Read tetala Walelu 36 Bible Online

Walelu 36 - tetala bible

Walelu 36

¹Ete wa khumbu ya Ngiliyade, onʼa Makira, onʼa Manase, uma lʼatei wa khumbu ya ana wa Josefu, wakasukana, wakateketa la ntundu ka Mose la elombodi, ete wa khumbu ka Isariyele,

²Vo wakati vati: Latuyalaka akadjangela khumemi dia nkimo kete nye sangu lu eukelu kʼuwali le Asi Isariyele. Khumemi akalungula ndu diui dia nkimo sangu diʼonengesu Zelofehade, le anʼandi wʼamantu.[73]

³Keli naka vo wayutshukama le apami akina wʼuma lu diuhu dikina diʼasi Isariyele, sangu diawo diayunyema uma lu sangu dia washewo, ku diayutusanganyema la sangu dia diuhu diambuwutuyala. Osoku mbukuki minyama etenyi kemotshi ka sangu kakatalungula uma lu eukelu kʼuwali.

⁴Ku lamʼayuya eleku kʼongenongeno le asi Isariyele, sangu diawo diayusanganyema la sangu dia diuhu diayuwuyala, ku sangu diako diayunyema uma lu sangu dia diuhu dia washesu.

⁵Mose akatela asi Isariyele aui wakati Latuyalaka ati: Diuhu diʼasika Josefu wambuyinga.

⁶Latuyalaka ambudjanga okone lu dikambu diʼana amantu wa Zelofehade ati: Vo mbeyaka ntshukama le apami walangawo. Dikambu otoi, kawutshukami paka lu khumbu ka diuhu dia washewo.

⁷Nduku etenyi ka sangu kʼasi Isariyele kayeya nsekwama uma lu diuhu dimotshi utsha lu diuhu dikina, ne dia asi Isariyele wayukelekama vo tshe, untu lʼuntu lu sangu dia washi.

⁸Ona umuntu tshe lambukita etenyi ka sangu ka diuhu dimotshi dia wudja wʼasi Isariyele, katshukami le pami kemotshi kʼuma lu khumbu kemotshi ka diuhu dia washi.

⁹Okone nduku etenyi ka sangu kayoseko uma lu diuhu dimotshi utsha lu diuhu dikina, ne dia wauhu wʼasi Isariyele wayukelekama diuhu la diuhu lu sangu diadio.

¹⁰Okone ana amantu wa Zelofehade wakatshi uku akadjangela Latuyalaka Mose.

¹¹Ana amantu wa Zelofehade, Mala, Tiriza, Hongela, Milika la Noa, wakatshukama la ana apami wʼanangu shewo.

¹²Vo wakatshukama lu khumbu yʼasika Manase, onʼa Josefu. Okone etenyi kawo ka sangu kakatshikala lu khumbu ka diuhu dia shewo.

¹³Oso eli elembe la adjangu wakadjangela Latuyalaka asi Isariyele uma le Mose lu mandja ya Moaba, ya lʼumamu wa Jorodana, lasuki la Jeriko.