Read tetala Malaki 2 Bible Online

Malaki 2 - tetala bible

Malaki 2

¹Nyulungi, nyu elombedi, olembe one ambuyala lu dikambu dianyu!

²Naka nyu hanyulungi, naka nyu hanyusanguya lʼetema dia ntumbula lukumbu lami, ku layunyutumela mananu; layudja etshoko anyu mananu, mbata Latuyalaka Kanga lulimbilimbi. Ee, dimi lambuwedjaka mananu, ne dia nyu kundisanguya lʼetema.

³Nyulungi, dimi layuhangwela anʼanyu. Dimi layunyutela tumi lu dundji dianyu, tumi ta nyama yʼelambu anyu. Dimi layunyunya uma la ntundu kami.

⁴Ku nyu nyayeya nyati: Dimi kakatumi olembe one le nyu, dia sheki yami yakamadji la Lewi[4] nshikikala, mbata Latuyalaka Kanga lulimbilimbi.

⁵Sheki yami yakamadji la ndi, yaki sheki ya lumu ndu ya ki.[5] Dimi lakawusha lumu la ki dia ndi mbukami woma. Ku ndi akambuki woma, akalemia lukumu lami.

⁶Elembe wa mete waki lʼunyo andi, dikambu diahasimbwi kuntanema lʼelomo andi. Ndi akakendakendaka la mi lu ki ndu lu akambu wʼusimbwi. Ndi akakadimula antu efula uma lu kolo.

⁷Elomo wʼolombedi mpumbaka nama ewu, ne dia antu watumbulaka elembe uma lʼunyo andi. Ndi eko dikendji dia Latuyalaka Kanga lulimbilimbi.

⁸Keli nyu nyaketola uma lu mbuka, nyakatakanya antu efula uma lu elembe. Nyu nyakalanya sheki ya Lewi, mbata Latuyalaka Kanga lulimbilimbi.

⁹Diako mbakamanyete amonywami, la tufumbofumbo lu ashu wʼantu tshe, ne dia nyu kunama mbuka yami, keli nyakatshela antu la shonodi lu elembe.

¹⁰Shu tshe, aha shesu otoi mbeli la su? Shu kuntungama uma le Unyashungu wako wame? Okoko wana watututshanelaka la lukesu, untu lʼuntu la unyandi, dia nanya sheki ya washesu?

¹¹Juda akatshi lukesu; akambu wa wononyi wakatshama lu Isariyele ndu la Jerusalema. Juda akalanya etemwelo ka Latuyalaka kakandukaka ngandji, akatemola etemolatemola kʼasi wedja.

¹²Latuyalaka anya untu latutshaka osoku, leya mvuta aui kuyanga nkaluya diui, kana one latulambulaka ulambu le Latuyalaka Kanga lulimbilimbi, uma lu mvudu yʼapema ya Jakoba.

¹³Nyu nyatutshaka dikambu ne ntu: nyu nyatukumbaka ediakelu ka Latuyalaka lʼasoi, lʼalelu ndu lʼakhumu. Keli ndi hadji ashu lu elambu nduku yema, kuyanga mbelungula lʼongenongeno uma lʼanya anyu.

¹⁴Ku nyatumbulaka nyati: Dikambu kuna? Ne dia Latuyalaka aki omenyi lʼasaye la wadi la lu nshi yaye ya dikenda, lakayakesi kuyanga mbendi wadeye, wadi a sheki yaye.

¹⁵Aha otoi mbakatutungi Unyashungu, ndu mbakandatusukela lu nyuma ka lumu? Okoko wana otoi? Ne dia ndi akayangi tukanula ta nemo. Okone nyewo nyuma yanyu. Untu takesaki wadi la lu nshi yandi ya dikenda.

¹⁶Dimi latutunaka ediakelu ka diwala, mbata Latuyalaka, Unyashungu wa Isariyele, ndu one latuyakumbaka dihondo la ngala, mbata Latuyalaka Kanga lulimbilimbi. Okone nyewo nyuma yanyu, ne dia nyutukutsha lukesu.

¹⁷Nyu nyakahekuya Latuyalaka lʼaui anyu, keli nyu nyatumbulaka nyati: Lu na akatuhekuya? Ne dia nyu nyatutaka nyati: Untu tshe latutshaka kolo, eko ololo lu ashu wa Latuyalaka. Ndi ato-ngenangenaka dikambu diawo; ndu ne dia nyu mumbulaka nyati: Lendʼeli Unyashungu wa sambu kʼololo?