Read tetala Mateu 24 Bible Online

Mateu 24 - tetala bible

Mateu 24

¹Jesu akatumbi uma lʼetemwelo, akatatshokaka. Ambeki andi wakayi le ndi dia ndjuwenya mvudu ya etemwelo.

²Keli ndi akâkaluya diui ati: Nyu hanyenyi diango ne tshe? Mete kanyutelami ndi: Nduku dive diayutshikala ladiku dia dikina lane, diahokoshama.

³Lamʼakadjashi Jesu lʼUkungu wʼEweli, ambeki wakayi le ndi vame, wakawutela vati: Ututeli, etena kakona kayuyala akambu aso? Ayuyala djimbitelu yakona ya lamʼayuyuya ndu yʼekumelu kʼetena kene?

⁴Jesu akâkaluya diui ati: Nyewo, untu tanyunganyiaki.

⁵Ne dia antu efula wayuya lu lukumbu lami, wayuta untu lʼuntu ati: Dimi keli Kristu. Vo wayunganyia antu efula.

⁶Nyu nyayuka akambu wa ata la kumu ya ata. Nyewoki, tanyukananaki, dieli la akambu aso dia ndja, keli ekumelu atayi.

⁷Wudja ayolosha wudja ukina. Diulelu diayolosha diulelu dikina. Ndjala ka kasha la adidimu wa kete wayuyala lu dihuli la dihuli.

⁸Keli akambu aso tshe weli etatelu kʼasui.

⁹Ku vo wayunyukimo lu asui, wayunyudiaka. Nyu nyayuhetshama lu wedja tshe ne dia lukumbu lami.[220]

¹⁰Ku antu efula wayuyala wodu, wayufungana, wayuhetshanya.

¹¹Amvutshi efula wa kashi wayunela, wayunganyia antu efula.

¹²Ne dia lamʼavufula akambu wa kolo, ngandji kʼantu efula kayola.

¹³Keli one latetemala edja ndu lʼekumelu, ayushimbamela.[221]

¹⁴Lukumu lʼololo lone la diulelu layusambishama lu kete tshe, uku omenyi le wedja tshe. Lʼokongo diku, ekumelu kayuya.

¹⁵Okone lamʼayunyena elanyelu ka wononyi kakati umvutshi Danyele[222] kemadi lu dihuli diʼekila (one lala akambu ane amani fundu),

¹⁶wane weli la Judiya kawulawo lʼekungu.

¹⁷One leli ladiku dia luudu takitaki dia ntosa diango uma lu luudu landi.

¹⁸One leli lʼekambo takalulaki dia ntosa koti diandi.[223]

¹⁹Keli ndi fono kayuyala lu nshi sho le wane weli la waemi ndu le wane walomia ana awele li!

²⁰Nyolombe nyati: Elawelu kasu tayalaki lʼeleku ka tshitshi, kana lu lushi lʼekila.

²¹Ne dia lʼokongo diku, fono ka wulu kayuya, wuhu wahatayala uma kʼetatelu kʼandja edja ndu kakiane,[224] ndu wuhu wahayalaki pundju.

²²Utunduyala nshi sho kunsusama, tshiki nduku untu lutushimbamela. Keli wayususa nshi sho ne dia esonami.

²³Lʼetena keso, naka untu ayunyutela ati: Endia, Kristu eko lane! kana ati: Ndi eko lane! tanyetawoki.

²⁴Ne dia wane wayudimbiya antu vati: Kristu mbesu, la amvutshi mbesu, wayutumba. Vo wayenya tulimbitelu la akambu wa mamba dia munganyia ndu esonami, naka vo wayeya ntsha.

²⁵Nyulungi, dimi lambutanyutedi.

²⁶Okone, naka wayunyutela vati: Nyendi, lʼusui kendi, tanyutshokaki; kana, wayunyutela vati: Nyendi, lu mvudu ya lʼetei kendi, tanyetawoki.

