Read tetala Mateu 1 Bible Online

Mateu 1 - tetala bible

Mateu 1

¹Okondo a diuhu dia Jesu Kristu, kanula ya Davidi, kanula yʼAbarahama, one:

²Abarahama akuti Isaka. Isaka akuti Jakoba. Jakoba akuti Juda la anangu.

³Juda la wadendi Tamara wakuti Pereze la Zera. Pereze akuti Hezerona. Hezerona akuti Rama.

⁴Rama akuti Aminadaba. Aminadaba akuti Nashona. Nashona akuti Salamona.

⁵Salamona la wadendi Rahaba wakuti Boaza. Boaza la wadendi Ruta wakuti Obede. Obede akuti Jese.

⁶Jese akuti Davidi, khumʼekanga. Davidi la wadi aki Umya wakuti Solomona.

⁷Solomona akuti Rehoboama. Rehoboama akuti Abidja. Abidja akuti Asa.

⁸Asa akuti Jehoshafata. Jehoshafata akuti Jorama. Jorama akuti Uziya.

⁹Uziya akuti Jotama. Jotama akuti Ahaza. Ahaza akuti Hezekiya.

¹⁰Hezekiya akuti Manase. Manase akuti Amose. Amose akuti Josiya.

¹¹Josiya akuti Jekoniya la anangu, Tetena kakawatole la Babilona.[1]

¹²Lʼokongo wʼetolamelu kawo la Babilona, Jekoniya akuti Sheyalatiyele. Sheyalatiyele akuti Zerubabele.

¹³Zerubabele akuti Abiyude. Abiyude akuti Eliyakima. Eliyakima akuti Azora.

¹⁴Azora akuti Zadoka. Zadoka akuti Akima. Akima akuti Eliyude.

¹⁵Eliyude akuti Eleazara. Eleazara akuti Matana. Matana akuti Jakoba.

¹⁶Jakoba akuti Josefu, umi a Mamya, nyangu Jesu, letawo vati: Kristu.

¹⁷Okone nonga tshe uma le Abarahama edja ndu le Davidi, yaki nonga dikumi la nyei. Uma le Davidi edja ndu lamʼakawatole la Babilona, yaki nonga dikumi la nyei. Uma lamʼakawatole la Babilona edja ndu le Kristu, yaki nonga dikumi la nyei.

¹⁸Eutwelu ka Jesu Kristu kaki okone. Lamʼakambamela Mamya, nyangu, le Josefu,[2] la ntundu ka vo wateyana, ndi akatanema la diemi diakandiatshu uma le Nyuma kʼOlolo.

¹⁹Umendi Josefu aki untu ololo. Ndi kunanga mbenyanya, akalangi mbukimo lu usheshe.

²⁰Keli lamʼakandiakanaka dia akambu aso, nyulungi, ondjelo a Khumadiondjo akene le ndi lu do. Ndi akawutela ati: We Josefu, kanula ya Davidi, tukaki woma dia mbosa wadeye Mamya. Ne dia diemi diutshwindi diku, dieli uma le Nyuma kʼOlolo.

²¹Ndi ayuta ona pami. Kuwole wati: JESU,[3] ne dia ndi kayushimbela wudja andi uma lu kolo yawo.

²²Dikambu ne tshe diambuya dia nshidiya diui diakati Khumadiondjo lʼunyo wʼumvutshi ati:

²³Ulungi, usekaseka wʼemuma ayutsho diemi. Ndi ayuta ona pami. Kawuwole vati: Emanuwele,[4] (Kitshimudi ati: Unyashungu la su).

²⁴Lamʼakemo Josefu uma lu djo, ndi akatshi uku akawutela ondjelo a Khumadiondjo. Ndi akose wadendi.

²⁵Keli ndi kumbeyana la ndi edja ndu lamʼakanduti ona pami. Ku Josefu akawole ati: JESU.[5]