Read tetala Mateu 25 Bible Online

Mateu 25 - tetala bible

Mateu 25

¹Lushi loso, diulelu dia lʼulungu diayuyala uku esekaseka dikumi wa dimuma, wakose atala awo,[235] wakatshu la ntusangela utshuki a wadi.

²Atanu awo waki dinginya, atanu waki la yimba.

³Lamʼakose akanga a dinginya atala awo, vo kombosa iso,

⁴Keli akanga a yimba wakatshu la iso lu sayi yawo ndu lu atala awo.

⁵Lamʼakatubiya utshuki a wadi, esekaseka ako tshe wakanyingonyingo, wakalali djo.

⁶Lʼasa ndeki, wakadji dielu van. Endia, utshuki a wadi! Nyuyi la ndijusangela.

⁷Ku esekaseka eso tshe waketo, wakalongosola atala awo.

⁸Akanga a dinginya wakatela akanga a yimba vati: Nyutusha yema yʼiso, ne dia atala asu wutsha nyimala.

⁹Keli akanga a yimba wakâkaluya diui vati: Iso hukuka le su ndu le nyu, undu. Nyutshu le wane watusundjaka, nyutuyasumbeli.

¹⁰Lamʼakawatshu dia ntusumba iso, utshuki a wadi akayi. Okone wane wakayalongosola, wakoto la ndi lu dambu dia tshuki, ku wakadihi lukuki.

¹¹Lʼokongo diku, ndu esekaseka ekina wakayi, wakati vati: Khumadiondjo, Khumadiondjo, utudihula.

¹²Ku ndi akâkaluya diui ati: Mete kanyutelami ndi: Dimi halanyeyi.[236]

¹³Okone nyulungamelaki, ne dia nyu hanyeyi lushi kana unya.

¹⁴Dikambu ne dieli uku untu lakayangi ntsho lu kete kina. Ndi aketi ekambi andi, akatshikela diango.

¹⁵Ndi akasha omotshi talata tshanu, ukina talata hyendi, ukina talata otoi, le untu lʼuntu uku yimba yandi. Ku ndi akatshu lu lokendo.

¹⁶One lakalungula talata tshanu, akatshi la yo ukandia, akakundja talata kina tshanu.

¹⁷Ndu one lakalungula talata hyendi, akakundja kina hyendi.

¹⁸Keli one lakalungula otoi, akatshu, akatutshima lu kete, akatushe lufalanga la khumendi.

¹⁹Lamʼaketi nshi kambi, uwandji wʼekambi ako akayi, akali la wo diango.

²⁰One lakalungula talata tshanu akayi, akela talata kina tshanu. Ndi akati ati: Khumadiondjo, we akambisha talata tshanu, endia, dimi lakakundja talata kina tshanu.

²¹Khumendi akawutela ati: Kawo, we ukambi wʼololo la kolamelu. We aki la kolamelu lu diango tshitshe, dimi layukukitsha ladiku dia diango efula. Oto lu ongenongeno wa khumeye.

²²Ndu one lakalungula talata hyendi akayi, akati ati: Khumadiondjo, we akambisha talata hyendi. Endia, dimi lakakundja talata kina hyendi.

²³Khumendi akawutela ati: Kawo, we ukambi wʼololo la kolamelu. We aki la kolamelu lu diango tshitshe, dimi layukukitsha ladiku dia diango efula. Oto lu ongenongeno wa khumeye.

²⁴Ndu one lakalungula talata otoi akayi, akati ati: Khumadiondjo, dimi nkeyaka ndi: Kanga ngala keye, latunaka lamʼakiye kumune, latusanganyaka lamʼakiye kunyanganya.

²⁵Ku dimi lakuki woma, lakatshu, lakatushe talata kaye lu kete. Henyi engo kaye kene!

²⁶Keli khumendi akûkaluya diui ati: We ukambi a kolo la shuasua! We akeyi wati: Dimi katunaka lamʼakimi kumune, ndu katusanganyaka lamʼakimi kunyanganya?

²⁷Diaki la ye dia nkimo talata kami le asondjanyi, tshiki lamʼuyemi ane, dimi lutuyulungula talata kami ndu waho.

²⁸Okone nyohotole talata keku, nyukisha one leli la talata dikumi.

²⁹Ne dia leli la diango, wayuwusha dikina, ku ndi ayuyala la efula. Keli one laha la engo wayohotola ndu kene keli la ndi.[237]

³⁰Nyukadja ukambi wʼanyanya uku lu udjima a lʼandja. Leko, antu wayulela ndu wayokeketanya anyu awo.[238] [239]

³¹Lamʼayuya Onʼa untu lu lutumbu landi, la andjelo tshe kame la ndi,[240] ndi ayudjase lu kati ka diulelu ka lutumbu landi.[241]

³²Wedja tshe wayusanganyema la ntundu kandi, ku ndi ayuwatanya uku atatanyaka ulami ekoko la mbudi.

³³Ndi ayukitsha ekoko lu lunya landi la pami, ku mbudi lu lunya la lomoso.

³⁴Ku Khumʼekanga ayutela wane weli lu lunya landi la pami ati: Nyuyi, nyu etshokwami wa Papa, nyukati diulelu diakawanyolongoswela umaka etatelu kʼandja,

³⁵ne dia dimi laki la ndjala, nyu nyakambisha mbu ya nde; dimi laki la pusa, nyakambisha dia no; dimi laki ongendangenda, nyu nyakambotshiya lu luudu.

³⁶Dimi laki utakataka, nyu nyakandotsha; dimi laki la hemo, nyu nyakayumenda; dimi laki lu lukanu, nyu nyakayi le mi.

³⁷Ku antu wʼololo wayuwumbula vati: Khumadiondjo, etena kakona kakatakenyi la ndjala, kakatakusha mbu ya nde? kana la pusa kakatakusha dia no?

³⁸Etena kakona kakatakenyi ongendangenda, kakatakulungula? kana utakataka, kakatakolotsha?

³⁹Etena kakona kakatakenyi la hemo, kana lu luudu la lukanu, kakatayi dia ndjukendia?

⁴⁰Khumʼekanga ayakaluya diui ati: Mete kanyutelami ndi: Uku akanyatshela otoi omotshi a wane wuleki tshitshe lʼatei wʼanalingu ane, dimi uku akanyatshela.

⁴¹Ku ndi ayutela wane wa lu lunya landi la lomoso ati: Nyumanganeli, nyu ambidjami mananu! Nyutshu lu dja ya pundju, yakawahetshiya uhimbanyi la andjelo andi,

⁴²ne dia dimi laki la ndjala, nyu kumbishami mbu ya nde; dimi laki la pusa, nyu kumbishami dia no.

⁴³Dimi laki ongendangenda, nyu kunungulami; dimi laki utakataka, nyu kondotshami; dimi laki la hemo ndu lu lukanu, nyu kundja dia ndjumendia.

⁴⁴Ku ndu vo wayuwumbula vati: Khumadiondjo, etena kakona kakatakenyi la ndjala kana la pusa, kana ongendangenda, kana utakataka, kana la hemo, kana lu lukanu kakisu kunkukimanyia?

⁴⁵Ku ndi ayakaluya diui ati: Mete kanyutelami ndi: Ne dia uku akinyu kuntshela otoi omotshi wuleki tshitshe lʼatei a wane, dimi uku akinyu kuntshela.

⁴⁶Antu aso wayutsho lu sui dia pundju, keli antu wʼololo lu lumu la pundju.[242]