Read tetala Malaki 1 Bible Online

Malaki 1 - tetala bible

Malaki 1

¹Enelo ka diui dia Latuyalaka uma le Malaki le Isariyele.

²Latuyalaka kata ati: Dimi lakanyulangi. Keli nyu mumbulaka nyati: Lu na akayatulangi? Esau, aha onangu Jakoba? mbambula Latuyalaka. Dimi lakalangaka Jakoba,[1]

³lakahetsha Esau.[2] Dimi lakete leke landi lʼakuna shenga tshu, lakakimo ukito andi le wambulu ya lʼusui wa shenga.

⁴Latuyalaka Kanga lulimbilimbi kata ati: Naka Edome wayuta vati: Shu tambudianganyema, keli tayuhika ahuli wakalanyema ntu! Vo wayuhika, keli dimi layunyukula. Antu wayuwaeta vati: Kete ya kolo, wudja wakukama kele le Latuyalaka pundju.

⁵Ashu anyu wayena dikambu diako, ku nyu nyayuta nyati: Latuyalaka atumbwami la wedi wʼulelu wa Isariyele!

⁶Ona atolemiaka shi, ukambi atolemiaka uwandji andi. Ku naka dimi leli shenyu, lenceli nemo diatunyonemiaka? Naka dimi leli uwandji, lendʼeli woma watunyumbukaka? mbanyumbula Latuyalaka Kanga lulimbilimbi, nyu elombedi watonyolaka lukumbu lami. Nyu nyatumbulaka nyati: Lu na atutonyolaka lukumbu laye?

⁷Nyu nyatulambulaka ma diambusana lu ediakelu kami, ku nyu mumbulaka nyati: Lu na akatadisanya? Diako mbatunyutaka nyati: Mesa wa Latuyalaka wambonywama.

⁸Undi, lamʼatunyulambulaka nyama ya tutshungu ulambu,[3] dikambu diku kema kolo? Lamʼatunyulambulaka nyama ya tshumbi ndu yeli la kandji, dikambu diku kema kolo uka? Kakiane, nyuhuyisha umbuledi anyu! Ndi ayuyingenangena kuyanga nyongenangena etundu anyu? mbambula Latuyalaka Kanga lulimbilimbi.

⁹Lambunyosengasenga kakiane nti: Nyosengesenge Unyashungu, dia ndi ntuka ngandji ka mamba! La wuhu one wa ushasha uma le nyu, dimi mbeyaka nungula otoi anyu omotshi lʼongenongeno? mbambula Latuyalaka Kanga lulimbilimbi.

¹⁰Utunduyala untu omotshi ayali lʼatei anyu dia ndjiha kuki, diaha nyu mpetsha dja anyanya lu ediakelu kami li! Dimi hanyongenangena, ndu halulungula elambu uma lu anya anyu, mbata Latuyalaka Kanga lulimbilimbi.

¹¹Uma lʼehutwelu ka unya pulu ndu lʼedjelu kawo, lukumbu lami layuyala wuki lʼatei a wedja. Wayulambula lukumbu lami malashi la ulambu wa pudipudi lu ahuli tshe, ne dia lukumbu lami layuyala wuki lʼatei a wedja, mbata Latuyalaka Kanga lulimbilimbi.

¹²Keli nyu nyatululanyaka lamʼatunyutaka nyati: Mesa wa Latuyalaka wambusana: elua weli loko, ma diawo, diambonywama.

¹³Nyu mvutaka ntu nyati: Nyendi, ndi uheko weli dikambu ne li! Nyu nyato-monyolaka, mbata Latuyalaka Kanga lulimbilimbi. Nyu nyatumbelaka nyama ka lohotola, kʼetshumbi, kuyanga keli la kandji; wuhu wʼulambu oso mbatunyumbelaka. Undi, dimi mbeyaka mbulungula uma lʼanya anyu? mbambula Latuyalaka.

¹⁴Keli mananu kayali le kanga lukesu, leli la okoko wʼumi lu limba landi, latutshikaka dokoloko, ku ndi ndjukimo one weli la ekomo le Khumadiondjo! Ne dia dimi leko Khumʼekanga ka wuki, la lukumbu lami leko woma lʼatei a wedja, mbata Latuyalaka Kanga lulimbilimbi.