Read tetala Mateu 17 Bible Online

Mateu 17 - tetala bible

Mateu 17

¹Lamʼaketi nshi shamalu, Jesu akose Petero, Jakoba la Joani onangu Jakoba, akambela la wo vame lʼukungu wʼutali.

²Ndi akahilo la ntundu kawo. Elundiji kandi kakahete uku unya. Ahondo andi wakayala wema uku usasi.

³Ku Mose la Elidja wakene le wo, wasawula la ndi.

⁴Petero akatela Jesu ati: Khumadiondjo, kawo shu ntshikala lindu. Naka we alanga, dimi layuhika tumbu satu lindu: kemotshi kaye, kemotshi ka Mose, la kemotshi ka Elidja.

⁵Lamʼakandiataka osoku, wenyi ku dingi dia ngaingai diambahutamela. Ku diui diakayi uma lu dingi ati: Onʼami la ngandji one, ndi ambongenyangenya[155] nyuwukeli![156] [157]

⁶Lamʼakuki ambeki diui so, vo wakayakosha ekhukhumadi; wakuki woma efula.

⁷Ku Jesu akayi, akawanandia. Ndi akati ati: Nyeto, tanyukaki woma.

⁸Lamʼakawedia ashu, vo komena nduku untu, paka Jesu ndiame.

⁹Lamʼakawatahuloka uma lʼukungu, Jesu akawatela ati: Tanyutelaki nduku untu enelo kene, edja ndu lamʼayulo Onʼa untu uma lu nyoi.

¹⁰Ambeki andi wakawumbula vati: Ya ukundi atutaka afundji vati: Dieli la Elidja dia ndja[158] ntundu?

¹¹Jesu akâkaluya diui ati: Mete, Elidja ayuya la ndijolongosola akambu tshe.

¹²Keli dimi lambunyutela ndi: Elidja ambuyakaka[159] keli vo kumbeya, wakutshela uku akawalangi. Okone ndu Onʼa untu ayusuyama le wo.

¹³Ku ambeki wakalimbitela vati: Ndi ambututela dia Joani Ubatizanyi.

¹⁴Lamʼakawakumi le ului wʼantu, untu akayi le Jesu, akukhusela adui. Ndi akati ati:

¹⁵Khumadiondjo, uki onʼami a pami ketshi, ne dia ndi eko kanga ekhunye, ambusuyama wulu. Ndi atokokaka tena efula lu dja, la tena efula lu ashi.

¹⁶Dimi lakayi la ndi le ambeki aye, keli vo kumbeya mbokonoya.

¹⁷Jesu akâkaluya diui ati: Nyu wa lolonga lone, akanga a wendijudi ndu waha la mbetawo, edja ndu etena kakona kayumuyala la memakana le nyu? Nyuyi la ndi le mi.

¹⁸Jesu akahangwela odienge, vo wakatumbi uma le ndi. Ku dikendia dia pami akakono lu unya ako.

¹⁹Ku ambeki wakayi vame le Jesu. Vo wakawumbula vati: Okoko wana wakisu kumbeya ntundja odienge?

²⁰Jesu akawatela ati: Ne dia mbetawo kanyu keko tshitshe. Mete kanyutelami ndi: Naka nyu la mbetawo uku lotongo la lohodia, nyu nyayutela ukungu one nyati: Umo uma laku, utshu lene, ku vo wayumo.[160] Nduku dikambu diayunyuheka lama ntsha.

²¹[161] Keli wuhu one hatumbi paka la dombelo la dikilelu dia mbu ya nde.

²²Lamʼakawasangana la Ngalili, Jesu akawatela ati: Wayukimo Onʼa untu lʼanya wʼantu,

²³ku vo wayudiaka. Ndi ayulwama lushi la satu. Ku vo wakanyangi efula.

²⁴Lamʼakawakumi la Kaperenauma, afutshishi wʼelambu wa etenyi otoi ka hendi ka shekele[162] wakayi le Petero; wakawumbula vati: Umbetsha anyu hatufutaka ulambu?

²⁵Ndi akâkaluya diui ati: Kema; ndi nfutaka. Ku lamʼakandioto lu luudu, Jesu akatatela mbumbula ati: Simona, akanaye na? Khumi ya dikanga ya la kete watulungulaka ulambu, kana ulambu a wudja uma le wa na? Uma le ana, kana uma le antu kʼantu?

²⁶Lamʼakandiati ati: Uma le antu kʼantu, Jesu akawutela ati: Laso ana weko la ndjadjasela.

²⁷Keli shu tatuwatakanyaki: utshu lʼuduwa, kutuki yodi, kutundi lusi layuya ntundu. Lamʼayuvufula unyo alo, we ayutana shekele. Kuyose, kuyuwashayo dikambu diami la dikambu diaye.