, tshikima usi Isariyele tshe ambosa etenyi kandi kʼukito.

¹⁹Shu hatuyanga etenyi kʼukito ntu kame la wo, la wedi uku wa Jorodana, ne dia shu tambuyala la etenyi kasu kʼukito lu wedi one wa Jorodana, lu leke lʼehutwelu.

²⁰Ku Mose akawatela ati: Naka nyu nyayutsha dikambu ne, naka nyu nyayukimela dihumo dia ntsho la ntundu ka Latuyalaka utsha lu ta,

²¹naka pami tshe kukimedi dihumo lʼatei anyu ayuteho Jorodana la ntundu ka Latuyalaka, ayutshikala edja ndu ndi ambutshanya atunyi andi uma la ntundu kandi,

²²edja ndu kete yambulembiama la ntundu ka Latuyalaka, lʼokongo diku nyu nyayukalula lindu, ku nyu hanyuyala la unungu le Latuyalaka ndu le Isariyele. Ku kete nye yayuyala etenyi kanyu kʼukito la ntundu ka Latuyalaka.

²³Keli naka nyu hanyutshi osoku, nyulungi, nyu nyakatshi kolo la ntundu ka Latuyalaka; nyeyi nyati: Kolo kanyu kayunyunda.

²⁴Nyuhiki esumba ne dia anʼanyu wa tshitshe, la ekutu ne dia ekoko anyu, ku nyutshi akambu tshe wakanyalaki.

²⁵Ku asika Ngada la asika Rubena wakatela Mose vati: Ekambi aye wayutsha akambu tshe wambuyuwatela, we khumemi.

²⁶Wadiesu, anʼasu, ekoko asu, la ngombe yasu tshe wayutshikala lu esumba wa Ngiliyade.

²⁷Keli ekambi aye wayuteho, pami tshe ukimedi dihumo dia ta, la ntundu ka Latuyalaka utsha lu ta, uku ambuta khumemi.

²⁸Ku Mose akatela olombedi Eleazara, Jashua, onʼa Nuna, la ete wa mvudu ya washewo ya wauhu wʼasi Isariyele dikambu diawo.

²⁹Mose akawatela ati: Naka asika Ngada la asika Rubena, apami tshe wukimedi dihumo dia ntolo ta la ntundu ka Latuyalaka, wayuteho Jorodana kame la nyu, ndu naka kete yayolembiama la ntundu kanyu, kanyuwasha kete ya Ngiliyade sangu.

³⁰Keli naka vo hawulangi nteho la nyu utsha lu ta, vo wayuyala la sangu lʼatei anyu lu kete ya Kanana.

³¹Ku asika Ngada la asika Rubena wakakaluya diui vati: Uku akatutela Latuyalaka, shu ekambi aye, mbayututsha.

³²Shu tayuteho tukimedi dihumo dia ta la ntundu ka Latuyalaka utsha lu kete ya Kanana, ku etenyi ka sangu diasu kayutshikala kame la su lu wedi one wa Jorodana.[64]

³³Ku Mose akawasha, vo asika Ngada, asika Rubena, la etenyi ka hendi ka diuhu dia Manase, onʼa Josefu, diulelu dia Sihona, khumʼekanga kʼasi Amora, la diulelu dia Onga, khumʼekanga ka Bashana, kete la esumba ayo kame la beke diawo, la esumba tshe wa kete yadingi.

³⁴Ku asika Ngada wakahiki Dibona, Atarota, Aroera,

³⁵Aterote-Shofana, Jazera, Jongebaha,

³⁶Bete-Nimira, la Bete-Harana, esumba wakadingami kumbu, ndu ekutu wʼekoko.

³⁷Asika Rubena wakahiki Heshibona, Eleale la Kiriyatayima,

³⁸Nebo la Bala-Meona (kumbu yawo yakakadimwama) ndu Sibima. Ku vo wakole esumba wakawahiki kumbu kina.

³⁹Asika Makira, onʼa Manase, wakatshu utsha lʼusumba wa Ngiliyade, wakatuwosa, wakôhotola asi Amora waki leko.

⁴⁰Mose akasha Makira, onʼa Manase, usumba wa Ngiliyade, ku ndi akadjase loko.

⁴¹Jayira, onʼa Manase, akatshu, akatosa ngelu yawo; ku ndi akayole ati: Havota-Jayira (kitshimudi ati: Esumba wa Jayira).

⁴²Noba akatshu, akatosa Kenate la ngelu ya lʼokongo awo; akawole ati: Noba, lukumbu landi.