Read tetala Walelu 6 Bible Online

Walelu 6 - tetala bible

Walelu 6

¹Latuyalaka akatela Mose ati:

²Uteli asi Isariyele wati: Lamʼayutshika pami kana umuntu dokoloko dia shikaa, dia ndjatula uma le antu, la ndjakidia le Latuyalaka,

³ndi tanokaki wanu ndu dinono dia wulu. Ndi tanokaki wanu wʼukai wakatshama uma lu wanu kana uma lu enono ka wulu. Tanokaki ashi wʼelua wʼekodi. Talekaki elua wʼekodi, wʼeyuyu kana wambuma.[6]

⁴Nshi tshe yendi la kilu, ndi talekaki elua wʼekodi, kuyanga tongo kana pusu.

⁵Nshi tshe yendi la kilu, ndi tanyaki divu lʼote andi; ndi kayali ekila. Kaduya divu edja ndu nshi yambunduyakidia le Latuyalaka yambukuka.

⁶Nshi tshe yambunduyatula le Latuyalaka, ndi tasukanaki lasuki la udu.

⁷Tayasanyaki lamʼayuvo shi, nyangu, onangu kana kadiyendi, ne dia ekidielu ka Unyashungu andi keko lʼote andi.

⁸Nshi tshe yendi la kilu, ndi eli ekila le Latuyalaka.

⁹Naka untu omotshi ayuvo shashimuya lasuki la ndi, ku ote andi wʼekila wambusana; ndi kanya divu lushi lʼesambeli, lushi lʼediamelu kandi.

¹⁰Lu lushi lʼenanei, ndi keja binga pendi kana tana ta kudumba tuhendi le olombedi, lʼeotwelo ka luudu lʼesanganelu la dipema.

¹¹Ku olombedi ayulambula kemotshi ulambu wʼekesanelu, ku kekina ulambu wa lutshumba. Ndi ayutungela ekesanelu, ne dia kolo kakandatshi lu dikambu dia udu. Ku lushi lako, ndi ayukidia ote andi.

¹²Ndi kayakidia ntu le Latuyalaka nshi yandi ya diatanyelu. Ndi kela osongo wʼokoko wʼumi wʼeleku otoi ulambu wʼunungu. Keli nshi yandi ya ntundu hayalema, ne dia kilu kandi kakafutana.

¹³One eli olembe le kanga kilu lambuyatula, ndu lambuyakidia. Lamʼayushila nshi yandi ya ndjakidia, kawuyi la ndi lʼeotwelo ka luudu lʼesanganelu la dipema.

¹⁴Ndi kalambuli Latuyalaka osongo wʼokoko wʼeleku Otoi waha la ekomo ulambu wa lutshumba, ku okoko a wadi wʼeleku otoi waha la ekomo ulambu wa ekesanelu, la okoko wʼumi waha la ekomo ulambu wa ki,

¹⁵saka dia ma diaha la edya: ekama wa shima ka pudipudi wosohanyimi la iso, la ekati waha la edya wukitami iso, elambu wa shima la elambu wa dinono.

¹⁶Olombedi ayulambula diango diako la ntundu ka Latuyalaka. Ndi ayulambula ulambu andi wʼekesanelu ndu ulambu andi wa lutshumba.

¹⁷Ndi ayulambula okoko wʼumi ulambu wa ki le Latuyalaka, kame la saka dia ma diaha la edya. Olombedi ayulambula ndu ulambu awo wa shima ndu ulambu awo wa dinono.

¹⁸Kanga kilu lambuyatula, lambuyakidia, kanya divu diʼuma lʼote andi wʼekila lʼeotwelo ka luudu lʼesanganelu la dipema. Katongone divu diako, kadidji lu dja lʼesi a nyama kʼulambu wa ki.

¹⁹Olombedi ayosa elemba ka lunya kʼokoko wʼumi kʼukato, ukama otoi wa ma diaha la edya uma lu kisaka, ukati otoi waha la edya, ku ndi mbekitsha lʼanya wa kanga kilu lʼokongo wʼenyelu kandi ka divu diʼekidielu kandi.

²⁰Ku olombedi ayudietshetsha ulambu wa letshetsha la ntundu ka Latuyalaka. Dio dieli etenyi kʼekila keli kʼolombedi, kame la tulu ka letshetsha la elemba ka lukulu kulambudiwo. Lʼokongo diku kanga kilu mbeyaka no wanu.

²¹Oso eli olembe le kanga kilu latshika dokoloko, ndu olembe wʼulambu andi le Latuyalaka, ne dia ekidiamelu kandi. Osoku mbeli ulambu andi le Latuyalaka ne dia ekidiamelu kandi, ladiku diʼeshasha ekina weyandi nkimo.[7]

²²Latuyalaka akatela Mose ati:

²³Uteli Arona la anʼandi wʼapami wati: Kanyotshokolaki asi Isariyele okone. Kanyuwatelaki nyati:

²⁴Latuyalaka anyotshokole, anyulami.

²⁵Latuyalaka anyediya elundji kandi, anyuki ngandji ka mamba.

²⁶Latuyalaka anyediya elundji kandi, anyusha ki!

²⁷Osoku mbayunyudimulaka lukumbu lami lʼatei wʼasi Isariyele, ku dimi layatshokolaka.