Read tetala Mateu 27 Bible Online

Mateu 27 - tetala bible

Mateu 27

¹La pindju, elombedi a waki tshe la dikumanyi dia wudja wakatshwela Jesu sheki dia mbudiaka.

²Vo wakukeleka, wakatshu la ndi, wakukimo le umbuledi Pilata.

³Ku Judasi, ufungi andi, lamʼakandenyi ati: Wambuwamia, ndi akakadimula utema, akâkaluya tenyi dia fesa akumi asatu le elombedi a waki la dikumanyi.

⁴Ndi akati ati: Dimi lambutsha kolo, ne dia lambufunga untu laha la unungu. Keli vo wakati vati: Akatatshi na? Dikambu diaye weme.

⁵Ku ndi akakadja tenyi dia fesa lu etemwelo, akamo, akatuyadja kodi.

⁶Elombedi a waki wakayosa tenyi diako dia fesa, wakati vati: Eko ekila dia nkitsha diango ne lʼekitshelu, ne dia dio dieko ushinga a dikila.

⁷Ku vo wakasangi lulimi, wakasumbi ekambo kʼukingi a puki la dio, ne dia nkhundeka angendangenda.

⁸Okone vo mbetaka ekambo keso vati: Ekambo ka Dikila, edja ndu elo.[256]

⁹Okone diui diakati umvutshi Jeremiya diakashidiyama ati: Vo wakose tenyi dia fesa akumi asatu, uku ushinga wakashikike asi Isamyele amotshi, dia mbidjaka one lambuwudja ushinga,

¹⁰ku wakayikimo dia nsumba ekambo kʼukingi a puki, uku akambidjangela Khumadiondjo. [257]

¹¹Jesu akemala la ntundu ka umbuledi. Ku umbuledi akawumbula ati: We keli Khumʼekanga kʼasi Juda? Jesu akawutela ati: Wemʼoso ata.

¹²Keli lamʼakosongwela elombedi a waki la dikumanyi, ndi kunkaluya nduku diui.

¹³Ku Pilata akawumbula ati: We huki efula kʼakambu wakosongwelawo keso?

¹⁴Keli ndi kumbukaluya nduku diui, kuyanga lu aui wakawufundi. Okone umbuledi akambi efula.

¹⁵Lu lushi la wuki kaki un buledi la etshelu ka ntshungwela ului wʼantu usi lukanu omotshi lalangawo.

¹⁶Lu nshi sho, vo waki la usi lukanu lakeyamaka, lukumbu landi Barabasi.

¹⁷Ku lamʼakawasangana, Pilata akawambula ati: Akona alanganyu dimi nyutshungwela, Barabasi, kana Jesu, letawo vati: Kristu?

¹⁸Ndi akeyi ati: Vo wakakimo Jesu ne dia kandjema.

¹⁹Lamʼakandiadjashi lu kati kʼelumbwelu, wadendi akutumela diui ati: Totoki lu dikambu dia untu ololo uku, ne dia dimi lakasuwi efula lu do elo dia dikambu diandi.

²⁰Elombedi a waki la dikumanyi waketawuya elui wʼantu dia vo nomba Barabasi, la ndjaka Jesu.

²¹Keli umbuledi akawambula ati: Lʼatei awo vo ahendi, akona alanganyu dimi nyutshungwela? Vo wakati vati: Barabasi.

²²Ku Pilata akawambula ati: Kayumutshela Jesu, letawo vati: Kristu, na? Vo tshe wakati vati: Wudiaki lʼutamba a mpeketanya.

²³Ndi akawambula ati: Okoko wana? Kolo kakona kutshendi? Keli vo wakahangohango wulu vati: Wudiaki lu utamba a mpeketanya!

²⁴Lamʼakenyi Pilata ati: Diui diami hadiukema, keli lufungusu lambutuwo, ndi akose ashi, akotsha anya[258] la ntundu ka ului wʼantu. Ndi akati ati: Dimi lambuyindjama lu dikambu dia dikila dia untu ololo one; dikambu dianyu nyame.

²⁵Antu tshe wakâkaluya diui vati: Dikila diandi diayali lʼete asu, ndu lʼete wa anʼasu!

²⁶Ku ndi akatshungwela Barabasi, keli akakomola Jesu, akukimo dia ndi ndjakema lʼutamba a mpeketanya.

²⁷Ku alimbi wʼumbuledi wakatole Jesu lu luudu lʼelumbwelu, wakomotela ului tshe.

²⁸Vo wakukulula ahondo, wakolotsha ukutu wa tilili.

²⁹Vo wakele dembo dia kusu diʼatende, wakulimbedio, wakukimiya danga lu lunya la pami. Vo wakawukela adui, wakosoke vati: Moyo, Khumʼekanga kʼasi Juda!

³⁰Vo wakawutela soi, wakose danga diako, wakokomoladio lʼote.

³¹Lamʼakawashili mbosoka, vo wakukulula ukutu ako, wakolotsha ahondo andi. Ku vo wakatshu la ndi dia ntudiaka lʼutamba a mpeketanya.

³²Lamʼakawatumbi uma loko, vo wakenyi pami kemotshi kʼusi Kurene, lukumbu landi Simona, wakutshusha la wulu dia membia utamba andi a mpeketanya.

