Read tetala Mateu 10 Bible Online

Mateu 10 - tetala bible

Mateu 10

¹Jesu aketi ambeki andi dikumi la ahendi, akawasha wulu wa vo mbahamela edienge, la wa mbatundja, la wa nkonoya wehu tshe wʼelandu la wehu tshe wa hemo.

²Kumbu ya atumami dikumi la ahendi nye. Ntundu ku Simona letawo vati: Petero, la Andere onangu; Jakoba onʼa Zebede, la Joani onangu;

³Filipo, la Baratolomayo, Tomasi, la Mateu, ulungudi wʼelambu, Jakoba onʼa Alafayo, Tadayo;

⁴Simona, usi Kanana, la Judasi Isakariyote, lakufungi.

⁵Jesu akatumi ambeki dikumi la ahendi ako, akawasha okende ati: Tanyutshokaki lʼatei wʼasi wedja, tanyotoki lʼusumba tshe wʼasi Samamya.

⁶Keli nyutshu le ekoko wakashisho lu khumbu ka Isariyele.

⁷Lamʼayunyutatshokaka, kanyutasambishaka nyati: Diulelu dia lʼulungu diaya suki.

⁸Nyokonoya akanga a hemo, nyululi edu, nyokonoya akanga a sudi, nyutundja edienge. Nyu nyakalungula ulungulalungula, nyukimo ukimokimo.

⁹Tanyudjaki paunyi, fesa, kuyanga ohotela lu atapa wa lu eya anyu.

¹⁰Tanyukimelaki tapa lu lokendo lanyu, kuyanga ekutu ehendi, kuyanga sabata, kuyanga danga, ne dia ukambi kukuki dia nkundja mbu yandi ya nde.[79]

¹¹Lamʼayunyukuma lʼusumba kana lu ngelu tshe, kanyuyangi untu lukuki nyulungula. Kanyudjase la ndi, edja ndu lamʼayunyunela.

¹²Lamʼayunyoto lu luudu, kanyusha wane weli loko moyo.

¹³Naka wane weli lu luudu lako weko ololo, ki kanyu kayali loko. Keli naka vo kema ololo, ki kanyu kakaluli le nyu.

¹⁴Untu lahunyulungula, kuyanga mbuka aui anyu, lamʼayunyutumba lu luudu lako kana lʼusumba ako, kanyuhumeli ditshu diʼuma lu akaka anyu.[80]

¹⁵Mete kanyutelami ndi: Lu lushi lʼelumbwelu, fono ka usumba ako kayuleka ka kete ya Sodoma[81] la Ngomora.[82] [83]

¹⁶Nyulungi, dimi lambunyutuma uku ekoko lʼatei wa ndjaundu.[84] Okone nyuyali la yewu uku elui, ndu memakana uku fudu ya binga.

¹⁷Keli nyewo antu ne dia o wayunyukimo lu dumbwelu, wayunyokomola lu temwelo diawo.

¹⁸Vo wayunyotola la ntundu ka embuledi la ka khumi ya dikanga dia dikambu diami, dia nyu ndjala emenyi la ntundu kawo ndu kʼasi wedja.

¹⁹Lamʼayuwunyukimo osoku, tanyuyakananyaki dia wuhu akona wayunyoteketa kana dia aui akona wayunyuta. Ne dia lu unya uku, wayunyusha aui wa nyu mvuta.

²⁰Ne dia aha nyu mbayoteketa, keli Nyuma ka Shenyu kayunyoteketsha.[85]

²¹Onangu ayukimo onangu dia ndi mvo, shi ayukimo onʼandi. Ana wayotombokwela ambutshi awo, wayatungela nyoi.[86]

²²Nyu nyayuhetshama le antu ne dia lukumbu lami.[87] Keli one latetemala edja ndu lʼekumelu, ayushimbamela.[88]

²³Lamʼayuwunyusuya lʼusumba omotshi, kanyulawo lʼusumba nkina. Mete kanyutelami ndi: La ntundu nyatashidiya nkindula lu esumba tshe wa lu Isamyele, Onʼa untu ayuya.

²⁴Umbeki haleki umbetsha andi,[89] ukambi haleki khumendi.[90]

²⁵Ambukuka dia umbeki ndjala uku umbetsha andi, la ukambi uku khumendi. Naka vo waketi kanga luudu vati: Belezebulu,[91] hawuleki mbeta antu andi osoku uka?

²⁶Okone tanyuwaukaki woma, ne dia nduku engo kambufwelamu, kahufuloma; nduku engo kambushama, kaheyama.[92]

²⁷Akambu wanyutelami lu udjima, kanyuwati lu yanyi. Akambu wukanyu lu hyotehote, kanyuwati lʼete a mvudu.

²⁸Tanyukaki wane wadiaka alimba woma, keli haweyi ndjaka lumu. Keli nyuleki mbuka one lukuki ndiaka ndu lumu ndu dimba lu luwinga la dja woma.

²⁹Hawutusundjaka tufudu tuhendi dikuta diame? Keli nduku otoi ayoko lu kete ku Shenyu heyi.

³⁰Ndu divu dia lʼete anyu diambalema tshe.

³¹Okone tanyukaki woma. Nyu nyambuleka tufudu efula limbu la wuki.

³²Okone untu tshe layumbetawo la ntundu kʼantu, ndu dimi layuwetawo la ntundu ka Papa leli lʼulungu.

³³Keli untu tshe layumanguna la ntundu kʼantu, ndu dimi layuwanguna la ntundu ka Papa leli lʼulungu.[93]

³⁴Tanyukanaki nyati: Dimi lakayi dia nyela ki la kete. Dimi kundja dia nyela ki, keli lakayi dia nyela yombo.

³⁵Dimi lakayi dia ndjatanya untu la shi, ona umuntu la nyangu, ndu olokayi la nyangu umendi.

³⁶Wane weli lu luudu wayuyala atunyi wa kanga luudu.[94]

³⁷Untu luka shi la nyangu ngandji kuleki kene kambukandi, ololo andi hakuki le mi; untu luka onʼandi la pami kana la umuntu ngandji kuleki kene kambukandi, ololo andi hakuki le mi.

³⁸Untu lahembe utamba andi wa mpeketanya, la handijeli, ololo andi hakuki le mi.[95]

³⁹Untu lalama lumu landi, ayulushisha; ku one lashisha lumu landi dikambu diami, ayulutana.[96]

⁴⁰One lanyulungula, ambunungula;[97] ku lanungula ambulungula one lakantumi.[98]

⁴¹One lalungula umvutshi lu lukumbu la umvutshi, ayulungula difutu dia umvutshi. One lalungula untu ololo lu lukumbu la untu ololo, ayulungula difutu dia untu ololo.

⁴²Untu tshe lasha otoi omotshi a wane wuleki tshitshe dikoho diʼashi a tshitshi tu lu lukumbu lʼumbeki, mete kanyutelami ndi: Ndi hushisha difutu diandi.