²⁷Uku atungadimoka dingadimu dia ndjadi lu leke lʼehutwelu ka unya, ku dio menama lu leke lʼedjelu ka unya, osoku mbayuyala eyelu ka Onʼa untu.[225]

²⁸Lenʼeli edu, leko kayusanganaka pungu kame.[226]

²⁹Kemʼedja lʼokongo wʼasui wa lu nshi sho, unya ayukadimo udjima,[227] ngondio hukashiya ntu,[228] toto tayoko uma lʼulungu.[229] Diango dia wulu dia lʼulungu diayusutshasutshama.[230]

³⁰Ku djimbitelu ya Onʼa untu yayene lʼulungu. Wedja tshe wa la kete wayulela, wayena Onʼa untu ayayi lu wangi wa lʼulungu[231] la wulu ndu la lutumbu la wuki.

³¹Ndi ayutuma andjelo andi la diui dia wuki dia pungi. Vo wayutusanganya esonami andi uma lu beke nei, uma lu kuma kemotshi kʼulungu edja ndu lu kuma kekina.

³²Nyose wetshelu uma lʼutamba a fingu. Lamʼatuyalaka lutahi lawo woduwodu, lamʼatuwutundjaka amonga awo, nyu nyateyaka nyati: Owo aya suki.

³³Okone ndu nyu lamʼayunyena akambu ako tshe, nyayeya nyati: Onʼa untu aya kasuki, aya ka suku.

³⁴Mete kanyutelami ndi: Antu wa lolonga lone hawushila, tshikima akambu aso tshe wambushidiyama.

³⁵Ulungu la kete wayushila, keli aui ami hawushila.

³⁶Keli nduku untu leya lushi lako kana unya ako, kuyanga andjelo wa lʼulungu, kuyanga Ona, paka Papa ndiame.

³⁷Uku aki lu nshi ya Noa,[232] mbayuyala eyelu ka Onʼa untu.

³⁸Lu nshi yako, la ntundu ka elula atayi, antu wakalekaka, wakanokaka, wakatshukanaka, wakatshukamaka, edja ndu lushi lakoto Noa lu watu a luudu.

³⁹Vo kumbeya, edja ndu lamʼakayi elula, akawakhumela tshe.[233] Osoku mbayuyala eyelu ka Onʼa untu.

⁴⁰Etena keso, antu ahendi wayuyala lʼekambo, wayosa omotshi, ku wayutshika ukina.

⁴¹Amantu ahendi wayohela diango lu dive, wayosa omotshi, ku wayutshika ukina.

⁴²Okone nyewo, ne dia nyu hanyeyi lushi layuya Khumenyu.

⁴³Keli nyeyi nyati: Kanga luudu, utundeya unya wayuya uvi, tshiki ndi utosena, ndu tutundetawo luudu landi ntundiwama.

⁴⁴Okone ndu nyu, dieli la nyu dia ndjalongosola, ne dia Onʼa untu ayuya lu unya wahanyalungamela.[234]

⁴⁵Ukambi akona weli la kolamelu la yimba, wakakitsha khumendi ladiku dia antu wa luudu landi, dia mbashaka mbu ya nde yawo lu tena diayo?

⁴⁶Lamʼayuya khumendi, lamʼayundutana atsha osoku, ukambi oso ayuyala la otshoko.

⁴⁷Mete kanyutelami ndi: Ndi ayukitsha ladiku dia diango diandi tshe.

⁴⁸Keli lamʼayuta ukambi a kolo uku lʼutema andi ati: Khumemi ambutubiya.

⁴⁹Ku lamʼayundutatela nkomola anyandi ekambi, lamʼayundiolekaka, lamʼayundionokaka la ambidjoki a wanu,

⁵⁰khumi a ukambi ako ayuya lu lushi lahandialungamela, ndu lu unya wahandeyi.

⁵¹Ndi ayokomola wulu, ndu ayukitsha kame la akanga a lukesu. Leko, antu wayulela ndu wayokeketanya anyu awo.