Read tetala Zefaniya 3 Bible Online

Zefaniya 3 - tetala bible

Zefaniya 3

¹Mananu kayayi le usumba wʼuhedia, ndu wambusana! Le usumba uku watusuyanyaka!

²Vo kunkitanyia diui, kumbetawo wetshelu, Kombekama le Latuyalaka, kunsukana le Unyashungu awo.

³Ewandji weli lʼatei awo weko tambwe yadikita. Embadi awo weli ndjaundu ya dikoio, Yahatutshikaka nduku engo edja ndu la pindju.

⁴Amvutshi awo weli antu watusadisadi ndu antu wa lukesu. Elombedi awo wakasuwula etemwelo, wakalanya elembe.

⁵Latuyalaka eko ololo lʼatei awo, ndi hutsha kolo. Pindju tshe, ndi atelaka sambu kandi kʼololo, Ndi hatuhekoka la kesekese. Keli untu a kolo hateyaka sonyi.

⁶Dimi lakashili wedja ushiki, tangelu diawo diakalanyema. Dimi lakalanya esese awo, wuhu waheyi untu mbeta leko. Esumba awo wakalanyema, wuhu waheyi untu ndjala leko, Wuhu waheyi untu mbidjase leko.

⁷Dimi lakati nti: Dikambu otoi, Ndi ayumbuka woma, ayetawo luhangu. Ndi hunya ashu lu akambu tshe wakamawetsha. Keli vo waki la pusa efula dia mbete etsha awo tshe kolo.

⁸Okone mbata Latuyalaka ati: Nyunkungeli edja ndu lushi layumunela uku omenyi. Esangweyu kami eli dia motsha wedja, dia dimi motsha waulelu, La mbatshulwela kele kami, ududu ami tshe, Ne dia kete tshe yayulungula la dja ya kandjema kami.

⁹Ku dimi layukadimula eteketa wʼantu Dia vo ndjala pudipudi, Dia vo tshe mbeya mbeta lukumbu la Latuyalaka, La mbotemola lʼutema otoi.

¹⁰Atemodi ami uma la wedi wʼekedi wa Etiyopiya, Ona umuntu a wudja ami, wakadiangana, Wayumbela elambu ami.

¹¹Lushi lako, we, Jerusalema, huyala lu sonyi Dia etsha aye wakayantshelaka kolo, Ne dia dimi layunya akanga wʼutaku weli lʼatei aye, La we huyala la lahi ntu lʼukungu ami wʼekila.

¹²Keli dimi layutshika wudja Weli la lunyangu la wula lʼatei aye. Ku vo wayuyanga eshamelu lu lukumbu la Latuyalaka.

¹³Atshikadi wa Isariyele hawutsha kolo. Vo hawuta kashi, Kuyanga aui wa lukesu ntanema lʼenyo awo.[8] Vo wayolekaka, wayetamaka, ku nduku lawautsha woma

¹⁴We ona umuntu a Siona, imbi esambu! Isariyele, uhangohango! We onʼa umuntu a Jerusalema, uyali la ongenongeno! Utamanya ngenangena lʼutema aye tshe.

¹⁵Latuyalaka akanya dumbwelu diaye. Ndi akatshanya utunyi aye. Khumʼekanga ka Isariyele, Latuyalaka, eko lʼatei aye. We huka elanyelu woma ntu.

¹⁶Lushi lako, wayutela Jerusalema vati: Tukaki woma! La Siona vati: Anya aye tawokomoki!

¹⁷Latuyalaka, Unyashungu aye, eko lʼatei aye, Ondoshi wʼata, latushanaka elembielo. Ndi ayongenangena utamanya lu dikambu dianye. Ndi ayukulula la ngandji kandi, Ayukongenangena utamanya imba esambu la diui dia wulu,

¹⁸Uku lu lushi la wuki. Dimi layunya lukulu lʼengeno uma le nyu, Ne dia nyu nyutukuyala la tshumu lu dikambu diako.

¹⁹Nyulungi, lʼetena kako dimi layendana la waku watunyusuyaka. Dimi layushimbela akanga wa tshumbi, Layusanganya wane wakatshanyema. Dimi layukadimula sonyi kawo lutumbu la lukumu lu kete tshe.

²⁰Lʼetena kako, dimi layunyela leko, Ndu lʼetena kako, kayumunyusanganya. Ee, dimi layunyete lukumbu, La lutumbu lʼatei a wedja tshe wa la kete, Lamʼayumunyukaluya engonyi anyu La ntundu kʼashu anyu, mbata Latuyalaka.