Read tetala Walelu 8 Bible Online

Walelu 8 - tetala bible

Walelu 8

¹Latuyalaka akatela Mose ati:

²Uteli Arona wati: Lamʼayuyemeka atala, atala esambeli kawukimoki usasi lu welelo wʼekitshelu ka tala.

³Ku Arona akatshaka osoku; akemeka atala ato dia vo nkimoka usasi awo lu welelo wʼekitshelu ka tala, uku akadjangela Latuyalaka Mose.

⁴Ekitshelu ka tala kakatshama la paunyi ka lutshula, umakʼetshina kato pulu ndu alembo ato. Uku yediko yakenya Latuyalaka Mose, mbakandakitshi.[8]

⁵Latuyalaka akatela Mose ati:

⁶Kose asi Lewi uma lʼatei wʼasi Isariyele, kuwaedia.

⁷Kutshi okone, dia mbaedia: kuwamonge ashi wʼekesanelu; kawunya divu la diosa tshe dia lʼalimba awo, kawusuli ahondo awo, kawuyaedia.

⁸Kawela osongo a ngombe wʼumi la ulambu awo wa shima ka pudipudi, kosohanyimi la iso. Kela osongo a ngombe wʼumi ukina, dia ndjala ulambu wa kolo.

⁹Kusanganya asi Lewi lʼeotwelo ka luudu lʼesanganelu la dipema. Kusanganya ului tshe wʼasi Isariyele laawo.

¹⁰Lamʼaluwulaye asi Lewi la ntundu ka Latuyalaka, asi Isariyele kawahe asi Lewi anya awo.

¹¹Arona ayulambula asi Lewi la ntundu ka Latuyalaka uku ulambu wa letshetsha uma le asi Isariyele, dia asi Lewi ndjala wawo, dia ntsha ulimu wa Latuyalaka.

¹²Asi Lewi kawahe anya awo ladiku dia ete wa ngombe ya waumi. Lʼokongo diku, we kulambuli otoi, dia ndjala ulambu wa kolo; la ukina, dia ndjala ulambu wa lutshumba le Latuyalaka, dia ntungela asi Lewi ekesanelu.

¹³Kela asi Lewi la ntundu ka Arona la anʼandi wʼapami. Kuwalambuli uku ulambu wa letshetsha la ntundu ka Latuyalaka.

¹⁴Osoku mbayuyatula asi Lewi uma lʼatei wʼasi Isariyele, ku asi Lewi wayuyala wami.

¹⁵Lʼokongo diku, asi Lewi wayoto dia ntsha ulimu wa luudu lʼesanganelu la dipema lamʼayuyushila mbaedia ndu mbalambula uku ulambu wa letshetsha.

¹⁶Vo wambukimwama le mi uma lʼatei wʼasi Isariyele. Lambuyaoselawo lʼete wa tata kundu, ana wa nundu tshe wʼasi Isariyele,

¹⁷ne dia ana wa nunu tshe wa Isariyele weli wami, ndu wʼantu ndu wa nyama. Dimi lakayakidiyawo lushi lakamadiaki ana wa nundu tshe wa lu kete ya Edjibitu.[9]

¹⁸Dimi lambosa asi Lewi lʼete wʼana wa nundu tshe wʼasi Isariyele.

¹⁹Dimi lambusha Arona la anʼandu wʼapami asi Lewi uma lʼatei wʼasi Isariyele, dia vo ntshelaka asi Isariyele ulimu lu luudu lʼesanganelu la dipema, ndu dia mbatungelaka ekesanelu, asui watukuya le asi Isariyele lamʼasukanawo lʼetemwelo.

²⁰Mose, Arona la ului tshe wʼasi Isariyele wakatshela asi Lewi akambu tshe wakadjangela Latuyalaka Mose lu dikambu diawo. Uku akadjangela Latuyalaka Mose dikambu diʼasi Lewi, mbakatshela asi Isariyele.

²¹Asi Lewi wakayaedia uma lu kolo, wakasuli ahondo awo. Ku Arona akalambula uku ulambu wa letshetsha la ntundu ka Latuyalaka, akatungela ekesanelu dia mbaedia.

²²Lʼokongo diku, asi Lewi wakotoka lu luudu lʼesanganelu la dipema la ntundu ka Arona la anʼandi wʼapami, dia ntshaka ulimu awo. Uku akadjangela Latuyalaka Mose, lu dikambu diʼasi Lewi, mbakawatshela.

²³Latuyalaka akatela Mose ati:

²⁴Okone mbayutshaka asi Lewi ulimu. Wane weli la deku akumi ahendi la tanu pulu ladiku, wayotoka lu luudu lʼesanganelu la dipema, dia ntshaka ulimu.

²⁵Wane waya la deku akumi atanu, kawukimo ulimu, tawukambaki ntu.

²⁶Vo kawukimanyiaki anengewo dia nama okende lu luudu lʼesanganelu la dipema, keli tawutshaki nduku ulimu. Osoku mbayuyutshela asi Lewi lu mbasha tumu yawo.