Read tetala Hangai 1 Bible Online

Hangai 1 - tetala bible

Hangai 1

¹Lʼeleku ka hendi ka khumʼekanga Dariyo, lu lushi la ntundu la ngondo ka samalu, diui dia Latuyalaka diakayi le Zerubabele, onʼa Sheyalatiyele, umbuledi wa Juda, la le Jashua, onʼa Jehozadaka, olombedi a ladiku, uma lʼunyo wa umvutshi Hangai,[1] ati:

²Latuyalaka Kanga lulimbilimbi kata ati: Wudja one mvutaka vati: Etena katakuki ka mpika luudu la Latuyalaka ntu.

³Diako mbakayi diui dia Latuyalaka le wo uma lʼunyo wʼumvutshi Hangai ati:

⁴Undi, onʼeli etena ka nyu mbidjase lu mvudu yanyu ya ladiku, lamʼambulana luudu lone?

⁵Kakiane, Latuyalaka Kanga lulimbilimbi kata ati: Nyukani yimba dia etsha anyu.

⁶Nyu nyakune efula, keli nyakani tshitshe. Nyu nyatolekaka, keli nyu hanyuluti; nyu nyatonokaka, keli hanyutunduyaka pusa. Nyu nyatolotaka, keli nduku untu lambulumbialumbiama. La one latulungulaka difutu, atulungulaka difutu dia didja lu tapa dieli la weshu.

⁷Latuyalaka Kanga lulimbilimbi kata ati: Nyukani yimba dia etsha anyu.

⁸Nyumbeli ladiku diʼukungu, nyutokote etamba, nyuyuhiki luudu. Ku dimi layongenangena loko, layutumbwama, mbata Latuyalaka.

⁹Nyu nyakayangi efula, keli nyakatani yema tshitshe. Ku lamʼakanyayela la ngelu, dimi lakayifufi lumu, lakayifumbula. Okoko wana? mbambula Latuyalaka Kanga lulimbilimbi. Ne dia nyu nyatulawoka untu lʼuntu utsha lu luudu landi lamʼambulana luudu lami.

¹⁰Uma lu dikambu dianyu mbambukimela ulungu dihohe, mbambukimela kete tumbatumba diayo.

¹¹Dimi laketi owo ladiku dia kete, ladiku diʼekungu, ladiku dia wehu, ladiku dia ashi wʼelua, ladiku dia iso, ladiku dia kene tshe katutumbaka lu kete; ladiku dia antu, ladiku dia dungalunga, ndu ladiku diʼelimu tshe wʼanya.

¹²Zerubabele, onʼa Sheyalatiyele, Jashua, onʼa Jehozadaka, olombedi a ladiku, la atshikadi tshe wa wudja, wakakitanyia diui dia Latuyalaka, Unyashungu awo, ndu aui wa umvutshi Hangai, uku akutumi Latuyalaka, Unyashungu awo. Wudja wakuki woma la ntundu ka Latuyalaka.

¹³Ku Hangai, dikendji dia Latuyalaka, akatela wudja diui diakawutela Latuyalaka ati: Dimi leko la nyu, mbata Latuyalaka.

¹⁴Latuyalaka akahashahasha nyuma ka Zerubabele, onʼa Sheyalatiyele, umbuledi wa Juda, la nyuma ka Jashua, onʼa Jehozadaka, olombedi a ladiku, ndu nyuma ya atshikadi tshe wa wudja. Ku vo wakayi, wakayukamba ulimu wa luudu la Latuyalaka, Unyashungu awo, Kanga lulimbilimbi,

¹⁵lu lushi la akumi ahendi lʼanei la ngondo ka samalu.