Read tetala Mika 3 Bible Online

Mika 3 - tetala bible

Mika 3

¹Dimi lakati nti: Nyulungi, nyu ete wa Jakoba, La embuledi wa khumbu ka Isariyele! Undi, nyu hanyuhumbi mbeya dialelu diʼololo?

²Nyu nyeli wane watuhetshaka ololo, Ku nyatulangaka kolo. Nyu nyeli wane watuhatulaka antu ami wauwu, La emunyi uma lu weka awo.

³Nyu nyeli wane watolekaka ndu emunyi awo; Watuwauwulaka wauwu, watuwaokolaka weka, Watasesaka tufunda tufunda, Uka atuwosesaka nyama ya nkate lu puki, Uku nyama lu puki ka wuki.

⁴Ku nyu nyayulelela Latuyalaka, keli ndi hunyukela. Lʼetena keso ndi ayushe elundji kandi uma le nyu, Ne dia nyu nyakafudia etsha anyu wa kolo.

⁵Latuyalaka kata okone lu dikambu dianyu, Nyu amvutshi watunganyiaka wudja ami, Lamʼatunyolekaka ma, nyu nyatuhangohangoka nyati: Ki! Keli le waku wahatudjaka nduku engo lʼenyo awo, Nyu nyatuyalongosolaka dia ndo la wo ta.

⁶Okone utshu wayuyala le nyu waha la enelo, Ndu udjima wayuyala le nyu waha la diendjelu. Unya wayudjela amvutshi, yanyi yayuyala udjima ladiku diawo.

⁷Amenyi wayutshama sonyi, La wane watendjaka wayolombo la sonyi. Vo tshe wayukumba elomo awo, Ne dia nduku diui uma le Unyashungu.

⁸Keli le mi, dimi lambuludiama la wulu, La Nyuma ka Latuyalaka, la dialelu diʼololo, ndu la khudu tshe, Dia mvutela Jakoba uhedia andi, la Isariyele kolo kandi.

⁹Nyulungi dikambu ne, nyu ete wa khumbu ka Jakoba, Ndu nyu embuledi wa khumbu ka Isariyele; Nyu wane watukaka dialelu diʼololo wononyi, Watukadimulaka akambu wʼusimbwi tshe kolo.

¹⁰Nyu nyeli wane watuhikaka Siona la dikila, La Jerusalema la kolo.

¹¹Nyu ete wa Jerusalema nyatulumbuyaka Dia nkundja mbu yʼutshu. Nyu elombedi weli loko, Nyu nyatetshaka ne dia nkundja difutu. Nyatulimbitshiyaka akambu wa Unyashungu dia nkundja falanga. Keli nyu nyatekamaka le Latuyalaka, Nyata nyati: Undi, Latuyalaka kema lʼatei asu? Nduku elanyelu kayuya le su.

¹²Okone, lu dikambu dianyi mbayukambema Siona uku ekambo, Mbayuyala Jerusalema tuta diʼelanyelu. Ukungu wa luudu wayuyala ukunda utu ladiku.[4]