Read tetala Hangai 2 Bible Online

Hangai 2 - tetala bible

Hangai 2

¹Lu eleku ka hendi ka khumʼekanga Dariyo, lu ngondo kʼesambeli, lu lushi la akumi ahendi lʼotoi, diui dia Latuyalaka diakayi le umvutshi Hangai ati:

²Kakiane, umbuli Zerubabele, onʼa Sheyalatiyele, umbuledi wa Juda, la Jashua, onʼa Jehozadaka, olombedi a ladiku, la atshikadi wa wudja wati:

³Utshikadi akona lʼatei anyu, akenyi luudu lone lu lutumbu lalo la ntundu?[2] La ukundi alenanyu kakiane? Lo halenama lu ashu anyu uku engo kʼanyanya uka?

⁴Keli kakiane, ukikitali, we Zerubabele, mbata Latuyalaka. Ukikitali, we Jashua, onʼa Jehozadaka, olombedi a ladiku, ndu nyu antu tshe wa lu kete, nyukikitali. Nyukambi ulimu, ne dia Jimi leko la nyu, mbata Latuyalaka Kanga lulimbilimbi.

⁵Uku diui diakamadji la nyu sheki lamʼakanyatumbi uma lʼEdjibitu,[3] ndu Nyuma kami keko lʼatei anyu, tanyukaki woma.

⁶Ne dia Latuyalaka Kanga lulimbilimbi kata ati: Etena otoi kambutshikala, etena ka tshitshe, ku dimi layusutshasutsha ulungu la kete,[4] ashi a waki la kete yʼufumbu.

⁷Dimi layusutshasutsha wedja tshe dia diango diʼushinga a wulu dia wedja tshe ndja. Ku dimi layuludia luudu lone la lutumbu, mbata Latuyalaka Kanga lulimbilimbi.

⁸Fesa yeli yami, ndu paunyi yeli yami, mbata Latuyalaka Kanga lulimbilimbi.

⁹Lutumbu la lʼokongo la luudu lone layuleka la ntundu wuki, mbata Latuyalaka Kanga lulimbilimbi. Ndu lu dihuli ne, kayumukimo ki, mbata Latuyalaka Kanga lulimbilimbi.

¹⁰Lu lushi la akumi ahendi lʼanei la ngondo ka divwa, lʼeleku ka hendi ka diulelu dia Dariyo, diui dia Latuyalaka diakayi le umvutshi Hangai ati:

¹¹Latuyalaka Kanga lulimbilimbi kata ati: Umbuli elombedi lu dikambu diʼelembe wati:

¹²Naka untu omotshi ambemba nyama kʼekila lʼuhimbu wa dihondo diandi, ku uhimbu andi wambutusakana la ma kana usawu, wanu kana iso, kuyanga ma dikina, engo kako mbeyaka ndjala ekila? Ku elombedi wakûkaluya diui vati: Kema.

¹³Ku Hangai akambula ati: Naka untu lakasanyi uma lu esakanelu kandi la udu,[5] ayunanda engo kemotshi lʼatei a diango ne, undi, to mbeyaka mbisana? Ku elombedi wakûkaluya diui vati: To mbeyaka mbisana.

¹⁴Ku Hangai akakaluya diui ati: Latuyalaka kata ati: Osoku mbeli antu ane; osoku mbeli wudja one la ntundu kami. Ndu osoku mbeli elimu tshe wʼanya awo. Kene katuwulambulaka leko, keko mindu.

¹⁵Kakiane, dimi lambunyosengasenga nti: Nyukani yimba umaka elo pulu ndu lu nshi ya lʼokongo, la ntundu ka dive diatakitshama ladiku dia dive lʼetemwelo ka Latuyalaka.

¹⁶Ngandi akinyu? Lamʼakayi untu lʼului wa tediko akumi ahendi, ndi akatani paka dikumi. Lamʼakatshu untu dia ntotekola tediko akumi atanu ta wanu lu ludu, ndi akatani paka akumi ahendi.

¹⁷Dimi lakanyusuya la elanyelu ka mbu ya nde, la pota ndu la mvula ka mboko lu elimu tshe wʼanya anyu. Keli nyu kunkadimo le mi, mbata Latuyalaka.

¹⁸Dimi lambunyosengasenga nti: Nyukani yimba umaka elo pulu ndu nshi ya lʼokongo, umaka lu lushi la akumi ahendi lʼandi la ngondo ka divwa, umaka lushi lakahikama etshina kʼetemwelo ka Latuyalaka. Nyukani yimba lu dikambu ne.

¹⁹Undi, weuhu wekiko lu apenge? Okodi wa vinyo, utamba wa fingu, la utamba wa mbeli konto nduku engo? Keli umaka lushi lʼelo, dimi layunyotshokola.

²⁰Diui dia Latuyalaka diakayi etena ka hendi le Hangai, lu lushi la akumi ahendi lʼanei la ngondo ati:

²¹Uteli Zerubabele, umbuledi wa Juda, wati: Dimi layusutshasutsha ulungu la kete.

²²Dimi layokosha kiti ya waulelu, layulanya wulu a waulelu wa wedja, layokosha pusupusu kame la waku watahemaka loko. Falasa la ambahemi ayo wayoko, untu lʼuntu ayudiakema la yombo ya unyandi.

²³Latuyalaka Kanga lulimbilimbi kata ati: Lushi lako, dim, layukosa we ukambi ami, Zerubabele, onʼa Sheyalatiyele, mbata Latuyalaka. Dimi layukete uku djimbitelu; ne dia dimi lakakosonola, mbata Latuyalaka Kanga lulimbilimbi.