Read tetala Zekariya 14 Bible Online

Zekariya 14 - tetala bible

Zekariya 14

¹Enda, lushi la Latuyalaka leko lundjayi. Diango diaye dia dimbu diayukahanyema lʼatei aye, we Jerusalema,

²ne dia dimi layusanganya wedja tshe dia nkolosha. Vo wayosa usumba, wayulanya mvudu, wayeyana la amantu la wulu. Etenyi ka hendi kʼusumba kayutsho lu fumbi, keli atshikadi wa wudja hawunyema uma lʼusumba.

³Ku Latuyalaka ayutumba, ayolo la wedja ako, uku atundolokaka lu lushi la ta.

⁴Lushi lako, ekulu andi wayemala ladiku diʼUkungu wʼEweli, welanedi la Jerusalema, lu leke lʼehutwelu. Ukungu wʼEweli wayate palala kʼatei atei, uma lu leke lʼehutwelu pulu ndu lu leke lʼedjelu, ku luwinga la wuki layuyala laawo. Etshi kemotshi kʼUkungu kayutsho utsha lu leke la ngelʼa kushi, la etshi kekina utsha lu leke la diku dia kushi.

⁵Luwinga lʼekungu ami layufame, ne dia luwinga lʼekungu layutukama lʼumamu alo. Okone nyu nyayulawo, uku akanyalawo edidimelu ka kete in nshi ya Uziya, khumʼekanga ka Juda. Ku Latuyalaka, Unyashungu anyu, ayuya, ndu ekilami tshe kame la ndi.

⁶Lushi lako, huyala tshitshi kuyanga dihohe diʼekama.

⁷Keli lo, layuyala lushi otoi leyama le Latuyalaka: huyala yanyi ndu huyala utshu, keli usasi wayuyala lʼetena ka dikolo.

⁸Lushi lako, ashi wa nkela wayutumba uma la Jerusalema.[28] Etenyi ka hendi kʼashi ako kayokelaka utsha lʼashi a waki wa lu leke lʼehutwelu, la etenyi ka hendi utsha lu ashi a waki wa lu leke lʼedjelu. Osoku mbayuwuyalaka lʼowo ndu la diye.

⁹Latuyalaka ayuyala khumʼekanga ka kete tshe. Lu lushi loso, Latuyalaka ayuyala otoi, la lukumbu landi otoi.

¹⁰Kete yayukadimo usui, uma la Ngeba pulu la Rimona, la diku dia kushi dia Jerusalema. Keli Jerusalema ayediama, ayutshikala lu dihuli diakiyo, uma la Suku dia Bendjamina pulu lu suku dia ntundu, edja ndu la Suku dia Tshuku; la uma lʼEtangelu ka Hananele edja ndu lu tundju ta mamula elua wa vinyo ta khumʼekanga.

¹¹Antu wayudjase leko, leko huyala mananu ntu.[29] Keli Jerusalema ayudjase la lutui tshitshi.

¹²Onʼeli sui diayusuya Latuyalaka wedja tshe wakalo la Jerusalema: emunyi awo wayohonda vame wakemadi lʼekulu awo; ashu awo wayohonda lu weuku awo; ndu nimi yawo yayohonda lu enyo awo.

¹³Lushi loso, lundju la wulu layuyala lʼatei awo le Latuyalaka. Vo tshe untu lʼuntu ayukimela lunya la unyandi, ku lunya landi layolo la lunya la unyandi.

¹⁴Juda ayolo la Jerusalema ntu, ku wayomotsha ekundji wa wedja tshe wa lʼutshimba: paunyi, fesa, la ahondo, efula kahangone.

¹⁵Sui dia wuhu ako diayuyala le falasa, le efalasafalasa, le kamelo, le punda, ndu le nyama tsne yayuyala lu pangu yako, uku sui diako.

¹⁶Antu tshe wakatshikala lʼatei a wedja, wakatshokaka dia ntolo la Jerusalema, wayutshokaka eleku lʼeleku dia ntotemola Khumʼekanga Latuyalaka Kanga lulimbilimbi, ndu dia ntutshaka dambu dia tutumbutumbu.[30]

¹⁷Naka diuhu dimotshu lʼatei a wauhu wa la kete hadiutshu la Jerusalema dia ntotemola Khumekanga Latuyalaka Kanga lulimbilimbi, mvula holo le wo.

¹⁸Naka diuhu dia Edjibitu hadiutshu, ndu hadiuyakimo, Latuyalaka ayasuya la sui diayundusuya wedja wahatutshokaka dia ntutsha dambu dia tutumbutumbu.

¹⁹Oso eli sui diʼEdjibitu ndu sui dia wedja tshe wahatutshokaka dia ntutsha dambu dia tutumbutumbu.

²⁰Lushi lako, ayufundama ladiku dia tungunga ta falasa ati: Ekila le Latuyalaka! Puki ya lu luudu la Latuyalaka yayuyala uku alonga la ntundu kʼediakelu.

²¹Puki tshe ya la Jerusalema la ya la Juda yayuyala ekila le Latuyalaka Kanga lulimbilimbi. Ku wane tshe watulambulaka ulambu, wayuyakaka la ndjuyosa dia nkateka enatshi wʼulambu loko. Lushi lake asi ukanda hawuyala ntu lu luudu la Latuyalaka Kanga lulimbilimbi.