Read tetala Walelu 34 Bible Online

Walelu 34 - tetala bible

Walelu 34

¹Latuyalaka akatela Mose ati:

²Uteli asi Isariyele wati: Lamʼayunyutukuma lu kete ya Kanana (kete yako yayuyala yanyu hita, kete ya Kanana tshe pulu ndu kuma yayo),

³leke lanyu la la diku dia kushi layutatela uma lʼusui wa shenga wa Zina, lʼumamu wa Edome. Ku ulelu anyu wa lu leke la diku dia kushi wayuyala uma la kuma kʼUduwa a Leho utsha lʼehutwelu ka unya.

⁴Ku ulelu ayukadimo utsha lu leke la diku dia kushi, wayumbela lu Akarabima, wayeta lʼumamu wa Zina. Ku vo wayumbela, wayutukuma pulu lu leke la diku dia kushi la Kadeshe-Baranea; wayukuma la Hazara-Adara, ku wayeta la Azimona;

⁵uma la Azimona, vo wakyukadimo edja ndu lʼOkedi a Edjibitu, ku wayutukuma pulu ndu lʼAshi a Wuki (wetawo vati: Mediteraneya).

⁶Ulelu anyu wa lu leke lʼedjelu wayuyala lʼumamu wʼAshi a Wuki. Oso ayuyala ulelu anyu wa lu leke lʼedjelu.

⁷Ulelu anyu wa lu leke la ngelʼa kushi wayuyala okone: Uma lʼashi a Wuki pulu ndu lʼUkungu a Hora.

⁸Uma lʼUkungu a Hora, kanyetsha ulelu pulu ndu lʼukidi wʼutsha la Hamata, ku vo wayutukuma la Zedade.

⁹Ulelu ayeta utsha la Ziforona, ku vo wayutukuma la Hazara-Enana. Oso ayuyala ulelu anyu wa lu leke la ngelʼa kushi.

¹⁰Kanyetsha ulelu anyu wa lu leke lʼehutwelu uma la Hazara-Enana, edja ndu la Shefame.

¹¹Vo wayuhulo uma la Shefame utsha la Ribala weli lu leke lʼehutwelu ka Ayina; ku vo wayuhulo, wayeta lʼumamu wa leke lʼehutwelu lu uduwa wa Kinerete (wetawo vati: Uduwa wa Ngalili).

¹²Ulelu ayuhulo lu Jorodana, wayutukuma pulu ndu lʼUduwa a Leho. Osoku mbayuyala kete la elelu ayo.

¹³Mose akatela asi Isariyele ati: Kete yambunyukita nye yayukahanyema lu eukelu kʼuwali. Latuyalaka akadjanga dia yisha wauhu divwa la etenyi.[68]

¹⁴Ne dia diuhu dia Rubena uku khumbu ya washewo, la diuhu dia Ngada uku khumbu ya washewo, la etenyi ka hendi ka diuhu dia Manase, wakalungula etenyi kawo ka sangu.

¹⁵Wedja ehendi la etenyi ka hendi ene wakatalungudi etenyi kawo ka sangu la wedi wa Jorodana, lasuki la Jeriko, lu leke lʼehutwelu.[69]

¹⁶Latuyalaka akatela Mose ati:

¹⁷Olombedi Eleazara la Jashua, onʼa Nuna, wayunyukahanya kete nye ya sangu.

¹⁸Kanyose uwandji otoi uma lu diuhu dia nkahanya kete ya sangu.

¹⁹Kumbu yʼantu ako nye: Kaleba, onʼa Jefune, uma lu diuhu dia Juda;

²⁰Samuele, onʼa Amihude, uma lu diuhu diʼasika Simeyona;

²¹Elidade, onʼa Kisilona, uma lu diuhu dia Bendjamina;

²²Buki, onʼa Jongili, uwandji, uma lu diuhu diʼasika Dane;

²³uma le asika Josefu: Haniyele, onʼa Efode, uwandji, uma lu diuhu diʼasika Manase;

²⁴la Kemuele, onʼa Shifetana, uwandji, uma lu diuhu diʼasika Efarayima;

²⁵Elizafana, onʼa Paranaka, uwandji, uma lu diuhu diʼasika Zebuluna;

²⁶Palatiyele, onʼa Azana, uwandji, uma lu diuhu diʼasika Isakara;

²⁷Ahihude, onʼa Shelomi, uma lu diuhu diʼasika Ashere;

²⁸Pedahele, onʼa Amihude, uwandji, uma lu diuhu diʼasika Nafetali.

²⁹Antu aso mbakandjangela Latuyalaka dia vo nkahanya asi Isariyele kete ya Kanana sangu.