Read tetala Mateu 12 Bible Online

Mateu 12 - tetala bible

Mateu 12

¹Lʼetena keso, Jesu akatatenyanyaka lu dikambo diʼasami lushi lʼekila. Ambeki andi waki la ndjala, ku vo wakatatela muna nanula,[111] dia ndijile.

²Keli lamʼakenyi Afarise dikambu so, vo wakawutela vati: Endia, ambeki aye wambutsha dikambu dieli ekila ntsha lushi lʼekila.

³Ku ndi akawambula ati: Nyu nyatali dikambu diakatshi Davidi lamʼakindi la ndjala, ndi la wane waki la ndi?

⁴Ndu uku akandioto lu luudu la Unyashungu, uku akandiali ma dia Eyalelu,[112] diaki ekila ndi nde, ndi la wane waki la ndi, diakalekaka elombedi etu?[113]

⁵Undi, nyu nyatali lu elembe nyati: Elombedi watulingulaka ekila ka lushi lʼekila lu etemwelo, ku vo hawuyala la unungu?[114]

⁶Keli dimi lambunyutela ndi: One luleki etemwelo wuki, eko lane.

⁷Utunyeya diui ne[115] ati: Ketshi kalangami aha ulambu,[116] tshiki nyu kumamia antu waha la unungu,

⁸ne dia Onʼa untu keli uwandji a lushi lʼekila.

⁹Jesu akamo uma leko, akoto lʼetemwelo kawo.

¹⁰Nyulungi, kanga lunya lakumi aki loko. Vo wakawumbula vati: Eko ekila nkonoya antu lushi lʼekila? ne dia mbosongwela.

¹¹Ku ndi akawambula ati: Untu akona lʼatei anyu eli la okoko otoi, naka vo wamboko lu difuku lushi lʼekila, ku ndi hukimela dia mbutundja?[117]

¹²Ndʼefula kuleki untu ushinga wa okoko li! Okone ntsha dikambu diʼololo lushi lʼekila kema ekila.

¹³Ku ndi akatela untu ako ati: Usimbuli lunya laye. Ndi akalusimbula, ku lo lakayala wulu uku lukina.

¹⁴Keli Afarise wakatumbi, wakutshwela sheki, dia nyanga wuhu wa mbudiaka.

¹⁵Lamʼakeyi Jesu dikambu diako, ndi akamo uma leko. Antu efula wakuyeli, ku ndi akakonoya vo tshe.

¹⁶Ndi akakokomiya ati: Tanyumbeyanyaki le antu.

¹⁷Dikambu so diakayala, dia diui diakati Isaya nshidiyama ati:

¹⁸Endia ukambi ami lakamasonola; Ulangimi ami latongenengenelaka utema ami. Dimi layuwahe Nyuma kami, Ku ndi ayutela asi wedja dia sambu kʼololo.

¹⁹Ndi hutshana la untu, huhangohango. Untu huka diui diandi lu esese.

²⁰Ndi huhimbula sopo diakawaminula, Ndi hudima hyondio ya tala yatumba dinga, Edja ndu lamʼayundela sambu kʼololo dia nembia akambu wa kolo.

²¹Ku asi wedja wayuyala la elungamelu lu lukumbu landi.[118]

²²Wakela kanga odienge, laki tshungu la lumi, le Jesu. Ndi akokonoya, ku kanga lumi akateketa, akenyi.

²³Antu tshe wakambi, wakati vati: Aha kanula ya Davidi one?

²⁴Keli lamʼakuki Afarise diui so, vo wakati vati: Untu one hatundja edienge tshikima lu wulu wa Belezebulu,[119] uwandji wʼedienge.

²⁵Lamʼakeyi Jesu tukanyi tawo, ndi akawatela ati: Diulelu tshe diatana, diatulanaka. Usumba tshe kana khumbu tshe katana heyi nshikikala.

²⁶Naka Satana atutundjaka Satana, keti ndi ambatana. Ku ukundi ayushikikala diulelu diandi?

²⁷Naka dimi oso atutundjaka edienge la wulu wa Belezebulu, ku anʼanyu watetundjaka uma lu wulu wa na? Okone vo wayuyala embadi anyu.

²⁸Keli naka dimi latutundjaka edienge la wulu wa Nyuma ka Unyashungu, keli diulelu dia Unyashungu diambuyakaka le nyu.

