Read tetala Zekariya 7 Bible Online

Zekariya 7 - tetala bible

Zekariya 7

¹Lu eleku ka nei ka diulelu dia Dariyo, diui dia Latuyalaka diakayi le Zekariya lu lushi la nei la ngondo ka divwa, ketawo vati: Kisleve.

²Ku asi Betele wakatumi Sharezere, la Rengeme-Meleke kame la antu awo, dia ntolomba Latuyalaka etshoko,

³ndu dia ntumbula elombedi wa luudu la Latuyalaka Kanga lulimbilimbi la amvutshi vati: Undi shu mbeyaka ndela lu ngondo ka tanu, la ndjatula uku akatatshaka deku efula?

⁴Ku diui dia Latuyalaka Kanga lulimbilimbi diakayi le mi ati:

⁵Ututeli antu tshe wa lu kete la elombedi wati: Undi, lamʼakanyakili mbu ya nde, ndu lamʼakanyalelaka lu ngondo ka tanu ndu lu ngondo kʼesambeli, lu deku ne akumi esambeli, lu dikambu diami kanyakilaka?

⁶Limʼatunyolekaka, ndu lamʼatunyonokaka, nyu hanyutolekaka dikambu dianji nyame, ndu hanyutonokaka dikambu dianyu nyame?

⁷Nyu kumbuka aui wa Latuyalaka aso, wakataka amvutshi wa ntundu, lamʼaki Jerusalema la antu ndu la ongonyi kame la esumba ayo wa lʼutshimba, kete ya la diku dia kushi ndu kete ya lʼukidi la antu uka?

⁸Diui dia Latuyalaka diakayi le Zekariya ati:

⁹Latuyalaka Kanga lulimbilimbi kata ati: Nyusambulaki sambu ka mete, untu lʼuntu enya unyandi ololo la ketshi.

¹⁰Tanyusuyaki wadi aki udu, ona etshiki, ongendangenda kuyanga usi wula, tanyusanguyaki dia untu ntshela unyandi kolo lʼutema andi.

¹¹Keli vo wakatuni dia mpukama, wakanyonye aheka, wakadihi atui awo diaha vo mbuka.

¹²Vo wakakeketsha etema awo wulu uku dive, ne dia watukuka elembe la aui wa Latuyalaka Kanga lulimbilimbi, wakandatumi uma le Nyuma kandi le amvutshi wa ntundu. Diako mbakayi ududu a wulu uma le Latuyalaka Kanga lulimbilimbi.

¹³Lamʼakamawaeti, vo kumbetawo; ku lamʼakawambeti, ndu dimi kumbaetawo, mbata Latuyalaka Kanga lulimbilimbi.

¹⁴Dimi lakadianganya la punganendji lʼatei a wedja tshe wakiwo kumbeya. Okone kete yakalana lʼokongo awo wuhu waheyi untu mbeta kuyanga nkalula, ne dia vo wakete kete yʼololo shenga.