Read tetala Habakuka 2 Bible Online

Habakuka 2 - tetala bible

Habakuka 2

¹Dimi layemala lu dihuli diami diatumukungaka, Layudjase ladiku diʼetangelu. Layukunga dia mena kene kayumvutela Latuyalaka, Ndu diui diayumukaluya lu dikambu dia delu diami.

²Latuyalaka akankaluye diui, Akamvutela ati: Ufundi enelo kene. Ufundi aui ato lʼutshimo lu pasi diʼave, Wuhu wukuki untu latalawo mbeya mbala.

³Enelo kene keko ne dia etena kakasonwama. To kutsha nkuma lu ekumelu kato, to huta kashi. Kuyanga to kayutshimbatshimba, nyukikungeli. To kayuya mete, hakiutshimbatshimba.[3]

⁴Nyendi, one leli kema la utema wʼuluwanyi, ayokomo. Keli untu ololo ayuyala la lumu uma lu mbetawo kandi.[4]

⁵Dikambu dikina, wanu eli ukesanyi. Untu lukanga lahi, hatutshikalaka la lumu. Ndi tufudiaka saki kandi uku Udimu a Pengandu. Ndi eli uku nyoi lahatulutaka. Ndi atusanganyaka wedja tshe le ndi, Atomotshaka antu tshe uku wandi.

⁶Undi, antu tshe hawuwukanela, ndu hawuwukela yukedi ya lotengo vati: Mananu kayali le one latufudiaka diango dieli kema diandi? Edja ndu kaandi? Mananu kayali le wane watuyafudiyaka abasa!

⁷Wane wukukuli abasa hawunela esadi, Hawuya dia ndjukohenyahenya, Dia we ndjala engo ka dimbu le wo?

⁸We akambi wedja efula dimbu. Okone atshikadi tshe wa wedja ako wayukumba dimbu, Ne dia dikila dia antu la akambu a ngala wakatshama lʼusumba, Ndu le wane tshe wudjashi loko.

⁹Mananu kayali le one latulungamelaka waho wa kolo ne dia luudu landi, Dia ndi nkitsha edjaselu kandi lu dihuli dia ladiku, Dia ndi mpanda uma lu lunya lʼelanyelu!

¹⁰We akasanguya dikambu dia sonyi le luudu laye, Dia ndjaka antu efula. Ndu we akatshela lumu laye kolo.

¹¹Dive diayuhangohango uma lʼeheli. Ku usimbi a luudu wayudikaluya diui.

¹²Mananu kayali le one lahika usumba la dikila, Ndu lahika dihata la akambu wa kolo.

¹³Nyulungi, aha uma le Latuyalaka Kanga lulimbilimbi Mbatukambaka antu elimu dikambu dia dja, Ndu mbatokomoka wedja alimba anyanya?

¹⁴Ne dia kete yayulula too la ewu ka lutumbu la Latuyalaka, Uku atululaka ashi lu ashi a waki.[5]

¹⁵Mananu kayali le one latonoshaka anyandi Dikoho dia kele kandi, Ndu latuwadjuyaka, dia ndi mena utakataka awo!

¹⁶We ambulula too la sonyi, aha la lutumbu; Ono ndu we, usukosuko! Dikoho dia lunya la pami la Latuyalaka diayukuma le ye. Sonyi ka wononyi kayuyala ladiku dia lutumbu laye.

¹⁷Akambu wa ngala wakatshama la Lebanona wayukukumba, La elanyelu ka nyama kayukutsha woma, Ne dia dikila dia antu la akambu wa ngala wakatshama lu kete, Lʼusumba ndu le wane tshe wudjashi loko.

¹⁸Waho akona weli le efanelu ka losela, wakakisele osedi? Waho akona weli le efanelu ka lolelola? Le umbetsha wa kashi, lakatshi efanelu kako, Katundekamaka dia ntshaka dikishi dia nyumi?

¹⁹Mananu kayali le one latela utamba ati: Emo! La dive dia lumi ati: Unela! Undi, to mbeyaka mbetsha? Nyendi, to kambukumbama la paunyi la fesa. To kema la lumu lʼatei ato nduku yema!

²⁰Keli Latuyalaka eko lʼetemwelo kandi kʼekila. Kete tshe yayali ki la ntundu kandi.