Read tetala Zekariya 8 Bible Online

Zekariya 8 - tetala bible

Zekariya 8

¹Diui dia Latuyalaka Kanga lulimbilimbi diakayi le mi ati:

²Latuyalaka Kanga lulimbilimbi kata ati: Dimi mbukaka Siona kandjema ka wulu. Dimi lambuyuka kandjema lʼududu wa wulu.

³Latuyalaka kata ati: Dimi layukalula la Siona, ndu layudjase lʼatei a Jerusalema. Ku Jerusalema ayetama usumba wa kolamelu la ukungu wa Latuyalaka Kanga lulimbilimbi, ati: Ukungu wʼekila.

⁴Latuyalaka Kanga lulimbilimbi kata ati: Esumbi wʼapami la esumbi wʼamantu wayudjase ntu lʼesese wa Jerusalema, untu lʼuntu ukimedi okomba lu lunya, ne dia efula ka deku diawo.

⁵Esese wʼusumba wayulula too lʼakenda wʼapami, la akenda wʼamantu, watakenya lʼesese awo.

⁶Latuyalaka Kanga lulimbilimbi kambula ati: Naka dikambu so diaki dikambu dia mamba lu nshi sho lu ashu wʼatshikadi a wudja one, olo mbeyaka ndjala dikambu dia mamba lu ashu ami uka?

⁷Latuyalaka Kanga lulimbilimbi kata ati: Dimi layushimbela wudja ami uma lu kete ya lu leke lʼehutwelu, ndu uma lu kete ya lu leke lʼedjelu.

⁸Dimi layutuwaosa, ku vo wayuyudjase lʼatei a Jerusalema. Vo wayuyala wudja ami, la dimi layuyala Unyashungu awo, lu akambu wa mete, ndu lu akambu wʼusimbwi.

⁹Latuyalaka Kanga lulimbilimbi kata ati: Anya anyu wakikitali, nyu wane watukaka aui ane nshi nye uma lʼenyo wʼamvutshi wakiko lu lushi lakawahiki etshina ka luudu la Latuyalaka Kanga lulimbilimbi, dia mpika etemwelo.

¹⁰La ntundu ka nshi sho, ulimu wʼuntu kundjala la difutu, kuyanga elungalunga kundjala la difutu. Ki kundja le one lakatumbaka, kuyanga lakotoka dikambu diʼutunyi, ne dia dimi lakasonganya antu tshe, untu lʼuntu la unyandi.

¹¹Keli kakiane, dimi halutshela atshikadi wa wudja one uku nshi ya ntundu, mbata Latuyalaka Kanga lulimbilimbi.

¹²Eunelu ka weuhu ka ki kayuyala; ekodi wa vinyo wayoto elua awo. Kete yayutundja diango diayo; ulungu wayutuma dihohe diawo. Ku dimi layusha atshikadi wa wudja one diango ne tshe, dia vo ndjala akanga adio.

¹³Nyu khumbu ka Juda la khumbu ka Isariyele, uku akinyu engo ka mananu lʼatei a wedja, osoku mbayumunyushimbela, ku nyu nyayuyala otshoko. Tanyukaki woma, keli anya anyu wakikitali.

¹⁴Latuyalaka Kanga lulimbilimbi kata ati: Lamʼakambukia washenyu kele, dimi lakakani dia nyutshela kolo, dimi konemba utema, nbata latuyalaka Kanga lulimbilimbi.

¹⁵Osoku mbakamakani ntu nshi nye, dia ntshela Jerusalema la khumbu ka Juda ololo: tanyukaki woma

¹⁶Onʼeli akambu wayunyutshaka: kanyutanelaki akambu wa mete, untu lʼuntu la unyandi;[18] kanyusambulaki sambu ka mete la ki lu asuku anyu.

¹⁷Tanyusanguyaki akambu wa kolo lʼetema anyu, dia untu ntshela unyandi kolo. Tanyetawoki etshibelu ka kashi, ne dia akambu a so tshe mbatumuhetshaka, mbata Latuyalaka.

¹⁸Diui dia Latuyalaka Kanga lulimbilimbi diakayi le mi ati:

¹⁹Latuyalaka Kanga lulimbilimbi kata ati: Ekilelu ka mbu ya nde ka lu ngondo ka nei, ka lu ngondo ka tanu, ka lu ngondo kʼesambeli, ndu ka lu ngondo ka dikumi, kayukadimo etena kʼongenongeno, kʼongenongeno a wuki, ndu kʼalambu wʼongenongeno le khumbu ka Juda. Okone nyulangi akambu wa mete la akambu wa ki.

²⁰Latuyalaka Kanga lulimbilimbi kata ti: Etena kemotshi keko kayuya wedja lʼantu wa lʼesumba efula.

²¹Antu wa lʼusumba omotshi wayutsho utsha lʼusumba ukina, wata vati: Tutshu esadi dia ntosengasenga Latuyalaka, dia ntuyanga Latuyalaka Kanga lulimbilimbi, ndu shu tayutsho.

²²Mete, antu efula la wedja wa wulu wayuya dia ndjuyanga Latuyalaka Kanga lulimbilimbi la Jerusalema, ndu dia ndjosengasenga Latuyalaka.

²³Latuyalaka Kanga lulimbilimbi kata ati: Lu nshi sho, antu dikumi wʼuma lʼeteketa tshe wa wedja wayukimela usi Juda otoi lʼuhimbu wa dihondo diandi, wata vati: Shu tayutsho kame la nyu, ne dia shu takuki lukumu ati: Unyashungu eko kame la nyu.