Read tetala Zefaniya 2 Bible Online

Zefaniya 2 - tetala bible

Zefaniya 2

¹Nyu wudja waha la sonyi, Nyuyasanganya kame, nyusangani kame,

²Ntundu nyu nyatatshanyema Uku fufudi yatufumbofumboka; Ntundu ududu wa Latuyalaka watayi le nyu; Ntundu ka lushi la Latuyalaka latayi le nyu.

³Nyuyangi Latuyalaka, Nyu akanga a memakana tshe wa la kete, Nyu wane watulamaka adjangu andi. Nyuyangi akambu wʼololo, nyuyangi memakana. Undu, nyu mbeyaka mpanda lu lushi la kele ka Latuyalaka.

⁴Ngaza ayutshikala hwe, Ashikelona ayuyala tongo tu, Ashidode wayutshanyema unya lʼatei wʼote, Ekerona ayuhikwama.

⁵Mananu kayali le wane wudjashi lʼumamu wʼashi a waki, Nyu wudja wʼasi Kerete! Diui dia Latuyalaka diambuya lu dikambu dianyu, Nyu asi Kanana, kete yʼasi Filistiya.[2] Dimi layunyulanya diaha nduku untu ndjala leko.

⁶Umamu wʼashi a waki wayuyala ahuli wa ndesha dungalunga, Tutumbutumbu tʼalami wʼekoko La kumbu ya nyimba ya dungalunga.

⁷Umamu wayuyala wa atshikadi wa lu khumbu ka Juda. Vo wayuleshaka dungalunga diawo leko. Vo wayetamaka la dikolo lu mvudu ya Ashikelona, Ne dia Latuyalaka, Unyashungu awo, ayakendela, Ayakaluya engonyi awo.

⁸Dimi lakuki tengo yʼasi Moaba,[3] La dionyo diʼasi Amona[4] diakawonyolaka wudja ami, Ndu uku akawayasemaka dia ndosha kete yawo.

⁹Diako mbata Latuyalaka Kanga lulimbilimbi, Unyashungu wa Isariyele, ati: Uku wemi la lumu! Moaba ayuyala uku Sodoma, La asi Amona uku Ngomora.[5] Kete yakakiti atende la afuku wa leho, ndu elanyelu ka pundju. Atshikadi wa wudja ami wayakita.

¹⁰Dikambu so diayuyala le wo, uma lu utaku awo, Ne dia vo wakonyola ndu wakasemela Wudja wa Latuyalaka Kanga lulimbilimbi.

¹¹Latuyalaka ayuyala engo ka woma le wo, Ne dia ndi ayuvusha ditemolatemola tshe dia la kete ndjala. Ku antu tshe wayotemola untu lʼuntu uma lu dihuli diandi, Ndu wa lu asenga tshe wa wedja.

¹²Ndu nyu, asi Etiyopiya,[6] Nyayudiakema la yombo yami.

¹³Ndi ayusimbula lunya landi Dia ndosha wa lu leke la ngelʼa kushi, ayulanya Asuriya.[7] Ndi ayete Niniva tongo tu, ndu ufumbu uku usui wa shenga.

¹⁴Nyimba ya dungalunga yayetama lʼatei awo. Nyama tshe ya lʼusui. Kumbaka la biku wayudjase lu ete wa dikoho diawo. Tsheketeki yayulela lu adidishi; Dingwangwa diayulela lʼekingo wa suku, Ne dia vo wayokenenadia elimu Wakatshama la etamba a woto lʼandja.

¹⁵Vo weli usumba wʼongenongeno, wakatalalaka antu ulalalala, Wakataka lʼetema awo vati: Shu ane nduku antu wedimi la su! Ndi wuhu wambuwuyala tongo tu, Dihuli dia nyama mbetama loko li! Untu tshe layeta lasuki la wo, ayotshodia, ayuhuma shole.