²⁹Wuhu akona wukuki untu mboto lu luudu la kanga wulu, la nanya diango diandi tshe, naka ndi hatakeleki kanga wulu? Tshikima ndi ambutawukeleki, ku ndi ndijufundia luudu landi.

³⁰One laha kame la mi, kantuna. One lahasanganya la mi diango kadidianganya.[120]

³¹Diako mbanyutelami ndi: Wayudimanyia antu kolo tshe la tengo tshe, keli hawadimanyia lotengo la le Nyuma kʼOlolo.

³²Untu tshe lata diui dia kolo lu dikambu dia Onʼa untu, ayudimanyiama. Keli untu tshe lateketa diui dia kolo dikambu dia Nyuma kʼOlolo, hadimanyiama[121] lʼetena kene, kana lʼetena kayayi.

³³Nyuluwanya utamba, nyuluwanya ndu elua awo; kana nyulanya utamba, nyulanya ndu elua awo, ne dia utamba ateyamaka uma lʼelua awo.[122]

³⁴Nyu ana wa akhuha![123] ukundi weyanyu mvuta akambu wʼololo, lamʼenyu kolo? Ne dia unyo atoteketaka uma lu efula kʼakambu weli lʼutema.[124]

³⁵Untu ololo atutundjaka akambu wʼololo uma lu eumbelu kandi kʼololo. Keli untu a kolo atutundjaka akambu wa kolo uma lu eumbelu kandi ka kolo.

³⁶Dimi lambunyutela ndi: Lu lushi lʼelumbwelu, antu wayuta dikambu dia aui tshe a wutata wakawataka.

³⁷Ne dia we ayuyindjama uma lu aui aye, ndu ayanyema uma lu aui aye.

³⁸Ku afundji amotshi la Afarise wakatela Jesu vati: Umbetsha, shu nangaka mena djimbitelu motshi uma le ye.[125]

³⁹Keli ndi akâkaluya diui ati: Wa lu lolonga la kolo la luseka watuyangaka djimbitelu.[126] Keli hawuwasha nduku djimbitelu, tshikima djimbitelu ya umvutshi Jona.

⁴⁰Uku aki Jona lʼutema a lusi la wuki tanyi tusatu la etshu esatu;[127] osoku mbayuyala Onʼa untu tanyi tusatu la etshu esatu lʼatei a kete.

⁴¹Asi Niniva wayemala lu elumbwelu la wa lolonga lone, ku vo wayuwamia, ne dia vo wakakadimula etema lamʼakawuki esambishelu ka Jona.[128] Endia, luleki Jona wuki eko lane.

⁴²Khumʼekanga ka umuntu ka lu leke la Diku dia Kushi ayemala lu elumbwelu la wa lolonga lone, ku ndi ayuwamia, ne dia ndi akayi uma la kuma ya kete dia ndijuka yimba ya Solomona.[129] Endia, one luleki Solomona wuki eko lane.

⁴³Lamʼatutumbaka odienge uma lʼutema wa untu, vo watetetaka lu ahuli waha la ashi, watayangi mumuya, keli hawukitani nduku dihuli.

⁴⁴Ku vo wayuta ati: Dimi layukalula lu luudu lami lakamatumbi. Lamʼambuwukuma, ku vo wambulutana hwe, lombami ndu lolongoswami.

⁴⁵Ku vo wayutsho, wayutosa edienge ekina esambeli, wuleki kolo. Vo wayoto, wayudjase loko. Ku akambu wa untu uku wa lʼokongo, wayuleka wa ntundu kolo. Osoku mbayuyala le wa lolonga lone la kolo.

⁴⁶Lamʼakateketaka Jesu lʼantu, nyulungi, nyangu la anangu wakayemala lʼandja, waki lu nyanga dia mbutela diui.

⁴⁷Untu omotshi akawutela ati: Endia, nyo la ananyo ane wemadi lʼandja, wayanga nkutela diui.

⁴⁸Keli ndi akâkaluya one lakayuwutela diui ati: Akona eli nyomi? Ndu wana weli analingu?

⁴⁹Ku ndi akatshumi lunya le ambeki andi, akati ati: Wane mbeli nyomi la analingu!

⁵⁰Ne dia untu tshe latutshaka lulangu la Papa le lʼulungu, keli onalingu, ndu kadiemi, la nyomi.