³³Lamʼakawakumi lu dihuli dietawo vati: Ngolongota (kitshimudi ati: Dihuli dia lombo),

³⁴vo wakawusha wanu a no, wusanganyimi la kundju. Keli lamʼakandialete, ndi akaseke no.

³⁵La-mʼakawuhane lʼutamba a mpeketanya, vo wakakahana ahondo andi lu eukelu kʼuwali.[259]

³⁶Ku vo wakadjase, wakulami leko.

³⁷Wakakitsha efundelu kakawufundi la diku diʼote andi vati: Jesu Khumʼekanga kʼasi Juda one.

³⁸Ku vo wakahane apotodi ahendi lu etamba a mpeketanya: omotshi lu lunya la pami, ukina lu lunya la lomoso.

³⁹Ambetshi a mbuka wakotenge, wasutsha ete awo,[260]

⁴⁰wata vati: We lukuki mpandjula etemwelo, la nkihika lu nshi shatu,[261] uyashimbeli! Naka Onʼa Unyashungu keye, ukati uma lʼutamba a mpeketanya!

⁴¹Ndu elombedi a waki kame la afundji la dikumanyi, wakosoke pupu; wakati vati:

⁴²Ndi akashimbela akina, ndi heyi ndjashimbela! Khumʼekanga ka Isamyele kendi; akati kakiane uma lʼutamba a mpeketanya, ku shu tayuwetawo.

⁴³Ndi atekamaka Unyashungu. Unyashungu aya mbushimbela kakiane, naka ndi mbulangaka;[262] ne dia ndi akati ati: Onʼa Unyashungu kemi.

⁴⁴Ndu apotodi wakawahane kame la ndi lu etamba a mpeketanya, wakotenge pupu.

⁴⁵Udjima akayala lu kete tshe umaka unya lʼatei wʼote edja ndu unya lʼeshidi esatu.

⁴⁶Uku lʼeshidi ako esatu, Jesu akawelela wulu ati: Eli, Eli, lama sabakatani? kitshimudi ati: Unyashungu ami, Unyashungu ami, ukundi ansekaye na?[263]

⁴⁷Lamʼakuki antu amotshi wakemadi laawo diui so, vo wakati vati: Untu one ambeta Elidja.

⁴⁸Kemʼedja omotshi akalawo, akatambia dimbu lu wanu wʼukayi, akadidji lu danga, ku ndi akawusha dia ndi no.[264]

⁴⁹Keli akina wakati vati: Nyutukete, tutukendia kana Elidja ayuya la ndi ushimbela.

⁵⁰Jesu akawelela wulu ntu, akakitshiya.

⁵¹Nyulungi, dihondio[265] diakahanemi lu etemwelo, diakate betshi pendi, uma ladiku pulu ndu lʼesi. Kete yakadidima, ave a waki wakate;

⁵²waumbu wakadiho, ekilami efula wakavu wakulo.

⁵³Vo wakatumbi uma lu waumbu lʼokongo wʼeulwelu kandi, wakayi lʼusumba wʼekila, wakene le antu efula.

⁵⁴Lamʼakenyi olombodi wʼalimbi la wane wakalamaka la ndi Jesu, udidimu wa kete la akambu wakatshama, vo wakuki woma efula. Vo wakati vati: Mete, one aki Onʼa Unyashungu!

⁵⁵Amantu efula wakatangaka uma la tshalula, wane wakaveli Jesu uma la Ngalili, ne dia ntukambelaka ulimu.

⁵⁶Lʼatei awo kaki Mamya usi Mangadala, ndu Mamya nyangu Jakoba la Jose, ndu nyangu ana wa Zebede.[266]

⁵⁷La dikolo, kanga ongonyi uma lʼAmmatayo, lukumbu landi Josefu, akayi; ndu ndi kaki umbeki a Jesu.

⁵⁸Ndi akatshu le Pilata, akalombe udu a Jesu. Ku Pilata akati diui dia vo mbushawo.

⁵⁹Josefu akose udu, akawombe dihondio dia linene dia pudipudi.

⁶⁰Ndi akatuwetamia lu diumbu diandi diʼuyuyu, diakandiatshimi lu dive. Ndi akangitula dive dia wuki utsha lu suku dia diumbu, ku ndi akatshu.

⁶¹Mamya usi Mangadala la Mamya ukina waki leko, wudjashi welanedi la diumbu.

⁶²Lamʼakahuto unya, lushi la lʼokongo wʼElongoswelo, elombedi a waki la Afarise wakasangana la ntundu ka Pilata.

⁶³Vo wakati vati: Khumadiondjo, shu tambuho diui diakati kanga lukanyi one lamʼakindi la lumu ati: Lʼokongo a nshi shatu, dimi layulo[267]

⁶⁴Okone uti diui dia antu nama diumbu wulu edja nau lushi la satu, ne dia ambeki andi watukuya dia ndijosa udu andi, ku vo ndijutela antu vati: Ndi ambulo uma lu nyoi. Ku lukesu la lʼokongo layuleka la ntundu kolo.

⁶⁵Pilata akawatela ati: Nyu nyeko la djui yʼalimbi watulamaka; nyutshu, nyu-takitsha dia vo nama diumbu wulu, uku weyanyu.

⁶⁶Ku vo wakatshu, wakatukitsha alami dia nama diumbu, wakadji djimbitelu lu dive, wakatshiki alami laawo.