Read tetala Zekariya 12 Bible Online

Zekariya 12 - tetala bible

Zekariya 12

¹Enelo ka diui dia Latuyalaka lu dikambu dia Isariyele. Okone mbata Latuyalaka, lakananula ulungu, lakashikike etshina ka kete, ndu lakatungi nyuma keli lʼutema wʼuntu, ati:

²Ulungi, dimi layete Jerusalen a dikoho dia ntakanya wedja tshe wadingi. Dio diayuyala ladiku dia Juda ntu, ndu diayuyala lu edingelu ka ndosha Jerusalema.

³Lushi loso, dimi layete Jerusalema dive dia wutshu le wedja tshe. Wane wayudiunyia, wayuhumo wulu, ku wedja wa la kete wayusanganyema kame dia dilosha.

⁴Latuyalaka kata ati: Lu lushi lako, dimi layutsha falasa tshe woma wa mamba, ndu ambahemi ayo la yimba ntshimba. Keli dimi layudihula ashu ami ladiku dia khumbu ka Juda, ndu layokomola falasa tshe ya wedja dia yo ndjala tutshungu.

⁵Ku wauhu wa Juda wayuta lʼetema awo vati: Asi Jerusalema weli wulu asu le Latuyulaka, Unyashungu awo, Kanga lulimbilimbi.

⁶Lushi lako, dimi layete wauhu wa Juda uku ekango ladiku dia kunyi ya dja, uku uwa mbaheta lʼatei a dikanda diʼepunga. Yo wayudiaka wedja tshe wadingi lu lunya la pami ndu lu lunya la lomoso. Wane weli la Jerusalema wayudjase ntu lu dihuli diawo hita, la Jerusalema.

⁷Latuyalaka ayushimbela mvudu yʼapema ya Juda ntundu, ne dia lutumbu la khumbu ka Davidi la lutumbu lʼasi Jerusalema latukediama ladiku dia Juda.

⁸Lushi loso, Latuyalaka ayulama asi Jerusalema; one leli wodu lʼatei awo, ayuyala uku Davidi, la khumbu ka Davidi wayuyala uku Unyashungu, uku ndjelo wa Latuyalaka la ntundu kawo.

⁹Lushi lako, dimi layuyanga nanya wedja tshe watuyakaka dia ndjolosha Jerusalema.

¹⁰Dimi layutshulwela khumbu ka Davidi la asi Jerusalema nyuma ka ngandji ka mamba ndu ka osengosengo. Vo wayenda one lakawungula dikonga.[26] Vo wayulela uku atulelaka untu onʼandi etoi. Vo wayuyala la okei lu dikambu diandi, uku atuyalaka untu la okei lu dikambu dia onʼandi lʼenundu.

¹¹Lushi loso, utanda a wuki ayuyala la Jerusalema, uku utanda wa Hadadarimona lʼukidi wa Mengido.

¹²Wudja wayuyala la utanda, diuhu la diuhu wayatana: diuhu dia khumbu ka Davidi laandi, wadiewo laandi; diuhu dia khumbu ka Natana laandi, wadiewo laandi;

¹³diuhu dia khumbu ka Lewi laandi, wadiewo laandi; diuhu diʼasika Shimei laandi, wadiewo laandi;

¹⁴la wauhu tshe wutshikadi, diuhu la diuhu laandi, wadiewo laandi.