Read tetala Zefaniya 1 Bible Online

Zefaniya 1 - tetala bible

Zefaniya 1

¹Diui dia Latuyalaka diakayi le Zefaniya, onʼa Kushi, onʼa Ngedaliya, onʼa Amariya, onʼa Hezekiya, lu nshi ya Josiya,[1] onʼa Amona, khumʼekanga ka Juda.

²Dimi layulanya diango tshe Dieli ladiku dia kete, mbata Latuyalaka.

³Dimi layudiaka antu la nyama, Fudu ya lʼulungu la nsi ya lʼashi a waki. Dimi layulanya antu wa kolo. Dimi layushila antu tshe Weli ladiku dia kete ushiki, mbata Latuyalaka.

⁴Dimi layusimbula lunya lami dia ndo la Juda, Ndu dia ndo la asi Jerusalema tshe. Dimi layushila atshikadi wa Bala ushiki uma lu dinuli ne, Ndu layunya lukumbu lʼelombedi, atemodi wa dikishi.

⁵Ee, layushila waku watotemolaka Ului wa diango dia lʼulungu lʼete wa mvudu, Waku watotemolaka, watutshibaka le Latuyalaka, Ndu watutshibaka Milikome,

⁶Waku wakakadimo uma le Latuyalaka, Waki kunyanga Latuyalaka kuyanga mbumbula ushiki.

⁷Uyali ki la ntundu ka Khumadiondjo Latuyalaka, Ne dia lushi landi laya suki. Latuyalaka akalongosola ulambu, Ndi akakidia wane wakandeti lʼulambu.

⁸Lu lushi lʼulambu wa Latuyalaka, Dimi layusuya ewandji la ana apami wa khumʼekanga, Ndu wane tshe wolotshi eloto wʼasi wedja.

⁹Lushi lako, dimi layusuya wane tshe watulimboka ladiku diʼukingo, La waku watuludiaka luudu la khumewo too la akambu wa ngala la lukesu.

¹⁰Latuyalaka kata ati: Lushi lako, tukuku tayukema uma la suku dia Nsi, Alelu uma lu leke lukina, la lundju la wulu uma lʼakuna.

¹¹Nyuleli nyu asi Etuli; Ne dia ambetshetshi wʼukanda kema ntu, Wane tshe watembaka fesa wambushila ushiki.

¹²Lushi lako, dimi layuyangiayangia Jerusalema la atala. Dimi layusuya antu wudjashi lʼatei wʼengenongeno awo, Watutaka lʼetema awo vati: Latuyalaka hutsha ololo kana kolo.

¹³Ekundji awo wayuyala diango dia dimbu, Mvudu yawo yayuyala elanyelu ketu. Vo wayuhika mvudu, keli hawudjase loko. Vo wayune ekodi wa vinyo lu dikambo, Keli hawono ashi awo wʼelua.

¹⁴Lushi la wuki la Latuyalaka laya suki, Lo lambusukana, lo layuya esadi. Lushi la Latuyalaka lambukukia diui dialo. Ahuka wambuda tukuku ta wulu.

¹⁵Lushi lako, layuyala lushi lʼududu, Lushi lʼohenyobenyo la asui, Lushi la dihandju la elanyelu, Lushi la udjima la lutshukutshuku, Lushi la wangi la udjima a tshududu,

¹⁶Lushi la ama na la tukuku ta ta, Dia ndo la esumba a wulu, ndu la tangelu diʼetali.

¹⁷Dimi layela asui le antu Dia vo nkendakenda uku akanga a tutshungu, Ne dia wakantshela, dimi Latuyalaka, kolo. Dikila diawo diayutshulwama uku ditshu, La emunyi awo uku tumi.

¹⁸Fesa yawo kuyanga paunyi yawo hayeya mbashimbela Lu lushi lʼududu la latuyalaka. Keli kete tshe yayutshumbama la dja ya kandjema kandi, Ne dia ndi ayukumia ekumelu ka woma Le waku tshe watudjaseka la kete.